ચીનમાં કોરોના વાઇરસના બદલે દુનિયાભરમાં ચિંતાનો માહોલ છે. વાઈરસ ન ફેલાય તે માટે ચીનમાં સુરક્ષા અને આરોગ્ય મામલે કડક કામ ચાલી રહ્યાં છે. જ્યારે હવે કોરોના વાઇરસના કારણે ક્રુડ ઓઈલના ભાવમાં ઘટાડો થાય તેવી સંભાવના છે.
ક્રૂડમાં મોટો કડાકોઃ પેટ્રોલ-ડીઝલના ભાવ ઘટે તેવી પુરી સંભાવના
ચીનમાં કોરોના વાઇરસના પગલે દુનિયાભરનાં શેરબજારોમાં અનિશ્ચિતતાનો માહોલ છે. વાઇરસ આઉટબ્રેકને લઇને ચીનમાં ડિમાન્ડ ઘટવાથી ક્રૂડ ઓઇલ પાંચ દિવસમાં છ ડોલરથી વધુ તૂટીને પ્રતિ બેરલ ૫૮.૫૦ની આસપાસ ટ્રેડ કરી રહ્યું છે, જે બે મહિનાની સૌથી નીચલી સપાટીએ છે. નિષ્ણાતોનું કહેવું છે કે હજુ પણ ક્રૂડ ઘટીને ૫૫ ડોલરથી નીચે જઇ શકે છે અને તેથી આગામી દિવસોમાં પેટ્રોલ ડીઝલના ભાવમાં પ્રતિલિટર રૂ. ચાર સુધીનો ઘટાડો થઇ શકે છે.
પેટ્રોલ-ડીઝલના ઘરેલુ ભાવમાં સતત ઘટાડો જારી છે. આજે પણ પેટ્રોલના ભાવમાં પ્રતિ લિટર ૧૧ પૈસા અને ડીઝલમાં ૧૩ પૈસા સુધીનો ઘટાડો નોંધાયો છે. પેટ્રોલના ભાવમાં દિલ્હી, કોલકાતા અને મુંબઇમાં ૧૧ પૈસા અને ચેન્નઇમાં ૧૨ પૈસાનો ઘટાડો નોંધાયો છે, જ્યારે ડીઝલમાં દિલ્હી-કોલકાતામાં પ્રતિ લિટર ૧૩ પૈસાનો, જ્યારે મુંબઇમાં ૧૪ પૈસાનો અને ચેન્નઇમાં ૧૨ પૈસાનો ઘટાડો નોંધાયો છે. પેટ્રોલ-ડીઝલના ભાવ આગામી દિવસોમાં હજુ ઘટશે.