ચિંતાજનક / બાપ રે! ચીનમાં એક જ દિવસમાં નોંધાયા કોરોનાના અત્યંત ચોંકાવનારા આંકડા, સેના તૈનાત

• ચીનમાં બુધવારે નોંધાયા કોરોનાના નવા 20,472 કેસ
• શંઘાઈમાં લોકડાઉન હોવા છતાં કેસો વધતા હોસ્પિટલો દર્દીઓથી ફુલ
• ઓમિક્રોનના નવા વેરિઅન્ટ સબટાઇપ BA.1.1 એ પણ લોકોમાં ચિંતા ઉભી કરી

ચીનમાં બુધવારે કોરોનાના 20,000 થી વધુ નવા કેસો નોંધાયા છે. ત્યારે મહામારીની શરૂઆત બાદથી જ એક દિવસની અંદર નોંધાયેલા દૈનિક કેસોની આ સૌથી વધારે સંખ્યા છે. શંઘાઈમાં લોકડાઉન હોવા છતાં પણ અહીં કેસો સતત વધી રહ્યાં છે. જેના કારણે ચિંતામાં વધારો થયો છે.

બુધવારે ચીનમાં સંક્રમણના 20,472 કેસ નોંધાયા

જણાવી દઈએ કે માર્ચ સુધી ચીને લોકડાઉન, ગ્રુપ ટેસ્ટિંગ અને આંતરરાષ્ટ્રીય મુસાફરી પર સખત પ્રતિબંધો સાથે દૈનિક કેસોને નિયંત્રિત કર્યા હતાં. પરંતુ તાજેતરના એક સપ્તાહની અંદર જ તેમાં મોટો ઉછાળો જોવા મળ્યો છે. મહત્વનું છે કે, બુધવારે ચીનમાં સંક્રમણના 20,472 કેસ નોંધાયા છે. જો કે રાહતની વાત એ છે કે, હજુ એક પણ દર્દીએ આમાં જીવ ગુમાવ્યો નથી.

શંઘાઈના ક્વોરન્ટાઈન સેન્ટરમાં કોવિડ પોઝિટિવ દર્દીઓની ભારે ભીડ જોવા મળી રહી છે. કોવિડ-પોઝિટિવ બાળકોને તેમના માતા-પિતાથી અલગ કરવામાં આવી રહ્યાં છે. આ નીતિએ પીડિત પરિવારોની ચિંતામાં વધારો કર્યો છે.

શંઘાઈમાં કોરોનાના રાષ્ટ્રીય આંકડાઓમાં 80 ટકાથી વધુનો હિસ્સો

અધિકારીઓએ બુધવારે કહ્યું કે, ચીનના સૌથી મોટા શહેર શંઘાઈમાં કોરોનાના રાષ્ટ્રીય આંકડાઓમાં 80 ટકાથી વધુનો હિસ્સો છે. શંઘાઈના એક ટોચના અધિકારીએ સ્વીકાર્યું છે કે, તેની સામે ઝઝૂમવા માટેની અપર્યાપ્ત તૈયારી હતી. CCTVના રિપોર્ટ અનુસાર, શંઘાઈમાં બુધવારે સમગ્ર વસ્તીનું નવેસરથી પરીક્ષણ કરવામાં આવશે. ખોરાકની અછત અને લોકડાઉનના કારણે રહેવાસીઓમાં પણ ગુસ્સો વધી રહ્યો છે.

તમને જણાવી દઈએ કે, 2019 ના અંતમાં, કોરોના વાયરસ પ્રથમ વખત ચીનના વુહાનમાં જોવા મળ્યો હતો. અહીંથી આ મહામારી સમગ્ર વિશ્વમાં ફેલાઈ હતી. અમેરિકી રાષ્ટ્રપતિએ તેને ચીની વાયરસ પણ ગણાવ્યો હતો.

ચીનના શંઘાઈમાં હોસ્પિટલો દર્દીઓથી ફુલ

ચીનના શંઘાઇમાં સ્થિતિ એટલી ખરાબ થઈ ગઈ છે કે, શંઘાઈની કોઈ પણ હોસ્પિટલમાં કોરોના સંક્રમિત દર્દીઓને દાખલ કરવા માટે હવે જગ્યા પણ નથી બચી. તેમ છતાં ચીનનો એવો દાવો છે કે, શંઘાઈમાં અત્યાર સુધી કોરોના સંક્રમણથી કોઈનું મોત નથી થયું.

કોરોનાને હરાવવા સેના પણ મેદાનમાં ઉતરી

ચીને સોમવારથી તપાસનું મોટું અભિયાન શરૂ કર્યું છે. સેનાના જવાનો અને ડોક્ટરોને પણ ખૂબ મોટી સંખ્યામાં તપાસ માટે ઉતારવામાં આવ્યા છે. ચીનની સેના પીપુલ્સ લિબરેશન આર્મી (PLA) ના 2000 થી વધુ તબીબી કર્મચારીઓને રવિવારે શંઘાઈ મોકલવામાં આવ્યા હતાં. જેથી ત્યાંની કોરોના તપાસમાં નાગરિક પ્રશાસનની મદદ કરી શકાય. મીડિયા રિપોર્ટ્સમાં કહેવામાં આવ્યું છે કે, જિયાંગ્સુ, જેજિયાંગ અને બેઇજિંગ સહિત અનેક પ્રાંતોના ડૉક્ટરો અને તબીબી કર્મચારીઓને પણ ત્યાં મોકલવામાં આવ્યા છે. આ રીતે 10 હજારથી વધુ લોકોની ટીમ તપાસ અભિયાનમાં લાગી ગઇ છે.

કોરોનાના નવા વેરિઅન્ટે મચાવ્યો ખતરો

બીજી બાજુ તમને જણાવી દઇએ કે, ચીનમાં ઓમિક્રોનના નવા વેરિઅન્ટ સબટાઇપ BA.1.1 એ પણ લોકોમાં ચિંતા ઉભી કરી છે. કારણ કે તેના લક્ષણ કોઇ પણ વેરિઅન્ટ સાથે નથી મળતા. ચીનમાં વધતા જતા કોરોનાના કેસો વચ્ચે અહીં વાયરસનો નવો વેરિઅન્ટ પણ મળી આવ્યો છે. ગ્લોબલ ટાઇમ્સના જણાવ્યાં અનુસાર, આ ઓમિક્રોન (OMicron) નો સબટાઇપ BA.1.1 છે. ચિંતાજનક બાબત એ છે કે, તે બિલકુલ નવો વેરિઅન્ટ છે અને અત્યાર સુધી મળી આવેલા તમામ વેરિઅન્ટની તે તદ્દન અલગ છે. એવું માનવામાં આવી રહ્યું છે કે, આ વેરિઅન્ટના કારણે ચીનમાં કોરોનાથી હાલત ખરાબ થતી જઇ રહી છે. આ વેરિઅન્ટ ચીનના જિયાંગ્સુ વિસ્તારમાં મળી આવ્યો છે. તે જગ્યાએ શંઘાઇથી 70 કિમી દૂર છે.