ભારત અને ચીન વચ્ચે સીમા પર તણાવ વચ્ચે દેશમાં આર્થિક રીતે ચીનનો બહિષ્કાર કરવાનું જનઆંદોલન ચાલી રહ્યું છે. સરકારે પણ આર્થિક ક્ષેત્રે ચીનને ઝટકો આપવાનું મન બનાવી લીધું છે ત્યારે હવે ટેલિકોમ સેકટરમાં ફરીવાર ચીનને નુકસાન થઇ શકે છે. વાઈફાઈ અને 4Gના વિકાસ માટેના ટેન્ડરમાં સરકાર ચીની સાધનો પર રોક લગાવી શકે છે.
મેક ઇન ઈન્ડિયા પર બળ અપાશે ભારત સરકાર
ટેન્ડરની પ્રક્રિયાના નિયમોમાં ફેરફાર કરવા પર વિચારણા
સંગઠનો દ્વારા પણ કરવામાં આવી છે માંગ
ચીની એપ્સ પ્રતિબંધ બાદ હવે સરકાર 4G અને વાઈફાઈ નેટવર્કના વિસ્તારમાં માત્ર ભારતીય ઉપકરણ વાપરવા પર નિર્ણય લઇ શકે છે. ટેલિકોમ ક્ષેત્રમાં ચીનથી આયાત કરવામાં આવતા સાધનો પર નિયંત્રણ મૂકવા પર સરકાર ગંભીરતાથી વિચાર કરી રહી છે. દેશના ઔદ્યોગિક સંગઠનોએ પણ સરકાર સામે નવી જોગવાઈ લાગુ કરવા કહ્યું છે.
નોંધનીય છે કે હાલમાં સરકારે સોલાર વીજળી માટે ચીની સાધનોની આયાત પર સંપૂર્ણપણે પ્રતિબંધ લગાવ્યો હતો. ટેલિકોમ સેક્ટરમાં ચીની ઉપકરણ વાપરવાથી ડેટા સુરક્ષા અને સાઈબર સુરક્ષાને લઈને આશંકાઓ ઉભી થાય છે.
મીડિયા અહેવાલ અનુસાર 4G અને વાઈફાઈથી જોડાયેલા ટેન્ડરમાં બે પ્રકારના માનકો પર વિચાર કરવામાં આવી રહ્યું છે. આ ટેન્ડરમાં 70 ટકા કામ તે જ કંપનીઓને આપી શકાય છે જેના સાધનો મેક ઇન ઇન્ડિયાનાં જ હોય. આમ જો કોઈ વિદેશી કંપની ભારતમાં જ યુનિટ લગાવીને સાધનો અસેમ્બલ કરશે તો તેને મેક ઇન ઇન્ડિયા માનવામાં આવશે. આ સિવાય 30 ટકા કામ તે કંપનીઓ માટે આરક્ષિત કરી દેવામાં આવશે જે સાધનો સંપૂર્ણપણે ભારતમાં જ ડીઝાઈન થયા હોય અને ભારતમાં જ તેનું નિર્માણ થયું હોય.
થોડા દિવસ પહેલા જ BSNL દ્વારા નિર્ણય લેવામાં આવ્યો હતો કે તે ચીની સાધનોનો ઉપયોગ નહીં કરે. નોંધનીય છે કે ભારતમાં ZTE, સિસ્કો, હુઆવે જેવી વિદેશી કંપનીઓ ટેલિકોમમાં પ્રભુત્વ ધરાવે છે.
ઔદ્યોગિક સંગઠન પીએચડી ચેમ્બરના ટેલિકોમ કમિટીના ચેરમેન સંદીપ અગ્રવાલે જણાવ્યું કે સંગઠન દ્વારા વાઈફાઈ, રાઉટર અને 4Gથી જોડાયેલા ચીની સાધનોની આયાત પર પ્રતિબંધ મૂકવા માટે માંગ કરવામાં આવી છે અને સરકારે આ મુદ્દે સાકારાત્મક નિર્ણય લેવાનો વિશ્વાસ વ્યક્ત કર્યો છે.