રાજકોટના મોરબી રોડ પર દિવાળીના તહેવાર પર ફટકડા ફોડવા જેવી બાબતે ખુની ખેલ ખેલાયો છે. બે જૂથ વચ્ચે મારામારી થતાં 6 લોકો ઈજાગ્રસ્ત થયા છે. જેમાંથી 2 વ્યક્તિની હાલત ગંભીર હોવાનું કહેવામાં આવી રહ્યું છે.
રાજકોટના મોરબી રોડ પર ફટાકડા ફોડવા બાબતે મારામારી
મારીમારીમાં યુવક પર છરીના ઘા ઝીંકાયા
6 લોકો ઈજાગ્રસ્ત થતાં સારવાર માટે હોસ્પિટલમાં ખસેડાયા
બે વર્ષથી કોરોનાના પ્રતિબંધોને કારણે તહેવારોની સરખી ઉજવણી થઈ શકી ન હતી, ત્યારે એક તરફ આ વર્ષે રાજકોટવાસીઓનો આનંદ જાણે ક્યાંય સમાતો ન હોય તેમ અલગ જ થનગનાટ સૌના ચહેરા પર જોવા મળ્યો હતો અને લોકોએ મનમુકીને કોઈપણ પ્રતિબંધો વિના દિવાળીની ઉજવણી કરી. તો બીજી તરફ રાજકોટના મોરબી રોડ પર ગતરોજ ખુની ખેલ ખેલાયો હતો. રાજકોટના મોરબી રોડ પર સેટેલાઇટ ચોક પાસે ફટાકડા ફોડવા જેવી નજીવી બાબતે બે જૂથ વચ્ચે મારામારી થઈ હતી. જેમાં 6 લોકો ઈજાગ્રસ્ત થયા છે. જેમાંથી 2 વ્યક્તિની હાલત ગંભીર હોવાનું કહેવામાં આવી રહ્યું છે.
તીક્ષ્ણ હથિયાર વડે કર્યો હતો હુમલો
પ્રાપ્ત વિગતો અનુસાર, રાજકોટના મોરબી રોડ પર સેટેલાઇટ ચોક પાસે દિવાળીના તહેવાર પર ફટાકડા ફોડવા જેવી નજીવી બાબતે બોલાચાલી થયા બાદ મામલો ઉગ્ર બન્યો હતો. જેમાં બે જૂથ વચ્ચે મારામારી થઈ હતી. તથા 2 શખ્સોએ યુવક પર તીક્ષ્ણ હથિયાર વડે હુમલો કર્યો હતો. આ અંગેની જાણ થતા બી-ડિવિઝન પોલીસ સ્ટેશનની ટીમ અને ઉચ્ચ અધિકારીઓ પણ બનાવ સ્થળે દોડી આવ્યા હતા.
બી-ડિવિઝન પોલીસે 2 શખ્સોની અટકાયત કરી
આ મારામારીના બનાવમાં કુલ 6 લોકો ઈજાગ્રસ્ત થયા છે. જેઓને સારવાર માટે હોસ્પિટલમાં ખસેડવામાં આવ્યા છે. હાલ બી-ડિવિઝન પોલીસે 2 શખ્સની અટકાયત કરી આગળની તપાસ હાથ ધરી છે.
ઈજાગ્રસ્તોના નામ
- મહેશ પાંચા સરાવડા
- વલ્લભ જસમત રૈયાણી
- વિકાસ લખમણ
- સુધમ મધુભાઈ
- સુનિલ લાઠીગ્રા
- અન્ય એક યુવક