વિકાસ. નામ તો સાંભળ્યું જ હશે. પણ વિકાસ ક્યાં અને કેટલો થયો કોઈ નથી જાણતું. કાકવાડા ગામના મજબૂર ગ્રામજનો જે વર્ષોથી એક બ્રિજની માગ કરી રહ્યા છે.
વિકાસના અભાવે જીવ જોખમમાં
ચલો સ્કૂલ ચલે હમ....પણ નદી અવરોધે છે
નદીમાં પૂર આવે તો બગડે છે ભણતર
ભૂલકાઓના સંઘર્ષને કોણ સમજશે?
પાણીમાં છબછબીયા મારતા આ બાળકોને જુઓ. આ દ્રશ્ય તમને સ્તબ્ધ કરી શકે છે. હાથમાં બેગ છે. પાયજામા ઉપર ચઢાવી દીધા છે. અને ખળખળ વહેતી આ નદીમાંથી પસાર થઈ રહ્યા છે. 5થી 10 વર્ષના આ ભૂલકા જીવ જોખમમાં મુકીને નદી પાર કરી રહ્યા છે. શું કરે મજબૂરી છે. કેમ કે ભણવું છે. સ્કૂલ નદીની આ સાઈડ છે. તો ગામ નદીની સામેની સાઈડ. આ દ્રશ્ય છે બનાસકાંઠા જિલ્લાના અમીરગઢ તાલુકાના કાકવાડા ગામના. બનાસકાંઠાની મુખ્ય ગણાતી બનાસ નદીના આ દ્રશ્ય છે. જેને આ બાળકો જીવના જોખમે પાર કરી રહ્યા છે.
ભણતર માટે જીવ મુકે છે જોખમમાં
ગતિશિલ ગુજરાતના આ દ્રશ્ય સૌ કોઈને ચોંકાવી દેશે. વિકાસની વાતો તો થઈ રહી છે. પણ જમીની સ્તરે કેટલો વિકાસ થયો છે તે અહીં સ્પષ્ટ પણે દેખાઈ રહ્યું છે. હાલ તો બનાસ નદીમાં ઢીંચણસમા જ પાણી છે. પણ જો પાણી વધું આવ્યું તો આ બાળકો શાળાએ નથી જઈ શકતા. અને ભણતર પણ બગડે છે. પણ બાળકોને ભણવું છે. માટે જ માથે દફતર ઉપાડીને દિવસમાં બે વાર નદી પાર કરે છે. આ સ્થિતિનો સામનો માત્ર શાળાના બાળકો જ નહીં પણ ગ્રામજનો પણ કરી રહ્યા છે. વર્ષોથી આ સમસ્યાનો સામનો કરી રહેલા ગ્રામજનોના મતે નદીમાં ભારે પૂર આવે ત્યારે ગ્રામજનો ગામ બહાર નથી જઈ . ગુજરાત સરકારના ભણશે ગુજરાતના દાવામાં કેટલી સત્યતા છે તેની આ નરી વાસ્તવિકતા છે. ગ્રામજનોના મતે નદીના પટમાં કોઝ-વે કે પછી નાળુ બનાવવા માટે તંત્ર અને રાજકીય નેતાઓને અનેકવાર રજૂઆત કરી છે. છતાં આજ દિન સુધી ઉકેલ આવ્યો નથી.
નિંદ્રાધિન અધિકારીઓ ક્યારે જાગશે?
કાકવાડા ગામમાં રહેતા પશુપાલકો પણ પરેશાન છે. કેમ કે ગામમાં પરત જવા માટે નદી પાર કરવી પડે છે. આસપાસના 10 ગામના લોકોને અહીંથી જીવના જોખમે પસાર થવું પડે છે. તો આ મુદ્દે માર્ગ મકાન વિભાગે જણાવ્યું કે ટૂંક સમયમાં કોઝ-વેનું કામ શરૂ કરવામાં આવશે. વર્ષોથી જીવ જોખમમાં મુકતા કાકવાડા ગામના લોકોની માગ આખરે સંતોષાવા જઈ રહી છે. અને ટૂંક સમયમાં જ કોઝ-વેનું કામ શરૂ થશે તેવો દાવો કરવામાં આવી રહ્યો છે. ત્યારે જોવું રહ્યું કે ગ્રામજનોની મુશ્કેલીનો અંત ક્યારે આવે છે.