પ્રતિક્રિયા / ક્વાડ દેશોની બેઠક પછી ધૂંધવાયેલા ચીનનું રિએક્શન, કહ્યું 'અમે આ વ્યવસ્થાના ચેમ્પિયન છીએ'

• ક્વાડ દેશોની બેઠક પછી ચીનની પ્રતિક્રિયા 
• અમેરિકાને તાર્કિક રીતે વિચારવાની સલાહ આપી 
• ચીને કહ્યું આનાથી વ્યવસ્થા બરબાદ થઈ જશે

નોંધનીય છે કે અમેરિકી રક્ષા મંત્રી આ અઠવાડિયે ભારત આવવાના છે અને તેને લઈને પણ ચીનની બેચેની સામે આવી છે, ચીની વિદેશ મંત્રાલયે તેના નિવેદનમાં કહ્યું છે કે આવા નાના સમૂહો બનાવવાથી આંતરરાષ્ટ્રીય વ્યવસ્થા તબાહ થઇ જશે.

12 માર્ચે પહેલી સમિટ થઈ હતી 

ચીની વિદેશ મંત્રાલયના પ્રવકતા ઝાઓ લિજિયાનને ન્યુઝ એજન્સી રોઈટર્સ દ્વારા સવાલ કરવામાં આવ્યો હતો, ક્વાડ દેશો દ્વારા 12 માર્ચે પોતાની પહેલી સમિટ કરવામાં આવી હતી, અને આ મુદ્દે અમેરિકાના રાષ્ટ્રીય સુરક્ષા સલાહકાર દ્વારા ચીનની જોહુકમી સામેનું ગઠબંધન કહેવામાં આવ્યું હતું આના વિષે તમે શું કહેશો?

ચીની પ્રવકતાએ જવાબમાં કહ્યું હતું કે અમુક દેશો ચીનને કથિત ખતરાના રૂપમાં વધારે ચઢાવીને દેખાડી રહયા છે જો કે તેમની ગતિવિધિઓ શાંતિ, સહકાર અને તે દેશોના લોકોની આકાંક્ષાઓની વિરુદ્ધ છે , આવા દેશો તેમના લક્ષ્યોમાં સફળ નહીં થાય. 

ચીનને કાઉન્ટર કરવાની ક્ષમતા મેળવવી અમારું લક્ષ્ય : અમેરિકા 

નોંધનીય છે કે અમેરિકી સંરક્ષણ મંત્રી લોયડ ઓસ્ટીને એક નિવેદનમાં કહ્યું હતું કે અમેરિકા અને તેના સહયોગી દેશોનો એક જ લક્ષ્ય છે કે તેઓ ચીનને કાઉન્ટર કરવાની મજબૂત ક્ષમતા મેળવે. આને લઈને પણ ચીનના વિદેશ મંત્રાલયે કહ્યું હતું કે ચીન આ દુનિયા માટે એક અવસર છે, કોઈ પડકાર કે આપદા નથી, ચીને સંયુક્ત રાષ્ટ્રની વ્યવસ્થાનું મજબૂતીથી પાલન કર્યું છે, અમે જે વૈશ્વિક વ્યવસ્થાના ચેમ્પિયનપ બન્યા છીએ, તે આંતરરાષ્ટ્રીય કાયદાઓ પર આધારિત છે, કોઈ દેશોના માપદંડો પર બનેલી વ્યવસ્થા નથી. આ સિવાય ચીને અમેરિકાને તેમના સંબંધોને લઈને તાર્કિક રીતે વિચારવાની સલાહ આપી હતી.