ઉતરાયણને હજુ એક દિવસની વાર છે ત્યાં માતા-પિતા માટે આંખ ઉઘાડનારી ઘટનાઓ સામે આવી રહી છે. જેમાં બાળકો પતંગ ચગાવવા અને પકડવાની લ્હાયમાં અગાસી, રેલવે ટ્રેક અને રોડ પર દોડતા જોવા મળે છે જે ગંભીર અકસ્માતનો ભોગ બને છે. ત્યારે ઉતરાયણ પહેલા અગાસી પરથી પડવા અને પતંગ પકડવાની ધૂનમાં અકસ્માત સર્જાયા છે.
રાજકોટના ટંકારાના ઝાલા ગામમાં કિશોર ત્રીજા માળેથી પટકાતા મોત
જોધપરમાં પતંગ ચગાવતા ત્રીજા માળેથી પટકાતા 12 વર્ષના તરૂણનું મોત
ગુજરાતમાં ઉતરાયણના પર્વની ધુમધામથી ઉજવણી કરવામાં આવે છે. ત્યારે કેટલીક ગંભીર ઘટનાઓ પણ સામે આવી છે. જોખમી ચાઈનિઝ દોરી-તુક્કલના વેચાણ પર પ્રતિબંધ હોવા છતા વેચાણ થઇ રહ્યું છે. ત્યારે આવી દોરી લોકોના ગળા કાપી રહી છે. તો બીજી તરફ અત્યાર સુધી ઉતરાયણ પૂર્વે પતંગ પકડવા માટે અગાસી પરથી પડી જવાના ચાર જેટલા બનાવો સામે આવી ચૂક્યા છે.
રાજકોટઃ પતંગ ચગાવતા કિશોરનું ત્રીજા માળેથી પટકાતા સારવાર દરમિયાન મોત
રાજકોટના ટંકારાના ઝાલા ગામમાં કિશોર ત્રીજા માળેથી પટકાયો છે. આ કિશોરનું રાજકોટ સિવીલમાં સારવાર દરમિયાન મોત થયુ છે. આ કિશોર પતંગ ચગાવતા ત્રીજા માળેથી પટકાયો હતો.
વડાલીમાં બાળક અગાસી પરથી પડકાયો, ગંભીર ઈજા પહોંચી
સાબરકાંઠાના વડાલીમાં બાળક અગાસી પરથી પટકાયો હતો. પતંગ ચગાવવા જતા પવન સગર નામનો બાળક અગાસી પરથી પટકાયો હતો. જેને લઈને તેને માથાના ભાગે ગંભીર ઈજા પહોંચી હતી. આથી બાળકને સારવાર અર્થે ઈડરની ખાનગી હોસ્પિટલમાં ખસેડવામાં આવ્યો હતો.
રવિવારે સુરતમાં 6ઠ્ઠા ધોરણમાં અભ્યાસ કરતો વિદ્યાર્થી ઈમામ પતંગ પકડવાની લ્હાયમાં દોડતા દોડતા તે રેલ્વે ટ્રેક પર પહોંચી ગયો હતો. આ વિદ્યાર્થી પતંગ લેવા જતાં ટ્રેન નીચે આવી ગયો હતો. ઉધના રેલવે લાઇનની ટ્રેન નીચે વિદ્યાર્થી આવતા ઈજાગ્રસ્ત થયો હતો. 108ની મદદથી સારવાર માટે આ બાળકને સિવિલમાં ખસેડવામાં આવ્યો છે. તે મિત્રો સાથે પતંગ પકડવા ગયો હતો.
જોધપરમાં પતંગ ચગાવતા ત્રીજા માળેથી પટકાતા 12 વર્ષના તરૂણનું મોત
રવિવારે ટંકારાના જોધપરા ઝાલા ગામે રહેતા 12 વર્ષના યશ પરમાર ત્રીજા માળે પતંગ ચગાવવા ચડ્યો હતો. પતંગ ઉડાડવાની મજામાં મસ્ત બનેલો આ માસુમનો અકસ્માતે પગ લપસતા ત્રીજા માળેથી નીચે પટકાયો હતો. તેને ગંભીર ઇજા થતાં સારવાર માટે ટંકારાની હોસ્પિટલમાં ખસેડાયો હતો. ત્યાંથી વધુ સારવાર માટે રાજકોટ સિવિલ હોસ્પિટલમાં લાવવામાં આવ્યો હતો. પરંતુ અહીં આજે સવારે દમ તોડી દેતાં સ્વજનોમાં કલ્પાંત સર્જાયો હતો.
અમદાવાદમાં પતંગ ચગાવવાની બાબતે ઘર્ષણ
અમદાવાદમાં પતંગ ચગાવવા બાબતે મારી મારી થઈ છે. આસ્ટોડિયા વિસ્તારમાં પતંગ ચગાવવાને લઈ મારા મારી થઈ છે. ચાર શખ્સોએ હથિયાર વડે યુવક પર હુમલો કરતા યુવકને ભારે ઇજા થઈ છે. ત્યારે આ ઘટનાની જાણ ખાડિયા પોલીસને થતા ઘટનાસ્થળે પહોંચીને યુવકને સારવામાટે ખસેડીને વધુ તપાસ હાથ ધરી છે.