ટેક્નોલોજી / ચીન અને જાપાન હવે અંતરીક્ષમાં સોલર પાવર સ્ટેશન બનાવશે

અતરીક્ષમાં સુર્યના કિરણોને કોઇ વાદળ કે વાતાવરણનો અવરોધ નડતો નથી. તેથી તેની અખુટ ઉર્જા બારે મહિના પાવરસ્ટેશનને મળતી રહેશે. જોકે આ કામ અત્યંત અઘરું અને ખર્ચાળ છે. અંતરીક્ષમાં સ્થાપિત સોલર પાવર સ્ટેશનમાં પેદા થતી એનર્જીને માઇક્રોવેવ અથવા તો લેસર બીમથી પૃથ્વી પર મોકલાશે. સેટેલાઇટ મારફતે એનર્જીને પૃથ્વીના કોઇપણ ભાગમાં મોકલી શકાશે. એક ગીગાવોટ ક્ષમતાનું પાવરસ્ટેશન પૃથ્વીની ભ્રમણકક્ષામાં તરતું મુકવાની ચીનની યોજના છે.

જોકે અંતરીક્ષમાંથી સ્વચ્છ અને કયારેય ન ખુટે તેવી સુર્યની એનર્જી મેળવવાનો વિચાર નવો નથી. જાપાને 2008માં સ્પેસ લો પસાર કર્યો હતો. જેમાં અંતરીક્ષમાંથી સુર્યની ઉર્જા મેળવવી તેના મુખ્ય એજન્ડા પૈકીનો એક છે. જાપાન પહેલા તો નાના સેટેલાઇટ તરતા મુકશે અને તેના દ્વારા સુર્યની એનર્જી મેળવવાની શરુઆત કરશે.

જયારે 2030 સુધીમાં જાપાનની પણ એક ગીગાવોટનું સોલાર સ્પેસ સ્ટેશન બાંધવાની યોજના છે. જાપાનની જાપાન એરોસ્પેસ એક્સપ્લોરેશન એજન્સી સોલર એનર્જી મેળવીને તેને પૃથ્વી સુધી પહોંચાડી શકે તેવા સેટેલાઇટની ડિઝાઇન તૈયાર કરી રહી છે. આ સેટેલાઇટને પૃથ્વીથી 36 હજાર કિલોમીટર ઉપર જીયોસિન્ક્રોનસ કહેવાતી ભ્રમણકક્ષામાં સ્થાપિત કરાશે. જાપાને ઉર્જાને માઇક્રોવેવના સ્વરુપમાં એક સ્થળેથી બાજી સ્થળે મોકલાવાનો સફળ પ્રયોગ પણ કર્યો છે.