ચીન / ડ્રેગને હવે ભારતને ઘેરવા પાકિસ્તાન નહીં પણ હવે આ દેશનો લીધો સહારો; કર્યું તોતિંગ 26 અબજ ડોલરનું ઇન્વેસ્ટમેન્ટ

ચીનના રાષ્ટ્રપતિ શી જિનપિંગે કહ્યું હતું કે તેઓ બંને દેશોના સંબંધોને વધુ મજબૂત બનાવવા માટે બેલ્ટ એન્ડ રોડ ઇનિશ્યેટિવ BRI અંતર્ગત બાંગ્લાદેશમાં અબજો ડોલરનું રોકાણ કરવા તૈયાર છે. તેમણે વધુમાં કહ્યું હતું કે બાંગ્લાદેશ સાથેની તેમની મિત્રતા દીર્ઘ દ્રષ્ટિની અને બંને પક્ષ માટે ફાયદાકારક છે. 

26 અબજ ડોલરનું રોકાણ કરશે ચીન

26 અબજ ડોલરથી વધુના ચીની રોકાણ અને 38 અબજ ડોલરના ફંડિંગની પ્રતિબદ્ધતા સાથે બાંગ્લાદેશ ચીનના વિશાળ ઈન્ફ્રાસ્ટ્રક્ચર પ્રોજેક્ટના સૌથી મોટા પ્રાપ્તકર્તાઓમાંનું એક છે. ચીને બાંગ્લાદેશની 97 ટકા નિકાસ પર ઝીરોટેરિફ ટ્રીટમેન્ટની ઓફર કરી છે. ચીન જે રીતે બાંગ્લાદેશ, નેપાળ, શ્રીલંકા અને માલદીવ્સમાં તેના વિશાળ માળખાગત રોકાણને આગળ ધપાવી રહ્યું છે, તેથી ભારત તેના વધતા પ્રભાવથી ચિંતામાં મુકાયું છે.

રાષ્ટ્રપતિ હમિદે પોતાના સંદેશમાં શું કહ્યું?

બાંગ્લાદેશના રાષ્ટ્રપતિ હમિદે કહ્યું કે બાંગ્લાદેશ-ચીનના સંબંધનો ઝડપથી વિકાસ કરી રહ્યો છે અને બંનેએ ઘણા મહત્વપૂર્ણ ક્ષેત્રોમાં સાથે કામ કર્યું છે. ચીનની સત્તાવાર ન્યૂઝ એજન્સી જિન્હુઆના અહેવાલ મુજબ બાંગ્લાદેશી રાષ્ટ્રપતિએ બાંગ્લાદેશના વધી રહેલા સામાજિક-આર્થિક વિકાસમાં ચીનના સતત સમર્થન માટે ચીનની પ્રશંસા કરી છે. રાષ્ટ્રપતિએ પણ આશા વ્યક્ત કરી કે ભવિષ્યમાં બંને દેશો વચ્ચેના ગાઢ અને મૈત્રીપૂર્ણ સંબંધો વધુ ઊંડા બનશે.