નારાજગી / AUDIO: કડવા પાટીદારો શું ખુરશીઓ પાથરવા રાખ્યા છે?: જૂનાગઢમાં ભાજપ કાર્યકરોની ક્લિપ વાયરલ થતાં ખળભળાટ

• જુનાગઢના માણાવદરમાં ભાજપના કાર્યક્રમ પહેલા વિવાદ
• ભાજપના કાર્યકરોની ઓડિયો ક્લિપ વાઇરલ
• કડવા પટેલના હોદ્દેદારોની બાદબાકી થતા નારાજગી

જૂનાગઢના માણાવદરમાં ભાજપ પ્રદેશ પ્રમુખ સી.આર.પાટીલની અધ્યક્ષતામાં કાર્યક્રમનું આયોજન કરવામાં આવ્યું છે. આ કાર્યક્રમ શરૂ થયા પહેલાં વિવાદ થયો છે. કાર્યક્રમની આમંત્રણ પત્રિકામાં કડવા પાટીદારના હોદ્દેદારોના નામની બાદબાકી થતાં વિવાદ થયો છે. જેને લઇને એક ઓડિયો ક્લીપ પણ વાયરલ થઇ છે. 

માણાવદરમાં ભાજપના કાર્યક્રમ પહેલા વિવાદ

માણાવદરમાં આયોજિત કાર્યક્રમ પહેલા એક ઓડિયો ક્લિપ વાયરલ થતા ખળભળાટ મચ્યો છે. જેમાં પાલિકાના ટાઉન પ્લાનિંગ કમિટીના ચેરમેનના પતિ અને દિનેશ કાલરીયાની સાંસદના PA વચ્ચેની વાતચીત થઇ હોવાનું સામે આવ્યું છે. સાથે જ અન્ય હોદ્દેદારોના નામ લખવા સામે પણ વિરોધ કરવામાં આવ્યો છે. ઓડિયો ક્લિપમાં વાતચીત વાયરલ થઇ છે જેમાં કાર્ડમાં ભાજપના કડવા પાટીદારના હોદ્દેદારોના નામ ન લખવા બાબતે નારાજગી સ્પષ્ટ થઇ હતી.

'કામ કરો એટલી અવગણના થાય છે '

ટાઉન પ્લાનિંગ કમિટીના ચેરમેનના પતિનું કહેવુ છે કે જે વિસ્તારમાં ભાજપનો કાર્યક્રમ યોજાઇ રહ્યો છે તેમાં જૂનાગઢના મેયર અને શહેર પ્રમુખનું નામ લખવામાં આવ્યું  પરંતુ માણાવદર શહેર ભાજપ પ્રમુખ કે નગરપાલિકા પ્રમુખ પ્રોટોકોલ પ્રમાણે ન આવે ?  તો દિનેશ કાલરિય જણાવી રહ્યા છે કે જેટલા કામ કરીએ એટલા સાઇડલાઇન કરવામાં આવે છે. આ ઉપરાંત ભાજપના નેતાઓ પર પણ કોઇ જવાબ આપતુ ન હોવાનો કે ધ્યાન ન આપતા હોવાના પણ આરોપ લગાવ્યા.  

માણાવદર ભાજપના આગેવાનોનું નામ નથી- દિનેશ કાલરિયા

મહત્વનું છે કે   માણાવદરના પાનેરા શિક્ષણ સંકુલમાં ગુરુવારે પ્રદેશ ભાજપ પ્રમુખની હાજરીમાં ત્રિવિધ કાર્યક્રમનું આયોજન કરાયું છે. જેમાં પાનેરા કોલેજ દ્વારા પત્રિકાઓ બહાર પાડવામાં આવી છે. જેમાં રાજકીય આગેવાનોને આમંત્રણ આપવામાં આવ્યું છે પરંતુ માણાવદરના ભાજપના કોઇ પણ આગેવાનોના નામ નથી, શહેર પ્રમુખ કે નગરપાલિકા પ્રમુખ કોઇના પણ નામ લખવામાં આવ્યા નથી જેને લઇને ભાજપના રાજકીય આગેવાનોમાં નારાજગી જોવા મળી હતી.