પોલીસે હોસ્પિટલ આવેલી વ્યક્તિની કોઇ વાત ન સાંભળી દંડ ફટકાર્યો, વાયરલ વીડિયોમાં પોલીસ અને વ્યક્તિ વચ્ચે ઉગ્ર બોલાચાલી
મહેસાણામાં પાર્કિગ મામલે ટ્રાફિક પોલીસ અને વ્યક્તિ વચ્ચે રકઝક
પાર્કિગ બાબતે પોલીસ ખોટી રીતે હેરાન કરતી હોવાના વ્યક્તિનો આરોપ
મહેસાણામાં ટ્રાફિક પોલીસ અને સામાન્ય વ્યક્તિ વચ્ચે બબાલનો વીડિયો હાલ સોશિયલ મીડિયામાં ખૂબ વાયરલ થઈ રહ્યો છે. પાર્કિગ બાબતે પોલીસ ખોટી રીતે હેરાન કરતી હોવાના આરોપ સાથે આધેડ વયના કાકાએ ટ્રાફિક પોલીસના હાજર સભ્યોનો ઉધડો લઈ લીધો હતો.
શું સમગ્ર મામલો?
જો ઘટના પર વિગતે વાત કરીએ તો શંકરભાઇ નામની વ્યક્તિ દર્દીને લઇનેને વ્યક્તિ હોસ્પિટલ આવી હતી. પોલીસે દર્દીની સ્થિતિ જોયા વગર શંકરભાઇની ગાડીને લોક માર્યું હતું અને ગાડી અહીં કેમ પાર્ક કરી તે બાબતે રકઝક કરી હતી.સમગ્ર મામલો છેક ઘર્મ અને જ્ઞાતિ પર આવી ગયો હતો. ટ્રાફિક વાનમાં બેઠલા પોલીસ કર્મચારીએ વીડિયો ઉતાર્યો હતો જેમાં હોસ્પિટલના ઈમરજન્સી કામ પર જઈ રહેલા વ્યક્તિને ટ્રાફિક પોલીસે ખોટી રીતે હેરાન કર્યો હોવાનો આરોપ લાગી રહ્યો છે.
VTV ગુજરાતીના સળગતા સવાલો
પોલીસ આખરે ક્યારે એવુ વાતાવરણ ઉભુ કરશે કે આ પ્રકારના વીડિયો ન બને?
કેમ ટ્રાફિક પોલીસ સામાન્ય પ્રજાની વ્યથાને સમજી શકતી નથી?
ટ્રાફિકના નિયમોનું કડકપણે પાલન થાય તે સારી વાત છે પરંતુ ટાર્ગેટના નામે પ્રજા હેરાન કેમ?
કોન્ટ્રાક્ટ પર રાખેલા કર્મચારીઓ કેમ કરે છે વારંવાર સામાન્ય લોકોનું અપમાન?
પોલીસ જવાન તેમને કેમ દાદાગીરી કરવાનો પરવાનો આપે છે?
પોલીસ વીડિયો બંધ કરાવી દે છે તો સામાન્ય પ્રજાનો વીડિયો કેમ બનાવે છે પોલીસ?
માનવતાના ધોરણે હોસ્પિટલના કામમાં જતા કોઈને રોકી શકાય છે ખરો?
વીડિયોમાં શંકરભાઈનો એક જ પક્ષ બતાવ્યો છે જયારે પહેલા શું બન્યું તે કોણ જાણે?
લાંબી માથાકૂટ બાદ વ્યક્તિ 500 રૂપિયાનો દંડ ભરવા તૈયાર થાય છે. પણ દંડ ભર્યા બાદ પણ પોલીસ વીડિયો બનાવીને વ્યક્તિને હેરાન કરતી દેખાઈ આવે છે. કોઈ પણ રજૂઆત સાંભળ્યા વગર દંડાત્મક કાર્યવાહી કરવામાં આવતા આસપાસના લોકો પણ ટ્રાફિક પોલીસના આ વલણથી નારાજ દેખાઈ આવ્યા હતા. આવા અનેક કિસ્સાઓ રોજે રોજ સામે આવે છે. પણ ટ્રાફિક પોલીસ કોઈ પણ કેસમાં દાખલારૂપ કાર્યવાહી કરતી નથી જેથી અમુક જવાનોને ફાવતું મળી જાય છે.