છોટા ઉદેપુરનાં નસવાડીમાં કોઝ-વે પર પાણીનાં ભારે પ્રવાહ વચ્ચે એક કાર ફસાઈ ગઇ હતી. આ કાર ગઢ બોરિયાદમાં આવેલા કોતર પર આવેલા કોઝ વે પર ફસાઈ હતી. જેમાં એક દંપતિ ફસાઈ ગયું હતું. પાણીનાં પ્રવાહમાં કારમાં બે જિંદગીઓ ફસાઈ ગઈ હતી. ત્યારે સ્થાનિક લોકોએ પાણીનાં પ્રવાહમાં ફસાયેલી આ બે જિંદગીને બચાવવા માટે રેસ્ક્યુ ઓપરેશન હાથ ધર્યું હતું.
આ જોઇને નદી કિનારે ઉભેલા ત્યાં સ્થાનિક લોકોનાં પણ જીવ તાળવે ચોંટી ગયા હતાં. તો સ્થાનિક લોકોએ પણ પોતાના જીવની પરવા ન કરી અને નદીનાં પ્રવાહમાં કારમાં ફસાયેલા દંપતિને બચાવવા માટે નદીનાં પ્રવાહ સામે ઝઝુમ્યાં અને આખરે સ્થાનિક લોકો સફળ રહ્યાં અને દંપતિને બચાવી લીધું અને તેમને નદી કિનારે લઈ ગયાં.
જો કે આ કાર પાણીનાં પ્રવાહમાં નદીમાં તણાઈને ઘણી દૂર જતી રહી હતી. જો કે અહીં વીટીવી લોકોને અપીલ કરે છે કે કોઈ પણ લોકો નદીનાં પ્રવાહમાં આ રીતે જીવ જોખમમાં ન મુકે. પોતાનો જીવ જોખમમાં મુકીને આ રીતે નદીને ક્રોસ ન કરો. કારણ કે તમારો જીવ કિંમતી છે. ઘરે તમારા પરિવારજનો તમારી રાહ જોતા હશે. જેથી વીટીવીની અપીલ છે કે આ રીતે જીવ જોખમમાં ન મુકશો. અહીં તો સ્થાનિક લોકો દંપતીનાં વ્હારે આવ્યાં. પણ જો ન આવ્યાં હોત તો કદાચ આ દંપતીનો જીવ પણ જઈ શકતો હતો.
ઉલ્લેખનીય છે કે છોટા ઉદેપુર જિલ્લામાં મેઘરાજા સતત અવિરતપણે વરસી રહ્યાં છે, જેને પગલે નદીઓમાં નવા નીરની આવક થઈ છે. છોટા ઉદેપુર જિલ્લાની ચાર નદીઓ જેમાં ક્વાંટ તાલુકાની કરા નદી, બોડેલી તાલુકાની હેરણ નદી, નસવાડી તાલુકાની અશ્વિન નદી અને છોટા ઉદેપુરની ઓરસંગ નદી.
આ તમામ નદીઓનાં ઉપરવાસમાં સતત વરસી રહેલા વરસાદને પગલે નદીઓમાં ઘોડાપૂર જેવી સ્થિતિ સર્જાઇ છે અને નદીઓ બે કાંઠે વહેતી થઈ ગઇ છે. ત્યારે એવા સમયે જ નસવાડીનાં ગઢ બોરીયાદ નજીક કોઝ વે ઉપર કાર ફસાઇ જતા કાર તણાવા લાગી હતી. જેથી કારમાં એક દંપતી ફસાયું હતું તે એકાએક તણાવા લાગ્યું. જો કે તે દંપતિને ત્યાંના સ્થાનિક લોકોએ બચાવ્યું હતું.