છોટાઉદેપુર જિલ્લામાં ધોધમાર વરસાદના પગલે મેરિયા નદીમાં ઘોડાપૂર આવ્યું છે. રણભૂનના રસ્તા પર આવેલી મેરિયા નદીમાં ઘોડાપૂર આવતા લોકોને રસ્તો પાર કરવામાં મહામુશ્કેલીઓનો સામનો કરવો પડયો હતો અને ગામના લોકો જીવના જોખમે નદી પાર કરી રહ્યા છે.
ધસમસતા પ્રવાહમાં લોકો નદીના પૂરમાંથી આવન જાવન કરી રહ્યા છે. છતાં તંત્રના પેટનું પાણી હલતું નથી. બીજી તરફ નદીમાં ઘોડાપૂર આવાના પગલે કિનારા પર 70 જેટલા બાળકો ફસાયા હતા. નાની બુમલી મોટી બુમલી પાટીયા બુટીયાપુરા ગામના બાળકો ફસાયા હતા પાણી ઓછું થતાં બાળકોને નદી પાર મોકલવામાં આવશે. ઉલ્લેખનીય છે કે ધોધમાર વરસાદના પગલે અનેક નદીઓ જળાશયોમાં નવા નીર આવ્યા છે.
ઉલ્લેખનીય છે કે હાલ સમગ્ર ગુજરાતમાં મેઘ મહેર યથાવત છે અને બે દિવસથી મધ્ય ગુજરાતમાં વરસાદ વરસી રહ્યો છે. છોટા ઉદેપુર જીલ્લામાં ગઇકાલે એક ઇંચ જેટલો વરસાદ પડ્યો હતો. પરંતુ ગઇકાલે રાત્રે પંચમહાલ જીલ્લાના જાંબુઘોડા પંથકમાં એક જ રાતમાં ૪ ઇંચ જેટલો વરસાદ વરસતા છોટા ઉદેપુર જીલ્લામાથી પસાર થતી મેરીયા નદીમાં આજે સવારે ઘોડા પૂર આવ્યા હતા.
આપને જણાવી દઇએ કે મેરીયા નદીમાં ઘોડાપૂર આવતા જ રણભૂન ખાતે લો લેવલ કોજ વે ઉપર પાણી ફરી વળ્યા હતા અને રસ્તા પર અવર જવર બંધ થઈ ગઈ હતી. પરંતુ પંથકના ગામો પાટીયા મોટા બુટીયાપૂરા મોટી બૂમડી નાની બૂમડીના ગામના લોકોને રોજીંદો વહેવાર રણભૂન ગામમાં હોય લોકોને જવા આવવામાં ભારે મુશ્કેલીનો સામનો કરવો પડી રહ્યો છે.
કેટલાય લોકો આ કોજવે પરથી પાણી પસાર થતાં હોવા છતાંય જીવના જોખમે ચાલતા અને કેટલાક યુવાનો બાઇક લઈને નદીના ધસમસતા પ્રવાહમાંથી પસાર થઈ રહ્યા છે. આ અંગે રજૂઆતો કરી હોવા છતાય કોઈ પરીણામ આવ્યું નથી તેવું સ્થાનિક લોકો જણાવી રહયા છે.