ચીનનું નાણાંકીય હબ કહેવાતા શાંઘાઈમાં કોરોનાના કેસ ઝડપથી વધતા લોકડાઉન લાગુ કરી દેવાયું છે. આ શહેરમાં લોકડાઉનનાં કારણે 2.5 કરોડથી વધુ લોકો તેમના ઘરોમાં કેદ થઈ ગયા છે.
શાંઘાઈમાં કોરોનાના કેસ વધતા લોકડાઉન લાગુ કરાયું
ચીને ફરી વાર મોટા પાયા પર કોરોના ટેસ્ટિંગ શરૂ કરી દીધું
જિલિનમાં નોંધાયા કોરોનાનાં સૌથી વધારે કેસ
ચીનમાં આ લોકડાઉન બાદ શહેરના રસ્તાઓ અને બજારો સાવ નિર્જન થઈ ગયા છે. ત્યારે અહીં ફરી વાર એ જ પ્રકારનું વાતાવરણ જોવા મળી રહ્યું છે કે જે કોરોના મહામારીના પહેલાં વર્ષમાં હતું. કોરોના મહામારી દરમિયાન શહેર માટે આ સૌથી મોટું પગલું છે. હાંગપુ નદીને અડીને આવેલા શહેરમાં 9 દિવસનું લોકડાઉન લાદવામાં આવ્યું છે. આ પહેલાં સરકાર અહીં લોકડાઉન લાગુ કરવાનો ઇનકાર કરી રહી હતી.
લોકડાઉનની ઝપેટમાં શહેર
તમને જણાવી દઈએ કે, ચીનમાં કોરોના મહામારીની શરૂઆત વર્ષ 2019નાં અંતમાં થઈ હતી. જો કે ચીને એવો દાવો કર્યો હતો કે, તેઓએ આ મહામારી પર કાબુ મેળવી લીધો છે, પરંતુ આ વર્ષથી ચીનના વિવિધ શહેરોમાં સતત કોરોનાના કેસમાં વધારો થઇ રહ્યો છે. ત્યારે શાંઘાઈમાં સતત વધી રહેલા કેસ બાદ ચીને ફરી એક વાર મોટા પાયા પર કોરોના ટેસ્ટિંગ શરૂ કરી દીધાં છે. આ લોકડાઉન દરમિયાન આવશ્યક ચીજવસ્તુઓની સેવા સિવાય, અન્ય તમામ સેવાઓ બંધ કરી દેવાઇ છે. જાહેર પરિવહનને પણ બંધ કરી દેવાયું છે. શાંઘાઈના મુખ્ય ડિઝની થીમ પાર્કને પણ બંધ કરી દેવામાં આવ્યો છે.
ચીનના જિલિનમાં કોરોનાનાં સૌથી વધારે કેસ
તમને જણાવી દઇએ કે, આ જ મહિનામાં ચીનમાં 56 હજારથી પણ વધારે કેસો સામે આવી ચૂક્યાં છે. જેમાં ચીનનાં ઉત્તર-પૂર્વી જિલિનમાં સૌથી વધારે કેસો નોંધવામાં આવ્યાં છે. ચીનનું કહેવું છે કે, તેઓ કોવિડ ઝીરો પોલિસી પર અમલ કરી રહ્યાં છે. એટલાં માટે કારણ કે તેઓ પ્રતિબંધ માટે કડકમાં કડક નિર્ણયો લઇ શકે. નિયમોનાં ઉલ્લંઘન પર અહીં સજાની જોગવાઇ પણ રખાઇ છે.
નોંધનીય છે કે, ચીનમાં અંદાજે 1,44,515 કોરોનાનાં કેસો છે. અહીં કોરોનાની ઝપેટમાં અંદાજે સાડા ચાર હજારથી વધારે દર્દીઓ જીવ ગુમાવી ચૂક્યાં છે. છેલ્લાં 24 કલાકમાં ચીનમાં કોરોનાનાં નવા 1219 કેસ સામે આવી ચૂક્યાં છે. જેમાં જિલિનમાં 1086 અને શંઘાઇમાં 50, લિયોનિંગમાં 12 અને હિલોંગજિયાંગમાં 10 કેસો સામે આવી ચૂક્યાં છે.
આ દેશો પર કરીએ એક નજર
આફ્રિકામાં છેલ્લાં 24 કલાક દરમિયાન 2422 કેસ નોંધાયા છે. આફ્રિકાના સેન્ટર ફોર ડિસીઝ કંટ્રોલ એન્ડ પ્રિવેન્શનનું કહેવું છે કે, આ ખંડમાં કોરોનાના કેસ વધીને 1,13,22,887 થઈ ગયા છે. એ જ રીતે ફ્રાન્સમાં રવિવારે 1486 નવા કેસ નોંધાયા છે. જ્યારે પાકિસ્તાનમાં રવિવારે કોરોનાના નવા કેસની સંખ્યા 310 રહી છે.