નિવેદન / ભારતની એપ પ્રતિબંધની કાર્યવાહી બાદ ચીને કહ્યું, આપણાં તો 1000 વર્ષ જૂના સંબંધો

• ભારત અને ચીનના ઐતિહાસિક સંબંધો 1000 વર્ષ જૂના : ચીન 
• ચીનમાં લોકોને યોગ અને દંગલ મૂવી ખૂબ પસંદ છે : ચીન 
• આશા છે કે ભારત આ બધી વાતોને સમજશે : ચીન 

એક તરફ કોરોના વાયરસ કહેર વર્તાવી રહ્યો છે ત્યાં બીજી તરફ ભારત અને ચીનની સરહદ પર સતત તણાવપૂર્ણ પરિસ્થિતિ છે. ચીની સેનાએ સતત ભારતને ઉશ્કેરવાના પ્રયત્નો કરી રહી છે. એવામાં ભારતે ફરી એકવાર ચીનની એપ્સ પર પ્રતિબંધ મૂકીને કડક સંદેશ આપ્યો છે ત્યારે ચીને ફરીથી શાણી વાતો શરુ કરી દીધી છે. 

બંને દેશ વચ્ચે વિવાદ ચાલી રહ્યો છે પણ ભારત જે કટિબદ્ધતાથી નિર્ણયો લઇ રહ્યું છે તેનાથી ડ્રેગન હાંફી ગયું છે અને હવે ડાહ્યી ડાહ્યી વાતો શરુ કરી દીધી છે/ આટલું જ નહીં ચીનને આ સમયે યોગ, આમીર ખાનની દંગલ અને રવિન્દ્રનાથ ટેગોર યાદ આવી રહ્યા છે.  

ચીનનું કહેવું છે કે ભારત અને ચીનના સંબંધો તો એક હજાર વર્ષ જૂના છે અને અમે ભારતને ક્યારેય ખતરો માનતા જ નથી. ચીની વિદેશમંત્રાલયે કહ્યું કે ભારતે આ બધું યાદ રાખવું જોઈએ કે ભારત અને ચીન વચ્ચે ઐતિહાસિક સંબંધો છે. 

ચીનના વિદેશ મંત્રાલયે કહ્યું કે ભારત અને ચીન બંને પ્રાચીન સભ્યતાઓ છે. પગલાં લેતા પહેલા આપણે ભવિષ્ય વિશે વિચારવું જોઈએ. ચીનમાં રવીન્દ્રનાથ ટેગોર ખૂબ પ્રખ્યાત છે. ચીનમાં લોકો યોગ અને દંગલ મૂવીને ખૂબ પસંદ કરે છે. આશા છે કે ભારત સમજશે. 

જોકે ભારતે જે એપ પર પ્રતિબંધ લગાવ્યો છે તેના કારણે હજુ પણ ચીનને પેટમાં દુઃખી રહ્યું છે. કારણ કે તેમણે કહ્યું કે ભારત ચીની એપ્સ પર બેન કરીને પોતાના જ નાગરિકોને નુકસાન પહોંચાડી રહ્યો છે. જેના કારણે અમારી કંપનીઓને નુકસાન થઇ રહ્યું છે. અમેરિકા તરફ ઈશારો કરતા તેમણે કહ્યું કે ભારતનો આ નિર્ણય તે જ દિવસે આવ્યો જ્યારે અમેરિકાએ બીજા દેશોને આવું કરવા માટે કહ્યું.