અમેરિકા અને તેના પ્રમુખ ડોનાલ્ડ ટ્રમ્પ સતત ચીન પર ગંભીર આરોપ લગાવી રહ્યા છે કે, ઘાતક કોરોના વાઈરસને વુહાનની એક લેબમાં તૈયાર કરવામાં આવ્યો હતો અને ચીને સંક્રમણ ફેલાયું હોવા છતાં પણ બાકીના દેશોને આ મહામારીની ગંભીરતા પ્રત્યે ચેતવ્યા નહીં. હવે હાર્વર્ડ મેડિકલ સ્કૂલના એક રિસર્ચમાં સામે આવ્યું છે કે, ચીનમાં ઓગસ્ટ મહિનામાં જ સંક્રમણ ફેલાયું હોવાના પુરતા પુરાવા છે. ચીને દુનિયાને કોરોના સંક્રમણની જાણકારી છેક ૩૧ ડિસેમ્બરે આપી હતી.
ચીનમાં ઓગસ્ટમાં જ સંક્રમણ ફેલાયું હોવાના પુરાવા
સેટેલાઇટ ઇમેજરીની મદદથી કરાયો દાવો
કોરોના વાઈરસથી દુનિયાભરમાં ૭૦ લાખથી વધુ લોકો સંક્રમિત થઈ ચૂક્યા છે, જ્યારે ચાર લાખથી વધુ લોકો પોતાનો જીવ ગુમાવી ચૂક્યા છે. અમેરિકા સહિત અનેક દેશ સતત એવો આરોપ લગાવી રહ્યા છે કે, કોરોનાના ફેલાવાને રોકવાને લઈને ચીન સાચું નથી બોલી રહ્યું અને તેની સાથે જોડાયેલા પુરાવાઓ પણ છુપાવી રહ્યું છે. જોકે ચીને આ તમામ ગંભીર આરોપોને ફગાવી દીધા છે.
ચીન સતત કહી રહ્યું છે કે, તેણે બધું જ વર્લ્ડ હેલ્થ ઓર્ગેનાઈઝેશન (ડબ્લ્યુએચઓ) અને અન્ય એજન્સીઓની સાથે શેર કર્યું છે. તેથી હાર્વર્ડ મેડિકલ સ્કૂલના એક રિસર્ચમાં દાવો કરવામાં આવ્યો છે કે સંભવતઃ ચીનમાં વાઈરસનો ફેલાવો ડિસેમ્બરથી ઘણા મહિના પહેલા જ શરૂ થઈ ચૂક્યો હતો.
આ રિસર્ચ ટીમના સભ્યો દ્વારા કોમર્શિયલ સેટેલાઇટ ઇમેજરીની મદદથી ચીનના વુહાન શહેરની કેટલીક તસવીરોનું અધ્યયન કરવામાં આવ્યું છે. આ તસવીર વર્ષ ૨૦૧૯ના ઓગસ્ટ મહિનાની છે. તેમાં વુહાન શહેરની હોસ્પિટલોની બહાર મોટી સંખ્યામાં વાહનો જોવા મળી રહ્યા છે. આ પહેલાના મહિનાઓમાં અને તેનાથી છેલ્લા કેટલા વર્ષોમાં વુહાનમાં આ પ્રકારની ભીડ માત્ર સંક્રમણના કારણે જ જોવા મળી છે. સ્ટડી મુજબ, શક્ય છે કે રિપોર્ટ કરતાં પહેલા જ ચીનમાં કોરોનાનો પ્રકોપ શરૂ થઈ ચૂક્યો હતો.
એવું પણ શક્ય છે કે, ઘણા સમય સુધી ચીનને ખુદને જ તેની જાણકારી ન હોય. રિસર્ચ મુજબ, ઓગસ્ટ મહિનાથી જ વુહાનની પાંચ મોટી હોસ્પિટલોની બહાર આશ્ચર્યજનક રીતે વાહનોની ભીડ જોવા મળી હતી. જોકે એવું પણ શક્ય છે કે, જે લોકો હોસ્પિટલ પહોંચ્યા તેમને વાતાવરણના કારણે શરદી-ઉધરસ-તાવ અને ડાયરિયાના દર્દી સમજીને તેમની સારવાર કરવામાં આવી હોય. કોરોનાનાં લક્ષણ પણ સામાન્ય છે અને ડોક્ટરોને આ વિશે ખબર જ નહીં પડી હોય.
આ રિસર્ચને લીડ કરી રહેલા ડો. જોન બ્રાઉનસ્ટેનું કહેવું છે કે, પુરાવાઓ પરિસ્થિતિ જન્ય છે, પરંતુ એક ટીવી ઇન્ટરવ્યૂમાં તેમણે કહ્યું કે, આ તથ્ય વાઈરસની ઉત્પત્તિને સમજવામાં મહત્વપૂર્ણ ભૂમિકા નિભાવશે. તેમણે કહ્યું કે, ઓક્ટોબરમાં કંઈક થઈ રહ્યું હતું એ વાત ચોક્કસ છે. સ્પષ્ટ રીતે કોરોના વાઈરસ મહામારીની શરૂઆત માનવામાં આવતા પહેલા કંઈક તો એવું થયું હતું, જેના કારણે વુહાનની હોસ્પિટલોમાં આટલી મોટી ભીડ એકઠી થઈ હતી.
ઉલ્લેખનીય છે કે, ચીને ડિસેમ્બર, ૨૦૧૯ની શરૂઆતમાં ડબ્લ્યુએચઓને ન્યૂમોનિયા જેવી કોઈ ગંભીર બીમારી સામે આવવાની વાત કહી હતી. ૩૧ ડિસેમ્બરે ચીને કોરોના સંક્રમણ ફેલાવાની સત્તાવાર જાહેરાત કરી દીધી હતી.