ચીનની સાથે LAC પર તણાવ વચ્ચે ભારત પોતાની બોર્ડરને સતત સુરક્ષિત કરતું જઇ રહ્યું છે. બોર્ડર રોડ ઓર્ગેનાઈઝેશન (BRO)એ લેહ જતા માર્ગોને સેના માટે તૈયાર કરવાની કામગીરીને ઝડપી બનાવી છે. ત્રીજા રોડનું કામ પૂર્ણતા તરફ છે, જેને નિમ્મૂ-પદમ-દરચા રોડ કહેવામાં આવે છે. હવે સેના LAC સુધી પહોંચી જશે અને ચીનને જાણ સુદ્ધા નહીં થાય.
ભારત-ચીન સરહદ વિવાદ વચ્ચે લેહ જતાં માર્ગની કામગીરી પુરજોશમાં
BRO આધુનિક મશીનોથી 24 કલાક કરી રહ્યું છે કામ
લેહ જતાં માર્ગોને સેના માટે તૈયાર કરવાની કામગીરી ઝડપી
ચીનની ધમકી વચ્ચે ભારતે દારચા અને લેહને જોડનારા હાઈવેનું કામ પૂરૂ થઇ ગયું છે. આ રસ્તેથી સૈનિકો માટે રસદ અને હથિયાર પહોંચાડવામાં ઘણી સરળતા રહેશે. આ માર્ગોથી ભારત-ચીન સીમા વિવાદ વચ્ચે સુરક્ષા દળોની હેવી મશીનરી તથા હથિયારોને જરૂરી લોકેશન પર પહોંચાડવામાં મદદ મળશે.
પહાડોને તોડીને માર્ગ બનાવવા વિસ્ફોટકોનો પણ થઇ રહ્યો છે ઉપયોગ
લેન્ડ સ્લાઈડ અથવા અન્ય કોઈ કારણથી બંધ થતા લેહને જોડતા દરેક માર્ગને દુરસ્ત કરવા માટે BRO 24 કલાક અને સાત દિવસ કામગીરી કરી રહ્યું છે. માર્ગની કામગીરી માટે અસરકારક બ્લાસ્ટિંગ માટે કરોડોની કિંમતની મશીનરીનો ઉપયોગ કરવામાં આવી રહ્યો છે. પહાડોને તોડીને માર્ગ બનાવવા વિસ્ફોટકોનો પણ ઉપયોગ થઇ રહ્યો છે. એટલું જ નહીં BRO વર્કર અને શ્રમિકો ડબલ શિફ્ટમાં તથા વીકેન્ડમાં પણ કામ કરવા માટે કહેવામાં આવ્યુ છે.
નવી વ્યૂહાત્મક નીતિના ભાગરૂપે લિંક રોડ બનાવવા થઇ રહ્યું છે કામ
ચીન સાથે જે તણાવભરી સ્થિતિ ચાલી રહી છે તેને જોતા કામગીરીને યુદ્ધસ્તર પર પૂરું કરવા પ્રયત્ન કરવામાં આવી રહ્યો છે. ભારત લદ્દાખ માટે એક નવી વ્યૂહાત્મક નીતિના ભાગરૂપે લિંક રોડ બનાવવા પર ઝડપભેર કામ થઈ રહ્યું છે.
સૂત્રોના જણાવ્યા પ્રમાણે આ માર્ગ હિમાચલ પ્રદેશના દાર્ચાને લદ્દાખ સાથે જોડશે. તેના મારફતે ઉંચાઈવાળા વિસ્તારોમાં બરફથી થિજી ગયેલા વિસ્તારોને પણ પાર કરવામાં સરળતા રહેશે. આશરે 290 કિમી લાંબા માર્ગને જવાનો તથા હથિયારોની લદ્દાખના સીમાવર્તી વિસ્તાર સુધી અવર-જવર કરી શકાશે. તે કારગીલના વિસ્તારને જોડતી મહત્વની કડી સાબિત થશે.