BIG NEWS / હવે શું નવું થવાનું છે? ચીનની સરકારના આ આદેશ બાદ જરૂરી ચીજો ભરવા ભયંકર પડાપડી, લોકોને યુદ્ધની પણ આશંકા

• નાગરિકોને ચીનનું નવું ફરમાન
• `જરૂરી ચીજોનો સ્ટોક કરી રાખો'
• સુપર માર્કેટમાં ઉમટી ભીડ
• મોંઘવારીનું બતાવે છે બહાનું
• તાઈવાન સાથે તંગદિલી મુખ્ય કારણ

ચીનમાં મચી ગઈ અફરાતફરી 
શું આગામી દિવસોમાં ચીન અને તાઈવાન વચ્ચે યુદ્ધ થઈ શકે છે? આ સવાલ ચીનની તૈયારીઓને જોઈને હરેકના મનમાં ઉઠી રહ્યો છે. કેમ કે, ચીનની કમ્યુનિસ્ટ સરકારે પોતાના નાગરિકોને દૈનિક વપરાશી ચીજવસ્તુઓનો સ્ટોક કરી લેવાનું ફરમાન કરી દીધું છે. આ ફરમાન બાદ ચીનમાં રાશન, નમક, ખાંડ, કેરોસીન જેવી ચીજવસ્તુ ખરીદી કરવા માટે માર્કેટમાં લોકોનો ધસારો એકાએક વધી ગયો છે. યુવાનો, મહિલાઓ અને વૃદ્ધો સુપરમાર્કેટમાં ખરીદી માટે ધસી ગયા છે. તો સ્થાનિક મીડિયાએ બિસ્કિટ, ઈન્સ્ટન્ટ નૂડલ્સ, વિટામિન, રેડિયો અને ફ્લેશલાઈટ સહિતની ચીજવસ્તુઓનો સ્ટોક કરવા માટેની યાદી પ્રકાશિત કરી દીધી છે. અને લોકોમાં દૈનિક વપરાશની વસ્તુ ખરીદવા ભાગદોડ મચી છે, જેના કારણે ચીનના અનેક વિસ્તારોમાં દૈનિક વપરાશની ચીજવસ્તુઓની અછત ઊભી થઈ ગઈ છે. અનેક રાજ્યોમાં વહીવટીતંત્રએ પુરવઠો જાળવી રાખવા અને કિંમતો પર અંકુશ મૂકવા જહેમત કરવી પડી છે

યુદ્ધને લઈને લોકોના મનમાં આશંકા 
આપને જણાવી દઈએ કે, છેલ્લાં ઘણા સમયથી ચીન અને તાઈવાન વચ્ચે તંગદિલી પ્રવર્તી રહી છે. જેમા તાજેતરમાં સ્થિતિ વધારે વણસી છે. ચીન વારંવાર તાઈવાનને ધમકી આપતું રહે છે, ચીની વાયુસેનાના વિમાન અવારનવાર તાઈવાનના હવાઈક્ષેત્રમાં ઘૂસણખોરી કરતા રહે છે. શિ જિનપિંગ ગયા મહિને તાઈવાનને ચીનમાં ભેળવવાની વાત કરી ચૂક્યા છે, જેના વિરુદ્ધમાં તાઈવાની રાષ્ટ્રપતિ ત્સાઈ વેંગે ભયાનક પરિણામની ધમકી ઉચ્ચારી હતી. આ સ્થિતિમાં જો ચીન તાઈવાન પર કોઈ પગલું ભરે તો વિશ્વયુદ્ધ થઈ શકે છે તેવા સમયે લોકોને જરૂરી સામાનનો સ્ટોક કરી લેવાનું ચીનનું ફરમાનથી અનેક આશંકાઓ ઊભી થઈ રહી છે. ચીનના વાણિજ્ય મંત્રાલયે નાગરિકોને કટોકટીની સ્થિતિમાં જરૂરી ચીજવસ્તુઓનો સ્ટોક કરી લેવાનો આદેશ આપ્યો છે. 

જો કે, ચીન સરકારનું કહેવું છે કે, કોવિડ-19 મહામારી અને અસામાન્ય રીતે ભારે વરસાદના કારણે શાકભાજીઓ અને બીજા ઉત્પાદનોની કિંમતમાં વધારો થવાની સંભાવના છે આ માટે લોકોને સ્ટોક કરી લેવાનું કહેવાયું છે. પરંતુ ચાઈનિઝ લોકો આ વાત સ્વીકારવા તૈયાર નથી. લોકો સરકારના નવા ફરમાનને તાઈવાન સાથેની તંગદિલીમાં સાવધાની રૂપે જોઈ રહ્યા છે.