સાયબર વૉર / જમીન અને સમુદ્રમાં યુદ્ધ માટે ઉકસાવનારુ ચીન હવે ભારતમાં કરી રહ્યું છે આ ખતરનાક યુદ્ધ

• ધૂર્ત દેશ હવે હરીફ દેશને પછાડવા માટે સાયબર યુદ્ધ છેડી રહ્યા છે
• ચીની હેકિંગ ગ્રૂપ એપીટીએ ભારત બાયોટેક અને સીરમની સિસ્ટમમાં ઘૂસણખોરી કરી
• એન્ટી હેકિંગ સિસ્ટમ આપણે વિકસાવવી જ પડશે

ચીન પહેલેથી જ ભારતને પોતાનું સૌથી શક્તિશાળી પ્રતિદ્વંદી માનતું આવ્યું છે. આથી જ કોઈ પણ ભોગે તે ભારતને નબળું પાડવાની ફિરાકમાં જ હોય છે અને તેના માટે તે એડીચોટીનું જોર પણ લગાવી રહ્યું છે. વિદેશી બાબતોના નિષ્ણાતોનું કહેવું છે કે, ભારત અને ચીન વચ્ચે હવે ભલે કદાચ સીધું યુદ્ધ શક્ય ન હોય, પરંતુ શીત યુદ્ધની આ ‘ગરમી’ યુદ્ધનો માહોલ જરૂર ઊભો કરી શકે છે. ભારત હવે એક મોટી આર્થિક શક્તિ અને રણનૈતિક શક્તિના રૂપમાં ઊભરી ચૂક્યું છે. આ કારણે જ ચીને લદ્દાખમાં પોતાના સૈનિકોને ફિંગર-૮ સુધી પરત લઈ જવા મજબૂર થવું પડ્યું છે. ગલવાન ઘાટીમાં થયેલી અથડામણમાં પણ પોતાના સૈનિકો માર્યા ગયા હોવાની હકીકત ચીને આખરે સ્વીકારવી પડી છે.

ધૂર્ત દેશ હવે હરીફ દેશને પછાડવા માટે સાયબર યુદ્ધ છેડી રહ્યા છે

આજની દુનિયામાં યુદ્ધનું સ્વરૂપ સાવ બદલાઈ ગયું છે. હવે યુદ્ધ ફક્ત મેદાનમાં કે આકાશમાં જ નથી લડાતું પણ હવે ધૂર્ત દેશ તેના હરીફ દેશને પછાડવા માટે ઈન્ટરનેટ અને કમ્પ્યૂટરની જાળ બિછાવીને સાયબર યુદ્ધ છેડી રહ્યા છે. આ યુદ્ધમાં ખંધુ ચીન પહેલેથી જ ભારે હોશિયાર છે. અમેરિકાની સાયબર સ્પેસ કંપની રેકોર્ડેડ ફ્યુચરના રિપોર્ટથી કોઈ નવાઈ લાગી નથી કે આશ્ચર્ય પણ થયું નથી. રિપોર્ટમાં એવી આશંકા વ્યક્ત કરવામાં આવી છે કે, ચીનના એક સાયબર ગ્રૂપ રેડ ઈકોએ ભારતની આર્થિક રાજધાની મુંબઈમાં વીજ પુરવઠો ખોરવવાનું ષડ્યંત્ર રચ્યું હતું. અમેરિકી કંપની એ ભલે કોઈ ઠોસ પુરાવા રજૂ નથી કર્યા પણ ચીનની બદમાશીનો ઈતિહાસ જોતાં તેણે આવી હરકત કરી જ હશે એમાં કોઈ શંકા નથી.

કોરોના બાદ પણ ચીન સુધરવાનું નામ નથી લેતું

પાવર ગ્રિડનું સંચાલન હવે મોટાભાગે સાયબર આધારિત જ થઈ ચૂક્યું છે. જે ઈન્ટરનેટ પ્રોગ્રામ દ્વારા પાવર ગ્રિડનું સંચાલન કરવામાં આવે છે તેમાં જો કોઈ દેશના હેકર્સ ઘૂસણખોરી કરી લે તો તેઓ આખા દેશની વીજ વ્યવસ્થાને ઠપ કરી શકે છે. દુનિયાભરમાં ઘાતક કોરોના વાઈરસ ફેલાવવાના ગંભીર આરોપો બાદ પણ ચીન સુધરવાનું નામ લેતું નથી. હવે તો બધા જાણે છે કે ચીન તેના દુશ્મનોને સબક શીખવવા કોઈ પણ હદે જઈ શકે છે, પછી ભલે તે કાયદેસર હોય કે ગેરકાયદે. 

ચીની હેકિંગ ગ્રૂપ એપીટીએ ભારત બાયોટેક અને સીરમની સિસ્ટમમાં ઘૂસણખોરી કરી

આટલું ઓછું હોય એમ તાજેતરમાં જ પ્રખ્યાત સાયબર ઈન્ટેલિજન્સ ફર્મ સાયફાર્માના હવાલાથી જારી થયેલા રિપોર્ટમાં એવો ચોંકાવનારો દાવો કરવામાં આવ્યો છે કે, ભારતમાં કોરોનાની વેક્સિન બનાવનારી બં કંપની સીરમ ઈન્સ્ટિટ્યુટ ઓફ ઈન્ડિયા (એસઆઈઆઈ) અને ભારત બાયોટેકને ચીની હેકર્સે નિશાન બનાવી હતી. સાયફાર્માના જણાવ્યા અનુસાર, ચીની હેકિંગ ગ્રૂપ એપીટી (એપ્ટ)-૧૦એ ભારત બાયોટેક અને સીરમ ઈન્સ્ટિટ્યુટના આઈટી ઈન્ફ્રાસ્ટ્રક્ચરની ખામીઓનો ફાયદો ઉઠાવીને તેની સિસ્ટમમાં ઘૂસણખોરી કરી હતી. સાયબર એટેક પાછળ ચીનનો મુખ્ય ઉદ્દેશ ભારતની બૌદ્દિક સંપદાને નિશાન બનાવવાનો અને ભારતીય ફાર્મા કંપનીઓને પાછળ રાખી દેવાનો જ છે. સીરમ ઈન્સ્ટિટ્યુટ આજે અનેક દેશોને કોરોના વેક્સિન આપી રહ્યું છે. હકીકતમાં ચીન દ્વારા તૈયાર કરવામાં આવેલી કોરોના વેક્સિન ભારતીય વેક્સિનની સરખામણીએ સફળ રહી નથી અને તેની અનેક સાઈડ ઈફ્કેટ્સ પણ સામે આવી રહી છે. આથી ચીન ભારત ઉપર બરોબર ભડક્યું છે. 

એન્ટી હેકિંગ સિસ્ટમ આપણે વિકસાવવી જ પડશે

આધુનિક યુગમાં આપણે દુશ્મનને તેના જ હથિયારથી હરાવવો પડશે. અમેરિકાનો રિપોર્ટ સામે આવ્યા બાદ હવે ભારતે ચીન સામેના સાયબર વોર માટે તૈયાર રહેવું જ પડશે. ભારત ભલે આઈટી ક્ષેત્રમાં અવ્વલ હોય પણ બ્રોડબેન્ડના ઉપયોગ અને ઈન્ટરનેટ કનેક્શનની સંખ્યાના મામલે આજે પણ ચીનથી ક્યાંય પાછળ જ છે. કોઈ દેશ આપણા ઉર્જા તંત્ર, સંરક્ષણ તંત્રમાં ઘૂસણખોરી ન કરી શકે તે માટે જડબેસલાક એન્ટી હેકિંગ સિસ્ટમ આપણે વિકસાવવી જ પડશે. આજે દુનિયાના તમામ વિકસિત દેશ પોતપોતાની સાયબર સુરક્ષાને વધુ મજબૂત કરવા પાછળ અબજો રૂપિયાનું આંધણ કરી રહ્યા છે. ચીની હેકર્સે ગયા ઓક્ટોબરના ફક્ત પાંચ દિવસમાં જ ભારતના પાવરગ્રિડ, આઈટી કંપનીઓ અને બેન્કિંગ સેક્ટર પર ૪૦,૫૦૦ સાયબર એટેક કર્યા હતા. આથી ભારત પાસે સંવેદનશીલ માહિતી અને ડેટાની જોરદાર સુરક્ષા તથા આપણું નેટવર્ક મજબૂત કર્યા સિવાય ચીનના હેકર્સને રોકવાનો બીજો કોઈ ઉપાય જ નથી.•