કોઈ પણ સાયબર છેતરપિંડીથી બચવાનો સૌથી સરળ રસ્તો એ છે, કોઈ પણ અજાણી લિંક પર ક્લિક કરવી નહીં અને ચુકવણી કરશો નહીં. તમારી બેન્કિંગ વિગતો, ઓટીપી અને ડેબિટકાર્ડ પાસવર્ડ કોઈ સાથે શેર કરશો નહીં.
એપમાં રેટિંગ સુધારાના નામે ઠગાઈ
ઠગ ટોળકીએ યુવક પાસેથી 10.30 લાખ પડાવ્યા
મફત ભેટનું વચન આપતા કોલથી સાવચેત રહો
અમદાવાદમાં ઓનલાઇન ઠગાઈ કરતી ટોળકી દ્વારા અનેક પ્રકારની લોભામણી સ્કીમો મૂકી લોકોને ફસાવવામાં આવી રહ્યા હોવાના વારંવાર બનાવ બની રહ્યા છે ત્યારે ઇસ્કોન ખાતે નોકરી કરતા એક યુવકને ગઠિયાઓએ મોબાઈલ એપ્લિકેશનમાં સર્વેનું કામ કરી તેનું રેટિંગ સુધારી આપીશું તેમજ કમિશનની આવક ઊભી કરવાના નામે ફસાવીને 10.30 લાખ પડાવી લીધા છે.
વધુ માહિતી માટે ટેલિગ્રામનો સંપર્ક કરવાનું લખ્યું હતું
હાથીજણ ખાતે રહેતા અને ઇસ્કોન ખાતે ખાનગી કંપનીમાં સિનિયર ટીમ લીડર તરીકે નોકરી કરતા બ્રિજેશ ગજ્જરે પોલીસ સ્ટેશનમાં ઠગાઈની ફરિયાદ નોંધાવી છે. બ્રિજેશના વોટ્સઅપમાં મોબાઈલ એપ્લિકેશનના સર્વેનું કામ કરી તેનું રેટિંગ સુધારવાનું કામ કરી કમિશન પણ આપવામાં આવશે તેવો મેસેજ આવ્યો હતો, જેથી વધુ માહિતી માટે ટેલિગ્રામનો સંપર્ક કરવાનું લખ્યું હતું.
ગઠિયાની વાતમાં આવીને કુલ 10.30 લાખ રૂપિયા ડિપોઝિટ કરી
બ્રિજેશ ટેલિગ્રામ એપ્લિકેશન ગ્રૂપમાં જોડાઈ ગયો હતો, જેમાં બ્રિજેશને સર્વેના કામ પહેલાં ડિપોઝિટ કરવાનું કહ્યું હતું. બ્રિજેશે ગઠિયાની વાતમાં આવીને કુલ 10.30 લાખ રૂપિયા ડિપોઝિટ પેટે ઓનલાઇન ટ્રાન્સફર કરી દીધા હતા. ત્યાર બાદ ગઠિયાઓ બ્રિજેશ પાસે વધુ રૂપિયાની માગણી કરતા હતા. આથી બ્રિજેશે વધુ રૂપિયા આપવાની ના પાડી હતી અને ગઠિયા પાસે રૂપિયા પરત માગ્યા હતા. ગઠિયાઓએ બ્રિજેશને કહ્યું હતું કે પેનલ્ટીની રકમ ભરો. ત્યારબાદ અમે તમને રૂપિયા ઓનલાઈન ટ્રાન્સફર કરીશું. ગઠિયાઓએ આમ કહેતાં બ્રિજેશને તેની સાથે ફ્રોડ થયું હોવાની જાણ થઈ હતી. બ્રિજેશે આ અંગે સાયબર ક્રાઇમ પોલીસ સ્ટેશનમાં ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.
છેતરપિંડીથી બચવાનો સૌથી સરળ રસ્તો
ઉલ્લેખનીય છે કે કોઈ પણ સાયબર છેતરપિંડીથી બચવાનો સૌથી સરળ રસ્તો એ છે, કોઈ પણ અજાણી લિંક પર ક્લિક કરવી નહીં અને ચુકવણી કરશો નહીં. તમારી બેન્કિંગ વિગતો, ઓટીપી અને ડેબિટકાર્ડ પાસવર્ડ કોઈ સાથે શેર કરશો નહીં. મફત ભેટનું વચન આપતા કોલથી સાવચેત રહો અને તેમને કોઈ પણ પ્રકારની માહિતી અને ઓટીપી આપશો નહીં. ઘરે બેસીને કમાવાની લાલચમાં ના પડો. આવા કોલ અથવા જાહેરાતોને અવગણવાં. સોશિયલ મીડિયા અથવા ઈન્ટરનેટ પર કોઈ પણ અવાંછિત ઈ-મેઈલ, એસએમએસ અથવા મેસેજમાં કોઈ પણ જોડાણ અથવા લિંક ખોલશો નહીં. તમારા એકાઉન્ટના પાસવર્ડ નિયમિત રીતે બદલતા રહો.