ચીનના ઘણા ભાગો છેલ્લા 60 વર્ષમાં સૌથી ખરાબ ગરમીનો સામનો કરી રહ્યા છે, પાકની ઉપજમાં ઘટાડો થવાને કારણે દેશની આર્થિક કટોકટી વધુ ઘેરી બની શકે
ચીનમાં આકરી ગરમીને કારણે કેટલાક ભાગોમાં નદીઓ સુકાઈ ગઈ
ચીનમાં વીજ કટોકટીએ લોકોની મુશ્કેલીઓમાં વધારો કર્યો
પાકની ઉપજમાં ઘટાડો થવાને કારણે દેશની આર્થિક કટોકટી વધુ ઘેરી બની શકે
ચીન હાલમાં આકરી ગરમીનો સામનો કરી રહ્યું છે જેના કારણે તેના કેટલાક ભાગોમાં નદીઓ સુકાઈ ગઈ છે. વીજ કટોકટીએ લોકોની મુશ્કેલીઓમાં વધારો કર્યો છે. જેમાં મુખ્યત્વે ચીનના કારખાનાઓ ખોરવાયા છે. પાકની ઉપજમાં ઘટાડો થવાને કારણે દેશની આર્થિક કટોકટી વધુ ઘેરી બની શકે છે. ચીનના ઘણા ભાગો છેલ્લા 60 વર્ષમાં સૌથી ખરાબ ગરમીનો સામનો કરી રહ્યા છે.
સરકારી હવામાન એજન્સીઓના જણાવ્યા અનુસાર, દેશના મધ્ય અને દક્ષિણ-પશ્ચિમ ક્ષેત્રમાં ઘણા સ્થળોએ મહત્તમ તાપમાન 43 ડિગ્રી સેલ્સિયસથી વધુ નોંધાયું હતું. એજન્સીઓએ આગાહી કરી છે કે, દક્ષિણમાં વધુ તાપમાન વધુ બે અઠવાડિયા માટે વધુ મુશ્કેલીમાં વધારો કરી શકે છે. એક અહેવાલ મુજબ વરસાદના અભાવે ગરમીમાં વધારો થયો છે. આ વર્ષે જુલાઈમાં ગયા વર્ષની સરખામણીએ 40 ટકા ઓછો વરસાદ થયો છે, જે 1961 પછીનો સૌથી ઓછો વરસાદ છે.
ચીનના જળ સંસાધન મંત્રાલય દ્વારા સોમવારે પ્રસિદ્ધ કરાયેલા ડેટા અનુસાર, યાંગ્ત્ઝી નદીના ઉપરના ભાગમાં પાણીનું સ્તર તેના સૌથી નીચા સ્તરે પહોંચી ગયું છે. ચીનની યાંગ્ત્ઝી નદી માત્ર પાણીનો મુખ્ય સ્ત્રોત નથી, પરંતુ તે પાક માટે હાઇડ્રોપાવર, પરિવહન અને જીવનનો સ્ત્રોત પણ છે. ચીનમાં વધતી ગરમીને કારણે એર કન્ડીશનીંગની માંગમાં જબરદસ્ત ઉછાળો જોવા મળ્યો છે, જેના કારણે પાવર ગ્રીડ પર વધારાનો ભાર મૂકવામાં આવી રહ્યો છે.
એક અહેવાલ મુજબ સોમવારે દક્ષિણ-પશ્ચિમ ચીની પ્રાંત સિચુઆન, જે મોટાભાગે હાઇડ્રોપાવર પર નિર્ભર છે તેણે 19 શહેરોમાં ઘણી ફેક્ટરીઓને ઘરોમાં વીજળી પહોંચાડવા માટે છ દિવસ માટે ઉત્પાદન બંધ કરવા અથવા ઘટાડવાનો આદેશ આપ્યો છે. આ તરફ એપલ ઇન્ક., ટોયોટા મોટર કોર્પોરેશન અને ફોક્સવેગન એજી જેવા દિગ્ગજો સહિત ચીનમાં કેટલાક વૈશ્વિક ઉત્પાદકો માટે આવા મોટા પાવર કટ મુશ્કેલી બની ગયા છે.
કેટલાક વિશ્લેષકો ચિંતા કરે છે કે, ચીનમાં દુષ્કાળ અને ગરમી ચોખા અને મકાઈ જેવા પાકના ઉત્પાદનને નુકસાન પહોંચાડી શકે છે. આ મહિનાની શરૂઆતમાં પ્રકાશિત થયેલા તેના વાર્ષિક આબોહવા-પરિવર્તન અહેવાલમાં ચીનના હવામાન વિભાગે જણાવ્યું હતું કે, 1951 અને 2021 વચ્ચે ચીનના સરેરાશ વાર્ષિક સપાટીના તાપમાનમાં દર દાયકામાં સરેરાશ 0.26 ડિગ્રી સેલ્સિયસનો વધારો થયો છે. આ વૈશ્વિક સરેરાશ (દશક દીઠ 0.15 °C) કરતાં ઘણું ઝડપી છે.