રાજ્યમાં આ ચોમાસામાં મેઘો કંઈક વધારે જ મહેરબાન થઈ ગયો છે. છોટા ઉદેપુર જીલ્લામાં ભારે વરસાદને પગલે ઠેર ઠેર તબાહીના દ્રશ્યો જોવા મળી રહ્યા છે. કવાંટ તાલુકામાં ભારે તબાહી જોવા મળી રહી છે. ભારે વરસાદને પગલે પ્રવાસન સ્થળ હાફેશ્વરને જોડતા રોડ પરના બે મીની પુલ તૂટી જતાં હાફેશ્વર સંપર્ક વિહોણું બની ગયું છે.
બે પુલ તૂટી જવાથી હાફેશ્વર સંપર્ક વિહોણું
ઉલ્લેખનીય છે કે, છોટાઉદેપુર જીલ્લામાં ભારે વરસાદે તારાજીના દ્રશ્યો સર્જ્યા હતા. તેમા કવાંટ તાલુકામાં વરસાદે ખૂબ તબાહી મચાવી હતી. ભારે પૂરને પગલે કેટલીય જગ્યાએ નાળા તેમજ પુલ પણ તૂટી ગયા હતા. જેમાં જિલ્લાનું મહત્વનું પ્રવાસન સ્થળ અને નર્મદા નદીના ગુજરાતમાં પ્રવેશદ્વાર એવા હાફેશ્વર જવાના રસ્તા પર જ બે પુલ તૂટી જવાથી હાફેશ્વર સંપર્ક વિહોણું બની ગયું છે. જેના કારણે ગ્રામજનોને અવર જવર માટે જાતે જ વૈકલ્પિક વ્યવસ્થા ઊભી કરવી પડી છે.
ગ્રામજનો પાસે કવાંટ જવા બીજો વિકલ્પ નથી
કેમ કે, ગ્રામજનો પાસે કવાંટ જવા માટે બીજા કોઈ રસ્તાનો વિકલ્પ નથી. છેલ્લાં એક મહીના સુધી તંત્રની રાહ જોયા બાદ આખરે નિરાશ થઈને લોકોએ જાતે જ વીજળીના લોંખડના પોલ ગોઠવીને કામચલાઉ પુલ બનાવ્યો છે. લોકો આ પુલ પરથી જીવના જોખમે પસાર થઈ રહ્યા છે.
બાઈકચાલક હોય કે, પગપાળા ચાલતા મુસાફરો હોય તે સહુ પોતે તેમજ પોતાનો સામાન સાચવતા કેવી રીતે આ પુલ પરથી પસાર થઈ રહ્યા છે. આ રસ્તા પરથી સ્થાનિક લોકો બાઇક, જીપ અને ટ્રેક્ટર લઈને જીવના જોખમે પસાર થઈ રહ્યા છે. આટલું જ નહીં અહીં આવતા પ્રવાસીઓ પણ ભારે મુશ્કેલી વેઠી રહ્યા છે.
તંત્ર લઇ રહ્યું છે કુંભકરણની ઊંઘ
લોકો છેલ્લાં એક મહીનાથી આટલી હાલાકી ભોગવી રહ્યા હોવા છતાં હજુ સુધી વહીવટી તંત્ર દ્વારા હાફેશ્વરને કવાંટ સાથેનો સંપર્ક શરૂ કરાવવા માટે કોઈ પગલાં ભરવામાં આવ્યા નથી. હાફેશ્વર કવાંટનો રસ્તો બંધ હોવા છતાય વહીવટી તંત્ર દ્વારા કોઈ વૈકલ્પિક વ્યવસ્થા કરવામાં આવી નથી. જ્યારે મીડિયાએ ગ્રાઉન્ડ ઝીરો પરની સ્થિતિ વિશે અધિકારીઓ સાથે વાત કરી તો તંત્રએ બે દીવસમાં ડાઇવર્ઝન બનાવીને રસ્તો ચાલુ કરવાની બાંયધરી આપી હતી.
હાલ તો હાફેશ્વરના ગ્રામજનો તેમજ પ્રવાસીઓ પોતાનો રોજીંદો વ્યવહાર સાચવવા માટે જીવના જોખમે પુલ પરથી પસાર થઈ રહ્યા છે. હવે વહીવટીતંત્ર આ પુલનું રીપેરીંગ ક્યારે કરાવશે તે જોવું રહ્યું.