દિવાળીનો તહેવાર નજીક આવે એટલે લોકો પોતાના ઘરની સફાઈ કરવામાં લાગી જાય છે. આ સમયે જો કોઈ મુશ્કેલ કામ હોય તો તે છે પંખા, બારીઓ, બારીઓની ગ્રીલ અને ટોયલેટને સાફ રાખવાનું. પરંતુ જો તમે ઓછી મહેનતે સફાઈ કરવા માંગો છો તો તમે રસોડાની આ ચીજોનો ઉપયોગ કરો. તેનાથી ઘરની સફાઈમાં મહેનત ઓછી લાગશે.
દિવાળીમાં આ રીતે કરો સફાઈ
રસોઈના આ ચીજોથી બનશે સફાઈ સરળ
બચશે સમય અને મહેનત, ચમકશે તમારું ઘર
તમારે તમારું ઘર ઝડપથી સાફ કરવું છે તો તમારે ઘરની રસોઈના કેટલાક સામાનની મદદ લેવાની રહે છે. જેમાં તમે બેકિંગ સોડા, વ્હાઈટ વિનેગર, લીંબુ, સ્ક્રબ, બ્રશ અને નકામા કપડાંનો ઉપયોગ કરી શકો છો.
બારીની ગ્રીલ સાફ કરો
બારીની ગ્રીલમાં સૌથી વધારે કચરો હોય છે. તેને તમે પેઇન્ટ બ્રશથી સાફ કરી શકો છો. આ સિવાય તમે નકામા ટૂથબ્રશનો પણ ઉપયોગ કરી શકો છો. બ્લોઅર પણ તમારી મદદ કરી શકશે. બ્રશથી ધૂળ ઉખાડ્યા બાદ સાબુવાળા પાણીમાં કપડું બોળો અને તેને સાફ કરો.
લીંબુ કરશે મદદ
લીંબુમાં એસિડ વધારે પ્રમાણમાં હોય છે. તે માઈક્રોવેવને સાફ કરવામાં તમારી મદદ કરશે. માઈક્રોવેવના બાઉલમાં પાણી ભરી તેમાં લીંબુના ટીપાં નાખો અને તેની વરાળ થવા દો. ટિશ્યૂ પેપરની મદદથી કે નરમ કપડાંને આ પાણીમાં બોળીને તેનાથી માઈક્રોવેવની સફાઈ કરો. તેની સ્મેલ પણ ગાયબ થઈ જશે.
ટોઈલેટ ક્લીન કરવા
એક બાઉલમાં બેકિંગ સોડા લો. તેમાં થોડો લીંબુનો રસ ઉમેરો, હવે થોડો લિક્વિડ સોપ મિક્સ કરો. તેને ક્યૂબ પ્રમાણે ફ્રિઝમાં સ્ટોર કરો. એક ક્યૂબ ટોઈલેટમાં નાંખો અને ફ્લશ કરો, તમારું ટોઈલેટ ચમકી જશે.
બાથરૂમના નળ કરો સાફ
મોટાભાગે ક્ષારવાળા પાણીને કારણે બાથરૂમના નળ પર ક્ષાર જામે છે. તમે બેકિંગ સોડાની મદદથી તેને ઓછી મહેનતે સાફ કરી શકો છો. બેકિંગ સોડામાં ડિશ વોશના ટીપાં નાંથો અને નળ પર લગાવી લો. તેમ કરવાથી જિદ્દી ડાઘ નીકળી જશે.
આ રીતે કરો શાવરની સફાઈ
શાવરના કાણા પાણીના ક્ષારને કારણે પૂરાઈ જાય છે. નવા જેવો ચમકતો શાવર રાખવા માટે વિનેગરનો ઉપયોગ કરો. એક પ્લાસ્ટિકની થેલીમાં થોડું વિનેગર ભરો અને તેમાં શાવર ડૂબેલો રહે તે રીતે શાવર પર બાંધી લો. શાવરનો ક્ષાર નીકળી જશે અને તે નવા જેવો ચમકશે.
પંખા સાફ કરવા
રસોડામાં વપરાતા ચિપિયાના બંને ભાગ પર કપડું વિંટાળી લો, તેને રબરથી ફિટ કરો. આ કપડાવાળા ચિપિયાથી પંખો સાફ કરો. તે ફટાફટ સાફ થશે. પંખાની ધાર પરનો કચરો પણ સરળતાથી સાફ થશે.
દિવાલો સાફ કરવા
સાબુવાળા પાણીમાં વિનેગર અને વોશિંગ સોડા ઉમેરો, આ પાણીથી દિવાલો સાફ કરવાથી તેમાં મહેનત ઓછી લાગશે અને તે સારી રીતે ચમકશે.
બારીઓના કાચ કરો સાફ
કાચ સાફ કરવા માટે વ્હાઈટ વિનેગર તમારી મદદ કરશે. કાચ પર પહેલાં વ્હાઈટ વિનેગર સ્પ્રે કરો અને તેને પાંચ મિનિટ રહેવા દો. હવે એક સોફ્ટ કપડું લો અને કાચ લૂછી લો. કાચ ચમકવા લાગશે અને તમારી મહેનત પણ ઓછી થશે.