ભારતીય સોશ્યલ મીડિયા પ્લેટફોર્મ ચિંગારીને AngelList, LogX Ventures, iSeed, Village Global વગેરે જેવી કંપનીઓ પાસેથી 1.3 મિલિયન ડોલર જેટલું 9 કરોડ 74 લાખ રૂપિયા જેટલું સીડ ફંડિંગ મેળવ્યું છે. આ પ્લેટફોર્મની પોપ્યુલારિટી સરકારના ટિકટોક સહિતની 59 એપ્સ બેન કર્યાના નિર્ણય પછી ખૂબ વધી ગઈ છે.
કંપનીનું કહેવું છે કે તેઓ આ ફંડનો ઉપયોગ સ્ટાફને હાયર કરવા, પ્રોડક્ટ ડેવલપમેન્ટ માટે અને તેમના પ્લેટફોર્મનું યુઝર્સ સાથેનું એન્ગેજમેન્ટ સુધારવા માટે કરવા માંગે છે.
નોંધનીય છે કે આ કંપનીએ ભારત સરકારની આત્મ નિર્ભર ઇનોવેશન એપ ચેલેન્જ જીતી હતી. જેમાં તેમને 20 લાખ રૂપિયા ઇનામ મળ્યું છે. તેમણે આ ચેલેન્જ જીત્યાના બે દિવસ બાદ તેમને મળેલા આ ફંડિંગની જાહેરાત કરી હતી. કંપનીના જણાવ્યા અનુસાર અત્યારે આ એપને 2.5 કરોડથી વધુ વખત ડાઉનલોડ કરવામાં આવી છે અને તેના દરરોજ 30 લાખ એક્ટિવ યુઝર્સ છે. તેઓ અત્યારે તેમના એડવર્ટાઈઝમેન્ટનું 30% કમિશન તેમના કન્ટેન્ટ ક્રિએટર્સને આપે છે.
નોંધનીય છે કે ચિંગારી જેવી જ ભારતીય મિત્રોં એપે હમણાં 2 કરોડનું ફંડિંગ મેળવ્યું હતું. અહેવાલો પ્રમાણે ભારતીય પ્લેટફોર્મ શેરચેટ અત્યારે માઈક્રોસોફ્ટ પાસેથી 100 મિલિયન ડોલરનું ઇન્વેસ્ટમેન્ટ લેવાની યોજના ધરાવે છે.
ભારત સરકારે 59 ચાઈનિઝ એપ્સ ઉપર પ્રતિબંધ મૂકી દેતા આ ખાલી પડેલી જગ્યા ભરવા માટે ભારતીય ડેવલપર્સ એડી ચોટીનું જોર લગાવીને તકનો લાભ લઇ રહ્યા છે.