અમદાવાદ પૂર્વ બેઠક ગીતા પટેલના સમર્થનમાં હાર્દિક પટેલે સભા યોજી હતી. તે દરમિયાન સભામાં બબાલ થઇ હતી. અચાનક સભામાં આવેલા લોકો વચ્ચે મારામારી સર્જાઇ હતી.
કોંગ્રેસ દ્વારા અમદાવાદમાં નિકોલ ખાતે ગીતા પટેલના સમર્થનમાં જાહેરસભાનું આયોજન કરવામાં આવ્યુ હતુ. જેમાં હાર્દિક પટેલ અને ગીતા પટેલ સહિતના આગેવાનો ઉપસ્થિત રહ્યા હતા. જો કે હાર્દિક પટેલ સભામાં બોલવા ઉભો થયો તે પહેલા સભામાં હોબાળો થયો હતો. સભામાં તોડફોડ કરવામાં આવી હતી. ત્યારે પોલીસે વચ્ચે પડીને મામલો થાળે પાડ્યો હતો. હોબાળો કરનાર શખ્સોની અટકાયત કરી હતી.
મળતી માહિતી મુજબ આ સભામાં અલ્પેશ કથીરિયાના સમર્થકોએ હાર્દિકનો વિરોધ કર્યો હતો. જેમાં તેમણે અલ્પેશ કથીરિયાને છોડાવવાની માંગ કરી હતી. પરંતુ હાર્દિક દ્વારા ભાજપના લોકો અલ્પેશ કથીરિયાના પોસ્ટર લઇને આવ્યા હોવાનો આક્ષેપ કરવામાં આવ્યો છે.
જોકે પોલીસ દ્વારા કેટલાક લોકોની અટકાયત કરવામાં આવી છે. આ સભાનો સમય 10 વાગ્યા સુધીનો હોય છે ત્યારે આ સભા શરૂ થાય તે પહેલા જ આ પ્રકારની ઘટના બની હતી.
હાર્દિક પટેલે કહ્યું કે, વિરોધ કરવો હોય તેને છુટ છે પરંતુ મહેરબાની કરીને આ પ્રકારે નહીં. તમામ લોકોને વિરોધ કરવાનો અધિકાર છે. અમદાવાદમાં બહારથી લોકો વિરોધ કરવા આવે છે. ભાજપના લોકો ગેરમાર્ગે દોરે છે.
ભાજપના લોકો અલ્પેશ કથીરિયાના પોસ્ટર લઇને આવ્યા હતાઃ હાર્દિક
ઉલ્લેખનીય છે કે, શુક્રવારે સુરેન્દ્રનગરમાં હાર્દિકની સભામાં એક શખ્સે હુમલો કર્યો હતો. શખ્સે સ્ટેજ પર જઈને હાર્દિકને લાફો માર્યો હતો. આ ઘટના બાદ કાર્યકરોમાં રોષ જોવા મળ્યો હતો.
નિકોલમાં સભાને લઈ હાર્દિકે વ્યક્ત કરી હતી આશંકા
પોલીસ કમિશનરને પત્ર લખી આશંકા વ્યક્ત કરી હતી. હાર્દિકે પોલીસ સુરક્ષાની માગણી કરી હતી. અસામાજિક તત્વોના હુમલાને લઈ પત્ર લખ્યો હતો. જીવલેણ હુમલો થઈ શકે તેવો પત્રમાં ઉલ્લેખ કર્યો હતો.