દિલ્હી હાઈકોર્ટે એક ઐતિહાસિક ચુકાદામાં 26 વર્ષની પરણિત મહિલાને 33 અઠવાડિયાની ગર્ભાવસ્થા ખતમ કરવાની મંજૂરી આપી છે.
દિલ્હી હાઈકોર્ટનો મોટો ચુકાદો
26 વર્ષની પરણિતાને 8 મહિનાના ગર્ભપાતની આપી મંજૂરી
ગર્ભમાં રહેલા બાળકમાં અનેક ખામીઓ
કોર્ટે માતાના નિર્ણયને સર્વોપરી ગણાવ્યો
દિલ્હી હાઈકોર્ટે 26 વર્ષની પરિણીત મહિલાની 33 અઠવાડિયાની પ્રેગનન્સી ખતમ કરવાની મંજૂરી આપી દીધી છે. કોર્ટે ડોક્ટરોની સલાહના આધારે આ મંજૂરી આપી છે. આ દરમિયાન કોર્ટે કહ્યું કે, આ કેસમાં માતાનો નિર્ણય સર્વોપરી રહેશે. અરજદાર મહિલાએ પોતાના 33 અઠવાડિયાના ગર્ભને દૂર કરવાની મંજૂરી માંગી હતી. પરણિતાએ તેની અરજીમાં કહ્યું હતું કે તેણે અનેક સોનોગ્રાફી ટેસ્ટ કરાવ્યાં હતા જેમાં બાળકને અનેક ખામીઓ હોવાનું સામે આવ્યું હતું. મહિલાની અરજીને મંજૂર રાખીને કોર્ટે તેને ગર્ભપાતની મંજૂરી આપી હતી. જોકે દિલ્હી હાઈકોર્ટના આદેશ બાદ લોક નાયક જયપ્રકાશ નારાયણ હોસ્પિટલના ડોક્ટરોની કમિટીએ કહ્યું હતું કે ગર્ભને દૂર કરવો યોગ્ય નથી, ત્યારબાદ હાઈકોર્ટે કેટલાક ડોક્ટરો સાથે વાત કર્યા બાદ ગર્ભને હટાવવાનો આદેશ આપ્યો હતો.
ઉછરી રહેલા બાળકોમાં અનેક ખામીઓ સામે આવી
12 નવેમ્બરના રોજ અલ્ટ્રાસાઉન્ડ તપાસમાં બહાર આવ્યું છે કે મહિલાના ગર્ભમાં રહેલા ગર્ભને સેરેબ્રલ ડિસઓર્ડર હતો. અલ્ટ્રાસાઉન્ડ પરીક્ષણની પુષ્ટિ કરવા માટે અરજદાર મહિલાએ 14 નવેમ્બરના રોજ ખાનગી અલ્ટ્રાસાઉન્ડ તપાસ કરાવી હતી. ગર્ભમાં સેરેબ્રલ ડિસઓર્ડર પણ મળી આવ્યો હતો. અરજદાર તરફથી હાજર રહેલા વકીલે બોમ્બે હાઈકોર્ટ અને કલકત્તા હાઈકોર્ટના ચુકાદાને ટાંકીને કહ્યું હતું કે એમટીપી એક્ટની કલમ 3(2) (બી) અને 3 (2) (ડી) હેઠળ ગર્ભને દૂર કરવાની મંજૂરી આપી શકાય છે.
24 અઠવાડિયાથી વધુ ગર્ભની ગર્ભપાતની મંજૂરી નથી
જસ્ટિસ પ્રતીભા એમ સિંહે કહ્યું કે હું આ વિષય પર કોઈ દૃષ્ટિકોણ નથી લઈ રહી પરંતુ હું માત્ર એટલું જ કહી રહી છું કે આપણે એક એવો સમાજ જોઈ રહ્યા છીએ જેને ફક્ત તંદુરસ્ત બાળકોની જરૂર છે. જીટીબી હોસ્પિટલે ગર્ભપાત કરવાનો એ આધાર પર ઈનકાર કરી દીધો હતો કે તેમાં ન્યાયિક હસ્તક્ષેપની જરૂર છે કારણ કે અરજદારનો ગર્ભાધાનનો સમયગાળો (ગર્ભપાત માટે) માન્ય મર્યાદાથી વધુ હતો અને માન્ય મર્યાદા 24 અઠવાડિયાની હતી.