સતર્કતા / અરુણાચલમાં LAC પર ચીન શાંત, પણ ભારતે કરી રાખી છે આ તૈયારી, કેમ કે ચીન ગમે ત્યારે...

• ચીન સામે લડવા માટે તમામ મોરચે ભારત અલર્ટ 
• ભારતે અરૂણાચલમાં પ્રદેશમાં સૈન્યબળ વધાર્યું
• ભારતે એરબેઝ પર ફાઈટર પ્લેન અને હેલિકોપ્ટર પણ તૈનાત કર્યા

ભારતીય સેના તમામ મોરચા પર અલર્ટ છે. અને જવાનોની તૈનાતી પણ વધારી દેવાઈ છે. કારણ કે LACનો આ ભાગ સંવેદનશીલ માનવામાં આવે છે. ગલવાનમાં થયેલા ઘર્ષણ બાદથી ચીન સાથે જોડાયેલી તમામ સીમા પર અલર્ટ જાહેર કરી દેવામાં આવ્યું હતું. ત્યારથી અરુણાચલમાં પણ સેના અલર્ટ મોડ પર છે. ઈસ્ટર્ન લદ્દાખમાં તણાવ વધતા LACમાં દરેક જગ્યાએ ભારતીય સેના અલર્ટ પર છે. સંવેદનશીલ વિસ્તારોમાં પેટ્રોલિંગ વધાર્યું છે. એટલું જ નહીં અરુણાચલમાં ભારતીય એરબેઝ પણ અલર્ટ મોડ પર છે. અને  ફાઈટ પ્લેન અને હેલિકોપ્ટર દ્વારા બોર્ડર પર પેટ્રોલિંગ કરવામાં આવી રહ્યું છે.

લદ્દાખ અને અરૂણાચલ પ્રદેશની પરિસ્થિતિ જુદી છે

એક અધિકારીએ કહ્યું કે અમને ડર હતો કે ચીન અહીં પણ થોડીક કાર્યવાહી કરશે, પરંતુ અત્યારે બધું સામાન્ય લાગે છે. જો કે, અમે દરેક પરિસ્થિતિનો સામનો કરવા માટે સંપૂર્ણ રીતે તૈયાર છીએ. લાંબા સમયથી આ વિસ્તારમાં પોસ્ટ કરેલા વરિષ્ઠ અધિકારીએ કહ્યું કે લદ્દાખ અને અરુણાચલ પ્રદેશની પરિસ્થિતિ જુદી છે. અરુણાચલ પ્રદેશમાં બધે જ સૈનિકો તૈનાત છે ત્યાં લદાખમાં ઘણા એવા ક્ષેત્ર છે જ્યાં કાયમી તહેનાતી ન હતી અને બંને દેશોના સૈનિકો પેટ્રોલિંગ માટે આવતા હતા અને પાછા જતા હતા. પેંગોંગ વિસ્તારના ફિંગર -4 ક્ષેત્રની જેમ, ચીની સૈનિકોએ પહેલા ભારતીય સૈનિકોની પેટ્રોલિંગ અટકાવવાનો પ્રયાસ કર્યો અને ત્યારબાદ આવીને તે વિસ્તારમાં સ્થાયી થયો.