ક્રિસ ગેલ T 20નો બોસ એમ જ નથી કહેવાતો. તેમણે પોતાની મહેનતથી આ સ્થાન હાંસલ કર્યું છે. આંકડાઓની વાત કરીએ તો ક્રિકેટના સૌથી નાના ફોરમેટમાં ગેલ જેવું કોઈ નથી.
સિંહને ભૂખ્યો રાખવો ખૂબ જરૂરી હોય છે : કે. એલ. રાહુલ
આઇપીએલ-૨૦૨૦ના ૩૧મા મુકાબલામાં કિંગ્સ ઈલેવન પંજાબનાે વિસ્ફોટક બેટ્સમેન ક્રિસ ગેલ ગઈ કાલે પહેલી વાર મેદાનમાં ઊતર્યો. પ્રથમ મેચમાં જ તેણે એવી વિસ્ફોટક બેટિંગ કરી કે કિંગ્સ ઈલેવન પંજાબના સતત પરાજયનો સિલસિલો થંભી ગયો. ગેલે અર્ધસદી ફટકારી અને ટીમને જીતની એકદમ નજીક લાવી દીધી. અંતિમ બોલ સુધી પહોંચેલી મેચમાં આખરે પંજાબે વિરાટ ટીમને આઠ વિકેટે પરાજય આપ્યો.
મેચ જીતી લીધી બાદ પંજાબના કેપ્ટન કે. એલ. રાહુલે ક્રિસ ગેલ અંગે વાત કરતાં કહ્યું, ''છેલ્લાં થોડાં સપ્તાહથી તેની તબિયત સારી નહોતી. તે ૪૧ વર્ષની ઉંમરે પણ ભૂખ્યો છે. એ તો પ્રથમ દિવસથી જ રમવા માટે તૈયાર હતો. ગેલ એક સિંહ જેવો છે. સિંહને ભૂખ્યો રાખવો ખૂબ જરૂરી હોય છે, કારણ કે ત્યાર પછી જ્યારે પણ એ બેટિંગ કરે છે એ હંમેશાં ખતરનાક બની જાય છે.''
ક્રિસ ગેલે ગઈ કાલે આરસીબી સામે માત્ર ૨૯ બોલમાં અર્ધસદી ફટકારી દીધી. આ ઇનિંગ્સ દરમિયાન ક્રિસ ગેલે આઇપીએલમાં ૪૫૦૦ રન પણ પૂરા કરી લીધા. ક્રિસ ગેલે આ ઉપરાંત એક ખાસ રેકોર્ડ પણ પોતાના નામે નોંધાવી દીધો. ગેલ આઇપીએલના ઇતિહાસમાં એકમાત્ર એવો બેટ્સમેન છે, જેણે પોતાની ૨૭ આઇપીએલ ઇનિંગ્સમાં પાંચ કે વધુ છગ્ગા ફટકાર્યા છે. જ્યારે ટી-૨૦ ક્રિકેટમાં માત્ર બાઉન્ડ્રી વડે ૧૦,૦૦૦ રન બનાવનારો ક્રિસ ગેલ દુનિયાનો એકમાત્ર ક્રિકેટર છે, જેમાં ૧૦૨૭ ચોગ્ગા અને ૯૮૨ છગ્ગાનો સમાવેશ થાય છ.