એક તરફ મહાબલીપુરમમાં પીએમ મોદી અને ચીનના રાષ્ટ્રપતિ શી જિનપિંગની અનૌપચારિક શિખર બેઠક બાદ ભારત અને ચીનના સંબંધો સુધરવા જઈ રહ્યા છે ત્યારે હવે ચીન ફરીથી LAC પાસે પોતાના સૈનિકોની ટ્રેનિંગ વધારી રહ્યું છે. ટ્રેનિંગમાં એ વિસ્તારોનો સમાવેશ કરાયો છે જ્યાં ભારત અને ચીનના સૈનિકો એકમેકની સામે જોવા મળે છે. આ ટ્રેનિંગને ચીનના માઈન્ડ ગેમનો ભાગ માનવામાં આવી રહ્યું છે.
ચીનની સેનાએ LAC પાસે વધારી સૈનિકોની ટ્રેનિંગ
આ ટ્રેનિંગને ગણાશે માઈન્ડ ગેમનો ભાગ
ડોકલામ વિવાદ બાદ ચીનની સેનાએ અહીં શરૂ કરી ટ્રેનિંગ
અગાઉ ક્યારેય આવી ટ્રેનિંગ થઈ નથી
એકતરફ ભારત- ચીનના સંબંધો સારા થઈ રહ્યા છે ત્યારે ચીનની સેનાએ લાઈન ઓફ એક્ચ્યુઅલ કંટ્રોલ (LAC) પાસે સૈનિકોની ટ્રેનિંગ વધારી છે. આર્મી તરફથી મળતી માહિતિ અનુસાર ડોકલામ વિવાદ બાદ અહીં ચીનની સેનાએ આ પ્રકારની ટ્રેનિંગ શરૂ કરી છે જે પહેલાં ક્યારેય થઈ નથી. 2018માં ફક્ત ઇસ્ટર્ન સેક્ટરમાં જ ટ્રેનિંગના 400 સેશન થયા હતા. તો એપ્રિલમાં ટ્રેનિંગના 470 સેશન થયા.
માર્શલ આર્ટથી લઈને ગ્રેનેડ ફેંકવા સુધીની ટ્રેનિંગ
પહેલાં LAC પાસે ક્યારેય પણ ચીની સેનાની તરફથી આ પ્રકારની ટ્રેનિંગ જોવા મળી ન હતી. પરંતુ 2017માં ડોકલામ વિવાદ બાદ ચીનની સેનાએ કડક ટ્રેનિંગની શરૂઆત કરી અને સાથે તેમાં અસફળ રહેલા સૈનિકોને સજા પણ આપવામાં આવી. સજા રૂપે તેમને પાછા મોકલી દેવામાં આવ્યા હતા.
મળતી માહિતિ અનુસાર LAC પર ટ્રેનિંગના ભાગ રૂપે ચીની સેનાની તરફથી એક નિર્દેશ જાહેર કરાયો છે. ત્યારબાદ અહીં માર્શલ આર્ટની ટ્રેનિંગ આપવામાં આવે છે. આ પહેલાં ચીની સૈનિકોએ ક્યારેય ફાયરિંગની પ્રેક્ટિસ કરી નથી. આ પછી નિયમિત રીતે ફાયરિંગથી લઈને ગ્રેનેડ ફેંકવા સુધીની ટ્રેનિંગ આપવામાં આવી રહી છે. સાથે અન્ય ફિઝિકલ ટ્રેનિંગ પણ આપવામાં આવી રહી છે.
ડોકલામ વિવાદ પછી માઈન્ડ ગેમ
સૂત્રોના જણાવ્યા અનુસાર આ ટ્રેનિંગ એ વિસ્તારોમાં વધારે કરવામાં આવી રહી છે જ્યાં બંને દેશોના સૈનિક એક-મેકની સામે જોવા મળે છે. તેનાથી નક્કી થાય છે કે આ માઈન્ડ ગેમનો ભાગ છે. વધુમાં તેઓએ કહ્યું કે ભારતીય સૈનિકોની ટ્રેનિંગ એક મજબૂત પક્ષ રહ્યો છે. ડોકલામ બાદ ભારતની તાકાતનો અહેસાસ થયા બાદ ચીનની તરફથી એ કોશિશ કરાઈ રહી છે કે તેઓ પણ ટ્રેનિંગ પર ભાર મૂકી રહ્યા છે. આ વર્ષે એપ્રિલ સુધી ચીનના સૈનિકો ટ્રેનિંગ લઈ રહ્યા હતા. ત્યારબાદ તેમાં થોડી રાહત આપવામાં આવી હતી.