આક્રોષ / ચીનની કરતૂતથી સુરતીઓ રોષે ભરાયા, ગેલેરીમાંથી ચાઇનાનું ટીવી ફેંકી કર્યો વિરોધ

• વરાછા વિસ્તારમાં ચાઈનામાં બનેલી સામગ્રીનો અનોખો વિરોધ
• વરાછા વિસ્તારમાં આવેલ પંચરત્ન ગાર્ડનના રહીશોના દેખાવો
• ચાઈનામાં બનેલા ટીવી ફોડીને સ્થાનિકોએ વિરોધ નોંધાવ્યો

ભારત-ચીનની બોર્ડર પર સોમવારે રાત્રે બંને સૈન્ય વચ્ચે થયેલી હિંસક અથડામણમાં ભારતના કમાન્ડિંગ ઓફિસર સહિત 20 સૈનિક શહીદ થયા છે ત્યારે સુરતના વરાછા વિસ્તારમાં ચાઈનામાં બનેલી સામગ્રીનો અનોખો વિરોધ કરવામાં આવ્યો છે. વરાછા વિસ્તારમાં આવેલ પંચરત્ન ગાર્ડનના સ્થાનિકોએ દેખાવો કર્યા હતા. મોટી સંખ્યામાં લોકો દ્વારા ચીનનો વિરોધ કરવામાં આવ્યો હતો. ચાઈનામાં બનેલા ટીવી ફોડીને સ્થાનિકોએ વિરોધ નોંધાવ્યો છે. એક પરિવારે પોતાના ઘરની ગેલેરીમાંથી ચાઇના કંપનીના ટીવીને ઉપરથી નીચે ફેંકી દીધું હતું. સ્થાનિકોએ એક બોર્ડ પર લખ્યું કે 'ચાઇનાની દરેક વસ્તુઓનો બહિષ્કાર કરો. ભારતીય વીર શહીદ જવાનોને શ્રદ્ધાજલિ.' 

કોઈપણ નાગરિકે ચાઇનાની સામગ્રીનો ઉપયોગ ન કરવાની અપીલ કરી તેમજ વસ્તુ ખરીદતા પહેલા ચાઇનાની છે કે નહીં તે તપાસ અપીલ કરવામાં આવી છે. શહીદ થયેલા જવાનોને મીણબત્તી કરીને શ્રદ્ધાંજલિ પણ પાઠવી છે. ચાઇનાના વિરોધમાં લોકોએ જાહેરમાં ઉચ્ચારો કર્યા હતાં.

તાજેતરમાં બનેલી ભારત-ચીન હિંસક અથડામણ બાદ સુરતના વરાછામાં ટીવી ફોડીને ચીનનો વિરોધ કરવામાં આવ્યો હતો. આ સાથે જ શહીદ જવાનોને શ્રદ્ધાંજલિ અપાઈ હતી. સાથે ચીનની પ્રોડકટ ન વાપરવા લોકોને પણ અપીલ કરાઈ હતી#surat #IndiaChinaFaceOff #IndiaChinaStandoff pic.twitter.com/RgunoaHGCf

— VTV Gujarati News and Beyond (@VtvGujarati) June 17, 2020

સુરતના લોકોએ ચીન પ્રત્યે રોષ વ્યક્ત કરતા શહાદતનો જડબાતોડ જવાબ આપતા જણાવ્યું છે. લોકો ચીનને પાઠ ભણાવવા માટે તેમની વસ્તુનો સંપુર્ણ રીતે બહિષ્કાર કરવા પણ અનુરોધ કર્યો છે. 

તો આ તરફ ચીન પ્રત્યે રાજકોટવાસીઓમાં પણ રોષ જોવા મળી રહ્યો છે. અને ચીનની તમામ વસ્તુઓનો બહિષ્કાર કરવા માંગ કરવામાં આવી છે. યુવાનોએ કહ્યું કે સરકારે ચીનને જડબાતોડ જવાબ આપવો જોઇએ. 

તો સુરેન્દ્રનગરના લીંબડી ગ્રીનચોક ખાતે યુવાનો દ્વારા ચીનનો ધ્વજ સળગાવીને વિરોધ કર્યો છે. ભારત અને ચીન વચ્ચે ચાલી રહેલી હિંસક અથડામણ મામલે સૂત્રોચ્ચાર કરી વિરોધ કર્યો છે. ચાઈના મુર્દાબાદના નારાઓ પણ લગાવીને બહિષ્કાર કરવામાં આવ્યો છે. 

તો આ તરફ ચીન વિરૂદ્ધ અમદાવાદના યુવાનોમાં રોષ જોવા મળી રહ્યો છે. રાજપૂત યુવા સંગઠને ચીન વિરૂદ્ધ સૂત્રોચ્ચાર કર્યા છે. ચીનને તેની જ ભાષામાં જવાબ આપવા યુવાનો માંગ કરી રહ્યાં છે. ઈંટનો જવાબ પથ્થરથી આપવા યુવાનો માંગ કરી રહ્યાં છે.