ચીન તેના પાડોશી 'મિત્ર' દેશ પાકિસ્તાનને પાક ખાઈ જતા તીડના ટોળાથી મદદ કરવા માટે 100000 બતક મોકલવા જઈ રહ્યા છે એવા અહેવાલ સામે આવ્યા છે.
નોંધનીય છે કે પાકિસ્તાને આ મહિને તીડની સમસ્યાને કટોકટી જાહેર કરીને કહ્યું હતું કે તીડની સંખ્યા 2 દાયકામાં સૌથી વધારે છે. એક કૃષિ નિષ્ણાતના મતે એક બતક આશરે 200 જેટલા તીડ દિવસમાં ખાઈ શકે છે આથી તેઓ તીડનો નાશ કરવા માટે સારો ઉપાય સાબિત થઇ શકે છે.
જો કે અન્ય એક નિષ્ણાતના મતે આ પ્રયોગ અસરકારક નીવડે એવું જરૂરી નથી. નોંધનીય છે કે લાખોની સંખ્યામાં જીવડાઓએ પૂર્વ આફ્રિકામાં કોહરામ મચાવ્યો છે. ચીનની સરકારે જાહેરાત કરી છે કે તેઓ નિષ્ણાતોની એક ટીમ પાકિસ્તાનને તીડના આ હુમલાથી બચાવવા માટે મોકલી રહ્યા છે. ચીનની એક જીવશાસ્ત્ર યુનીવર્સીટીના સંશોધનકારે કહ્યું છે કે બતક તીડ સામે એક પ્રકારના જૈવિક હથિયાર છે. મરઘા એક દિવસમાં 70 તીડ ખાય છે જયારે બતક એક દિવસમાં તેના કરતા 3 ગણા તીડ ખાઈ જાય છે. આ ઉપરાંત બતક સમૂહમાં રહેવાનું પસંદ કરે છે આથી તેમણે મરઘાઓ કરતા મેનેજ કરવી વધુ સરળ છે.
શરૂઆતના પ્રયોગ બાદ આ બતક પાકિસ્તાનના સૌથી વધુ અસરગ્રસ્ત સિંધ, બલોચિસ્તાન અને પંજાબ પ્રાંતમાં મોકલવામાં આવશે. જો કે એક મહત્વની સમસ્યા સામે આવી છે. નિષ્ણાતોના મતે બતકને પાણીની જરૂર પડે છે. પાકિસ્તાન જેવા રણ અને ગરમ પ્રદેશમાં બતક કેવી રીતે જીવતા રહેશે તે એક પ્રશ્ન છે. નોંધનીય છે કે 2000ની સાલમાં પણ ચીને ઝે જીઆંગ પ્રાંતથી શી જીઆંગ પ્રાંતમાં 30000 બતક આ જ સમસ્યાના સમાધાન માટે મોકલવામાં આવ્યા હતા.
UN મુજબ ૨૦૧૮-૧૯માં અરેબિયન વિસ્તારમાં આવેલા વધુ વરસાદને કારણે આશરે 3 પેઢી જેટલા વધારાના તીડ ઉદ્ભવ્યા જે અત્યારે કોહરામ મચાવી રહ્યા છે. આફ્રિકા પહેલેથી જ આ ટોળાને લીધે ત્રસ્ત થઇ ચુક્યા છે.