જાહેરાત / શિક્ષણમંત્રીની જાહેરાત બાદ ગુજરાત યુનિ.નો પરિપત્ર, જાણો કઈ-કઈ પરીક્ષાઓ મોકૂફ

• ગુજરાત યુનિવર્સિટીએ તમામ પરીક્ષાઓ કરી મૌકૂફ
• શિક્ષણમંત્રીની જાહેરાત બાદ ગુજરાત યુનિવર્સિટીનો પરિપત્ર
• BA, BCoM, BSc, BBA, BCAની પરીક્ષા મૌકૂફ કરી

રાજ્યમાં કોરોનાના સંક્રમણને લઈ ગુજરાત યુનિવર્સિટીએ તમામ પરીક્ષાઓ મૌકૂફ કરી છે. શિક્ષણમંત્રીની જાહેરાત બાદ ગુજરાત યુનિવર્સિટીએ પણ પરિપત્ર બહાર પાડ્યો છે. જેમાં જણાવવામાં આવ્યું છે કે BA, BCoM, BSc, BBA, BCAની પરીક્ષા મૌકૂફ કરી છે. તેમજ BEd, MEd, MLW, BSc FIRE, BSc FADની પરીક્ષા પણ મૌકૂફ રાખવામાં આવી છે. તેમજ  આ સાથે ઈન્ટિગ્રેડેટ લૉની સેમેસ્ટર 4, 6 અને 8 ની પરીક્ષા પણ મૌકૂફ રાખવામાં આવી છે. કુલપતીએ તમામ સંલગ્ન કોલેજો માટે આ આદેશ જાહેર કર્યો છે.

કોરોનાનું સંક્રમણ વધતા શાળા-કોલેજોમાં હાજર રહેવા પર વિદ્યાર્થીઓમાં અસમંજસ હતા. ત્યારે શાળા-કોલેજોને લઇને સરકાર દ્વારા મહત્વનો નિર્ણય લેવાયો છે. 8 મનપામાં શાળા-કોલેજોમાં તમામ ધોરણના વિદ્યાર્થીઓને ઓનલાઇન ભણાવાશે. 8 મનપાની શાળા-કોલેજોમાં આવતીકાલથી 10 એપ્રિલ સુધી ઓફલાઇન શિક્ષણ બંધ કરવાનો આદેશ અપાયો છે.

મનપાની શાળા-કોલેજોમાં પરીક્ષાઓ ઓનલાઇન આપી શકાશે. જ્યારે અન્ય જિલ્લાઓમાં વિદ્યાર્થીઓ સ્વૈચ્છિક શાળાએ જઇ શકશે. કોરોના વકરતાં સરકાર અને અધિકારીઓની બેઠકમાં વિચાર પર ચર્ચા બાદ આ નિર્ણય લેવાયો છે. શિક્ષણમંત્રીએ કરેલી જાહેરાત અંગે વિગતે જાણો...

શિક્ષણમંત્રી ભુપેન્દ્રસિંહ ચુડાસમાએ કહ્યું કે, રાજ્યમાં વધતા જતા સંક્રમણની ચિંતા કરીને શિક્ષણ અંગે નિર્ણય લેવાયો છે. આજે મુખ્યમંત્રીની અધ્યક્ષતામાં બન્ને શિક્ષણ મંત્રીઓ, સચિવ, મુખ્ય સચીવ સહિતના ઉચ્ચ અધિકારીઓની મિટિંગમાં શિક્ષણ કાર્ય અંગે મહત્વના નિર્ણય લેવામાં આવ્યા છે.

યુનિવર્સિટીની પરીક્ષાનો કાર્યક્રમ મોકૂફઃ શિક્ષણમંત્રી

ભુપેન્દ્રસિંહે જણાવ્યું કે, કોલેજ અને યુનિવર્સિટીઓ માટે આવતીકાલથી 10 એપ્રિલ સુધી નિર્ધારિત સ્નાતક કક્ષાનો ઓફલાઇન પરીક્ષાનો કાર્યક્રમ મોકૂફ રાખવામાં આવ્યો છે. આ માટે યુનિવર્સિટી નવેસરથી સમય પત્રક જાહેર કરશે. યુનિવર્સિટીની આજથી પરીક્ષાઓ શરૂ થઈ હતી ત્યારે હવે હાલ પૂરતી પરીક્ષાઓ મોકૂફ રખાઈ છે.