ભરૂચ / માતા-પિતા શેરડી કાપી રહ્યા હતા અને દીપડો બાળકને લઇ ભાગ્યો, પછી મળ્યાં ચોંકાવનારા સમાચાર

• પાંચ વર્ષના બાળક પર દીપડાનો હુમલો
• સારવાર દરમિયાન બાળકનું મોત
• છેલ્લા એક સપ્તાહમાં ત્રીજી ઘટના

સુરત જીલ્લાના માંડવી બાદ હવે ભરૂચના અંકલેશ્વર તાલુકાના ભરણ ગામે દીપડાએ ખેતરમાં રમી રહેલા 5 વર્ષીય કિશન વળવી પર હુમલો કર્યો છે. કિશનના માતા-પિતા ખેતરમાં શેરડી કાપી રહ્યા હતા અને બાળક નજીકમાં જ રમી રહ્યું હતું. ત્યારે અચાનક શેરડીમાંથી નીકળીને આવેલા દીપડાએ કિશનને ગળાના ભાગેથી પકડી ખેતરમાં ભાગ્યો હતો. 

પરંતુ માતા-પિતા સહિત શેરડી કાપી રહેલા અન્ય મજુરો પાછળ ભાગતા દીપડો કિશન લોહી નીતરતી હાલતમાં મૂકીને ફરાર થઇ ગયો હતો. આ ઘટના બાદ બાળકને તરત જ નજીક કોસંબાની આરફ અને ત્યારબાદ કીમની સાધના હોસ્પિટલ ખાતે ખસેડવામાં આવ્યો હતો જ્યાં સારવાર દરમ્યાન બાળકનું મોત નીપજ્યું હતું.

આરફ હોસ્પિટલમાં પ્રાથમિક સારવાર બાદ કિશનની હાલત વધુ ગંભીર થતા એને કીમની સાધના હોસ્પિટલમાં ખસેડાયો હતો. કિશનની હાલત વધારે વધુ ગંભીર થતા તેને સુરતની સ્મીમેર હોસ્પિટલમાં ખસેડવાની તજવીજ હાથ ધરાઇ હતી પરંતુ કિશનને દમ તોડી દીધો હતો.

છેલ્લા એક સપ્તાહથી સુરત જીલ્લાના આ વિસ્તારમાં દીપડાના હુમલાની આ ત્રીજી ઘટના બની છે. વન વિભાગ પણ દીપડાને પકડવા પુરતા પ્રયત્ન કરી રહ્યું છે. વન વિભાગ દ્વારા પીંજરા ગોઠવવામાં આવ્યા છે, કેમેરા લગાવવામાં આવ્યા છે. સાથે સાથે ડીજી વગાડી જાણ જાગૃતિ પણ ફેલાવવામાં આવી રહી છે.