ચીન / દુનિયાભરમાં જીવલેણ કોરોના વાયરસથી ભયનો માહોલ, શી જિનપિંગની ચેતવણી, હજુ તો...

• ચીન સહિત દુનિયાભરમાં જીવલેણ કોરોના વાઈરસને કારણે ભયનો માહોલ ફેલાયો 
• ચીને જેલમાં કેદ 500 કેદીને કોરોના વાઈરસનો ચેપ લાગ્યો હોવાની સત્તાવાર પૃષ્ટિ કરી
• ચીનના રાષ્ટ્રપતિ શી જિનપિંગે ચેતવણી આપી, હજુ તો કોરોના વાઈરસનું ભયાનક રૂપ આવવાનું બાકી છે

અહીં પૂર્વ શેડોંગ પ્રાંતની રેનચેંગ જેલમાં સાત સિક્યોરિટી ગાર્ડ અને 200 કેદીનો રિપોર્ટ પોઝિટિવ આવ્યો છે. પૂર્વીય ઝોજિયાંગ પ્રાંતની શિલિફેંગ જેલમાં પણ 34 કેસ સામે આવ્યા છે. આ અગાઉ ગુરુવારે 271 કેસની પુષ્ટિ થઈ હતી. ચીનના વુહાનમાં કુલ 45,346 કેસ સામે આવ્યા છે.

ઘાતક કોરોના વાઈરસના કારણે ચીનમાં અત્યાર સુધીમાં 2,3000 થી વધુ લોકોએ જીવ ગુમાવ્યો છે. ચીનની જેલોમાં કોરોનાનો ચેપ ફેલાયા બાદ ચીનના રાષ્ટ્રપતિ શી જિનપિંગે અધિકારીઓને ચેતવણી આપતાં જણાવ્યું છે કે, હજુ તો કોરોના વાઈરસનું ભયાનક રૂપ આવવાનું બાકી જ છે. 

શી જિનપિંગે ગઈ કાલે શાસક કોમ્યુનિસ્ટ પાર્ટીના પોલિટ બ્યૂરોના સભ્યોને ચેતવણી આપી હતી કે, કોરોના વાઈરસથી સંક્રમિત લોકોની સંખ્યામાં ઘટાડો થવા છતાં તે હજુ ચરમસીમાએ પહોંચવાનો બાકી છે. હુબેઇ પ્રાંતમાં હજુ પણ પરિસ્થિતિ અત્યંત નાજુક છે, જે આ ખતરનાક વાઈરસથી સૌથી વધુ પ્રભાવિત છે. 

ચીનના રાષ્ટ્રપતિ શી જિનપિંગે કહ્યું હતું કે, કોરોના વાઈરસને ફેલાતો અટકાવવો જ પડશે. હુબેઇ પ્રાંત અને વુહાનને સુરક્ષિત રાખવા માટેની લડાઈ આક્રમક બનીને લડવી જોઈએ અને ચેપને ફેલાતો અટકાવવા માટે વધુ મજબૂત પગલાં ભરવાં જોઇએ. તેમણે કહ્યું હતું કે, તેઓ હાલ ચીનમાં આ વાઈરસ ચરમસીમાએ પહોંચે તેની આતુરતાથી રાહ જોઈ રહ્યા છે. એક વાર તે ચરમસીમાએ પહોંચે ત્યારે તેનો ચેપ ઘટવાનું શરૂ થઈ જશે. 

દરમિયાન, ચીનની સરકારે કોરોનાના દર્દીઓની સતત વધતી સંખ્યાને ધ્યાનમાં રાખીને 19 નવી શિફ્ટિંગ હોસ્પિટલ ખોલવાનો નિર્ણય લીધો છે. તેની ક્ષમતા 30,000 બેડની હશે. અત્યાર સુધીમાં વુહાનમાં 13 સ્થળોએ હોસ્પિટલો ઊભી કરવામાં આવી છે, જેમા 13,348 બેડની સુવિધા છે.

ચીનમાં દેશભરના 3,019 તબીબને કોરોના વાઈરસનો ચેપ લાગ્યો હતો, જેમાંથી 5 લોકોનાં મોત નીપજ્યાં છે. 18 ફેબ્રુઆરીએ વુહાન શહેરની વુછાંગ હોસ્પિટલના વડા 51 વર્ષીય લ્યુ ચીમિંગનું કોરોના વાઈરસનો ચેપ લાગ્યાં બાદ અવસાન થયું હતું.