એક તરફ સરકાર ગુજરાતમાં વેક્સિનનો પૂરતો જથ્થો લાવી શકતી નથી બીજી તરફ ખાનગી સંસ્થાને 1 હજાર રૂપિયાની ઊંચી કિંમતે રસીનું વેચાણ કરવાની મંજૂરી
મહામારીમાં પણ રસી અમીરોને જ મળશે
કોવિશીલ્ડ પ્રાઈવેટમાં 250માં મળતી હતી
હવે એ જ રસીના 1 હજાર શા માટે
ગુજરાતમાં જનતાને ગોળી પીવડાવવામાં સરકારને મહારત હોય તેવું લાગી રહ્યું છે. એક તરફ સરકાર ગુજરાતમાં વેક્સિનનો પૂરતો જથ્થો લાવી શકતી નથી. બીજી તરફ ખાનગી વેક્સિનેશનને મફતમાં ગ્રાઉન્ડ આપી ઊંચી કિંમતે વેક્સિનનું વેચાણ કરવાની મંજૂરી આપી રહી છે. આજથી GMDC ગ્રાઉન્ડ ખાતે એપોલો સંસ્થાએ 1 હજાર રૂપિયામાં વેક્સિનેશન કાર્યક્રમ ચાલુ કર્યો છે. અને આ માટે પહેલા એવું કહેવાયું હતું કે, AMC અને એપોલોનું સંયુકત PPP મોડલ હેઠળ આ કામગીરી થઈ રહી છે. પરંતુ પાછળથી AMC ફરી ગયું હતું.
શું છે સમગ્ર વિવાદમાં સળગતા સવાલો
સમગ્ર વિવાદમાં સૌ પ્રથમ સવાલ સરકાર પાસે પૂરતી વેક્સિનના ડોઝ નથી
બીજી તરફ ખાનગી હોસ્પિટલ ઊંચી કિંમતે વેક્સિનેશન કરી રહી છે
જે વેક્સિનની કિંમત 250 રૂપિયા છે તેના માટે 1 હજાર રૂપિયાની ખુલ્લી લૂંટ
આરોગ્ય અગ્ર સચિવે જયંતિ રવિએ બચાવ કરતા કહ્યું, આ કેન્દ્રની ગાઈડલાઈન હિસાબે છે
જો રૂપિયા હશે તો તમને વેક્સિન મળશે અને રૂપિયા નથી તો લાઈનમાં ઉભા રહો
સમગ્ર દેશમાં કેન્દ્રએ વેક્સિન માટે રજિસ્ટ્રેશન હટાવ્યું પરંતુ ગુજરાતમાં એ નિયમ લાગુ નહીં
લોકો રસી લેવા માગે છે પરંતુ રજિસ્ટ્રેશન અને મર્યાદિત ડોઝના કારણે વેક્સિન મળતી નથી
જો કોઈ પ્રાઈવેટ હોસ્પિટલ વેક્સિનનો જથ્થો લાવી શકતી હોય તો સરકાર પાસે પૂરતો જથ્થો કેમ નથી?
ખુદ નીતિન પટેલને સમગ્ર મામલે કશું ખબર નથી?
તો GMDC ગ્રાઉન્ડમાં અપોલો હોસ્પિટલના ડ્રાઈવ થ્રુ વેક્સિનેશનના વિવાદ અંગે નાયબ મુખ્યમંત્રી નીતિન પટેલે કંઈક અલગ જ નિવેદન આપ્યું છે. નીતિન પટેલ ખુદ આરોગ્ય વિભાગના મંત્રી છે. આમ છતાં તેમણે કહ્યું કે, ડ્રાઈવ થ્રૂ માટે રાજ્ય સરકારની મંજૂરી લેવાઈ છે કે નહીં, તે અંગે જાણ નથી. AMCના અધિકારીઓએ પોતે નિર્ણય લીધો છે.
આરોગ્ય વિભાગના અગ્ર સચિવ જયંતિ રવિનો ખુલાસો
AMCએ હાથ અદ્ધર કરી લેતા જયંતિ રવિએ કરી સ્પષ્ટતા. અમદાવાદમાં GMDC ખાતે એપોલો હોસ્પિટલ દ્વારા વેક્સિનેશનનો મામલે આરોગ્ય અગ્ર સચિવ જયંતિ રવિએ સ્પષ્ટતા કરી છે. અમદાવાદ મહાનગરમાં એપોલો હોસ્પિટલ દ્વારા કોરોના વેક્સિનેશન ચાર્જેબલ બેઝીઝ પર શરૂ કરવામાં આવ્યું છે. અને સરકારે ખાનગી હોસ્પિટલોને રસીકરણ આપવા મામલે મંજૂરી મુદ્દે સ્પષ્ટતા કરવી પડી રહી છે. પ્રેસનોટમાં જણાવ્યું કે, કોરોના સંક્રમણ નિયંત્રણ માટે અને રસીકરણનો વ્યાપ વધારવા ભારત સરકાર દ્વારા ખાનગી હોસ્પિટલોને પણ ચાર્જેબલ બેઝીઝ ઉપર રસીકરણની છૂટ આપી છે.
AMCનો જવાબ
GMDC ખાતે અપાતી વેક્સિન મુદ્દે અમદાવાદ મ્યુનિસિપલ કોર્પેરેશન દ્વારા પ્રતિક્રિયા આપવામાં આવી છે. સરકાર બાદ AMCએ પણ ખુલાસો કર્યો હતો. જેમાં જણાવવામાં આવ્યુ હતું કે GMDCમાં વેક્સિનેશન ખાનગી હોસ્પિટલનુ આયોજન છે. કેન્દ્ર સરકારના નીતિ પ્રમાણે આયોજન કરવામાં આવ્યું છે. આ એપોલો હોસ્પિટલમાં અપાતી વેક્સિકન GMDC ખાતે અપાઇ રહી છે. જેમાં એપોલો હોસ્પિટલ સાથે AMCની પાર્ટનરશીપ નથી. તેમજ 45થી ઉપરના લોકોમાં વેક્સિનેશન સંખ્યા હવે ઘટી છે.