અમદાવાદના જુહાપુરામાં કુખ્યાત નઝીર વોરા અને તેના પુત્ર પર ફાયરિંગની ઘટના સામે આવી, પ્રેમ લગ્નની અદાવતમાં ફાયરિંગ થઈ હોવાનું સામે આવ્યું
જુહાપુરામાં ફાયરિંગ મામલે ખુલાસો
પ્રેમ લગ્નની અદાવતમાં થયું ફાયરિંગ
પોલીસે સમગ્ર મામલે કાર્યવાહી હાથ ધરી
અમદાવાદના જુહાપુરામાં કુખ્યાત નઝીર વોરા અને તેના પુત્ર પર ફાયરિંગની ઘટના સામે આવી છે. પ્રેમલગ્નની અદાવતમાં ફાયરિંગ થઈ હોવાનું ખુલ્યું છે. વેજલપુર પોલીસે બન્ને પક્ષ વિરુદ્ધ ગુનો નોંધી આરોપીની ધરપકડ કરી છે.
જુહાપુરામાં ફાયરિંગ મામલે ખુલાસો
કુખ્યાત આરોપી નઝીર વોરા અને તેનો પુત્ર હમઝા જ્યારે બીજા પક્ષમાં આરોપી ફૈઝાન ઉર્ફે ટેબુ સૈયદ, મયુદ્દીન સૈયદ અને વાહીદ ઉર્ફે બાબા સૈયદ છે. પ્રેમ લગ્નના વિવાદમાં આ બન્ને પક્ષ વચ્ચે અદાવત ચાલે છે. સોમવારની રાત્રે ચૂંટણીનું મતદાન પૂર્ણ થયા બાદ સોનલ સિનેમા નજીક આરોપી વાહીદ સૈયદ અને હમઝા વોરા વચ્ચે આ અદાવતમાં બોલા ચાલી થઈ હતી બાદમાં આ ઝઘડો એટલો ઉગ્ર બન્યો કે કુખ્યાત આરોપી નઝીર વોરા તલવાર લઈને મારવા આવ્યો હતો અને ત્યારે આરોપી વાહીદ હથિયારથી ફાયરિંગ કર્યું હતું. આ ઘટનાને લઈને વેજલપુર પોલીસે બન્ને પક્ષની ફરિયાદ લઈને તપાસ શરૂ કરી છે
પ્રેમ લગ્નની અદાવતમાં થયું ફાયરિંગ
ફાયરિંગ કેસની તપાસમાં ખુલાસો થયો કે નઝીર વોરાની ભાણીએ સૈયદ પરિવારના યુવક સાથે પ્રેમ લગ્ન કર્યા હતા. નઝીર વોરાનો પુત્ર હમઝા સાથે આ યુવતીના લગ્ન નક્કી થયા હતા. પરંતુ યુવતીએ પ્રેમી સાથે લગ્ન કરી લેતા વોરા પરિવાર અને સૈયદ પરિવાર વચ્ચે છેલ્લા એક વર્ષથી તકરાર ચાલતી હતી. જેની અદાવતમાં બન્ને એકબીજા પર હુમલો કર્યો હતો. આ ઘટનાની વેજલપુર પોલીસે બન્નેની ફરિયાદ લઈને બન્ને પક્ષના 5 આરોપીની ધરપકડ કરીને ફાયરિંગ કરવામાં ઉપયોગ લીધેલ હથિયાર જપ્ત કર્યું છે
પોલીસે સમગ્ર મામલે કાર્યવાહી હાથ ધરી
કુખ્યાત આરોપી નઝીર વોરા વિરુદ્ધ 30થી વધુ ગુના નોંધાયા છે તેમજ પકડાયેલા અન્ય આરોપીઓ પણ ગુનાહિત ઇતિહાસ ધરાવે છે. હાલમાં વેજલપુર પોલીસે આરોપીઓની ધરપકડ કરીને તેઓને કોર્ટમાં રજૂ કરવાની કાર્યવાહી હાથ ધરી છે