પ્રધાનમંત્રી નરેન્દ્ર મોદીએ આજે લેહની મુલાકાત લઈ વિશ્વને એક સંદેશ આપ્યો હતો. ચીનનું નામ લીધા વીના તેની વિસ્તારવાદી નીતિ પર પ્રહાર કર્યા હતા. ત્યારે પ્રધાનમંત્રીના આ જ નિવેદન પર ચીનની પ્રથમ પ્રતિક્રિયા સામે આવી છે.
PM મોદીના નિવેદન પર ચીનની પહેલી પ્રતિક્રિયા
ચીનના દૂતાવાસે આપી પ્રતિક્રિયા
ચીનની નીતિને વિસ્તારવાદી કહેવું નિરાધાર છે
ચીની દૂતાવાસના પ્રવક્તાએ કહ્યું કે ચીનને વિસ્તારવાદી કહેવું તે આધાર વગરનું(પાયા વિહોણું) છે. ચીને તેના પડોશીઓ સાથે વિવાદનું સમાધાન કર્યું છે. 14માંથી 12 પડોશી દેશો સાથે વિવાદનો અંત લાવ્યો છે.
શું કહ્યું હતું પ્રધાનમંત્રી મોદી ?
ઉલ્લેખનીય છે કે, ભારતીય જવાનોને સંબોધન કરતા પ્રધાનમંત્રી મોદીએ કહ્યું કે, વિસ્તારવાદનો યુગ પૂર્ણ થયો છે. હવે વિકાસવાદનો સમય આવ્યો છે. ઝડપથી બદલાતા સમયમાં વિકાસવાદ જ પ્રાસંગિક છે. વિકાસવાદ માટે અવસર છે અને વિકાસવાદ જ ભવિષ્યનો આધાર છે.
આજે લદ્દાખની મુલાકાતે પહોંચ્યા હતા પ્રધાનમંત્રી મોદી
ઉલ્લેખનીય છે કે, પ્રધાનમંત્રી નરેન્દ્ર મોદી ચીનને કડક સંદેશ આપવા માટે નીમૂ આર્મી કેમ્પ પહોંચી ગયા હતા. PM નરેન્દ્ર મોદી ભારતીય સેનાના જવાનોની હિંમત વધારવા પહોંચી ગયા હતા અને તેમણે ચીનને કડક ભાષામાં સંદેશ આપ્યો છે.
11,000 ફૂટની ઉંચાઈ પર જવાનોને PM મોદીએ કર્યું સંબોધન
11,000 ફૂટની ઉંચાઈ પર જવાનોને સંબોધતા પ્રધાનમંત્રીએ કહ્યું કે, ચીન વિસ્તારવાદી નીતિ બંધ કરે. સમગ્ર વિશ્વમાં હવે વિસ્તારવાદ ખતમ થયો છે તમામ દેશ હવે વિકાસવાદમાં રસ દાખવી રહ્યું છે.
કોઈપણ દેશને વિસ્તારવાદની જીદ હશે તો વિશ્વમાં કોઈ દિવસ શાંતિ સ્થપાશે નહીં અને ઈતિહાસ સાક્ષી છે કે આ પ્રકારની તાકાતનો કાયમ વિનાશ થયો છે. મોદીની આ મુલાકાતથી ચીનના પેટમાં બળશે તે નક્કી છે. પરંતુ ભારતીય જવાનો માટે આ ક્ષણ સૌથી મહત્વની માનવામાં આવી રહી છે કે યુદ્ધ જેવા માહોલમાં દેશના પ્રધાનમંત્રી તેમની સાથે સમય પસાર કરીને તેમને હિંમત આપી હતી.
લેહમાં PM મોદીએ ઘાયલ જવાનોની લીધી મુલાકાત
ગલવાન ઘાટીમાં ભારત અને ચીની સેના વચ્ચે થયેલી અથડામણમાં ભારતના 20 જવાન શહીદ થયા હતા. જ્યારે કેટલાક જવાનો આ અથડામણમાં ઘાયલ થયાં હતા. ત્યારે પ્રધાનમંત્રી મોદીએ ઘાયલ જવાનો સાથે મુલાકાત કરી હતી. PM મોદીએ હોસ્પિટલની મુલાકાત લઈ જવાનોની હિંમત વધારી હતી. જવાનો સાથે વાતચીત કરતા PMએ કહ્યું કે, આખુ વિશ્વ તમારા પરાક્રમથી વાકેફ છે. એ માતાઓને નમન જેમણે તમને જન્મ આપ્યો છે. હું વીર જવાનોની માતાઓને માથુ ઝૂકાવીને વંદન કરું છું.