પાકિસ્તાનની નવી ચાલ..! LoC પર હથિયારોથી સજ્જ ડ્રોન તૈનાત કરશે...

બાલાકોટમાં જૈશના આતંકી કેમ્પો પર ભારતીય વાયુસેનાએ કરેલી એરસ્ટ્રાઈક બાદ પાકિસ્તાન ઉશ્કેરાયુ છે ત્યારે પાકિસ્તાનની નવી ચાલનો પર્દાફાશ થયો છે. બોર્ડર સિક્યોરિટી ફોર્સના જવાનોના રિપોર્ટમાં સામે આવ્યું છે કે, પાકિસ્તાન લાઈન ઓફ કંટ્રોલ એટલે કે LoC પર હથિયારોથી સજ્જ ડ્રોન તૈનાત કરવાની ફિરાકમાં છે.



પ્રાપ્ત વિગતો મુજબ, પાકિસ્તાન પૂંછ, રાજૌરી, સુંદરબની, ઉરી, નૌશેરામાં અંદાજે 12થી પણ વધુ હથિયારોથી સજ્જ UAV તૈનાત કરવામાં વ્યસ્ત બન્યુ છે. ઉલ્લેખનીય છે કે, અગાઉ પાકિસ્તાનના ડ્રોન UCAVએ ગુજરાતમાં ઘૂસણખોરી કરવાનો પ્રયાસ કર્યો હતો. જેને ભારતીય સેનાએ તોડી પાડ્યુ હતું.



જો કે એવું પણ સામે આવ્યું છે કે પાકિસ્તાન હથિયારોથી સજ્જ મોટી સંખ્યામાં વિવિધ ડ્રોન LoC પર તૈનાત કરવાની તૈયારીમાં વ્યસ્ત બન્યુ છે. આ રિપોર્ટ બાદ ભારતીય સેના પણ અલર્ટ બની છે. પાકિસ્તાન પાસે હાલમાં UCAV પ્રકારના ડ્રોન છે જે માત્ર વસ્તુઓ લઇ જવાના કામમાં આવે છે.



જો કે પાકિસ્તાન આવનારા દિવસોમાં પોતાની ડ્રોનની ક્ષમતા વધારવાના પ્રયત્ન કરી રહ્યું છે. પ્રાપ્ત વિગતો મુજબ, પાકિસ્તાન ચીનના વિંગ લૂંગ 2 પ્રકારના 48 ડ્રોન ખરીદવાના પ્રયાસ કરી રહ્યું છે. આ ડિલ પાકિસ્તાન ગત વર્ષના ઓક્ટોબર મહિનાથી ખરીદવાનો પ્રયાસ કરી રહ્યુ છે.

જો કે ચીને પણ પોતાના ખાસ સહયોગી પાકિસ્તાનને 48 આધુનિક સૈન્ય ડ્રોન વેચવાનો નિર્ણય કર્યો છે. વિંગ લૂંગ-2 ડ્રોનને લઇને આ સમજૂતિ કરાર પર વિશેષજ્ઞોનું માનવું છે કે ચીન અને પાકિસ્તાન વચ્ચે આ અત્યાર સુધીનો સૌથી મોટો સૈન્ય કરાર છે.