કોરોના ફરી એકવાર ચીનના વુહાનમાં પાછો ફર્યો છે. જિયાંગક્સિયા જિલ્લામાં શટડાઉન થયું હતું, જેમાં 10 મિલિયન રહેવાસીઓ છે. ચીનનું વુહાન એ જ શહેર છે જ્યાં કોરોનાનો પહેલો કેસ દુનિયામાં જોવા મળ્યો હતો. ત્યારબાદ તે આખી દુનિયામાં ફેલાઈ ગઈ. અહીં બાર, સિનેમા હોલ અને કાફે બધું જ બંધ કરી દેવામાં આવ્યું છે.
જિયાંગક્સિયામાં કોરોનાના ચાર કેસ
કોરોનાના ફક્ત ચાર કેસ આવતા તંત્ર દ્વારા જિયાંગક્સિયામાં લોકડાઉન લાગુ પાડી દેવામાં આવ્યું છે. વહીવટીતંત્રના જણાવ્યા અનુસાર, જિઆંગક્સિયાના શહેરી વિસ્તારમાં ત્રણ દિવસ માટે "કામચલાઉ નિયંત્રણ પગલાં" લાગુ કરવામાં આવ્યા છે.
બાર, સિનેમાઘરો અને ઇન્ટરનેટ કાફે બંધ
કોરોનાના કેસોને ધ્યાનમાં રાખીને વહીવટીતંત્રે બાર, સિનેમાઘરો અને ઇન્ટરનેટ કાફે બંધ કરી દીધા છે. આ ઉપરાંત માર્કેટ પ્લેસ, રેસ્ટોરન્ટ પણ બંધ કરી દેવામાં આવ્યા છે. સાથે જ મોટા કાર્યક્રમો પર પણ પ્રતિબંધ લગાવી દેવામાં આવ્યો છે. તમામ ધાર્મિક સ્થળોને બંધ કરી દેવામાં આવ્યા છે અને ધાર્મિક પ્રવૃત્તિઓ પર પણ પ્રતિબંધ મૂકવામાં આવ્યો છે. શૈક્ષણિક સંસ્થાઓ બંધ કરવાનો પણ નિર્ણય લેવાયો છે. તમામ જાહેર પરિવહન બંધ કરી દેવામાં આવ્યું છે. તંત્ર દ્વારા લોકોને શહેર ન છોડવાની સલાહ આપવામાં આવી છે. સત્તાવાળાઓએ ચાર ઉચ્ચ જોખમવાળા વિસ્તારોની પણ ઓળખ કરી છે, જ્યાં રહેવાસીઓને તેમના ઘરની બહાર નીકળવા પર પ્રતિબંધ મૂકવામાં આવ્યો હતો.
2020ની શરૂઆતમાં વુહાનમાં દુનિયાનું પહેલું લોકડાઉન લાગુ પડાયું હતું
2020ની શરૂઆતમાં ચીનના વુહાનમાં દુનિયાનું પહેલું લોકડાઉન લાદવામાં આવ્યું હતું. લોકો બે મહિના સુધી ઘરની બહાર નીકળી શક્યા ન હતા. ચીનની સરકારે વુહાનને રોગચાળા સામેની લડતમાં સફળતાની વાર્તા તરીકે રજૂ કર્યું હતું. જ્યારે ઘણા એવા વીડિયો સામે આવ્યા હતા, જેના માટે ચીનની સરકારને નિશાન બનાવવામાં આવી હતી.