નર્મદા / કેનેડામાં 1 લાખ પગારમાં નોકરી અપાવવાની લાલચ આપીને 9 યુવક-યુવતીઓ સાથે 48 લાખની છેતરપિંડી

• નર્મદા અને ભરૂચના 9 યુવકો સાથે થઇ છેતરપિંડી
• કેનેડા જવાની લાલચ આપીને યુવકો સાથે થઇ છેતરપિંડી
• કેનેડા કંપનીમાં નોકરી આપવાની લાલચે પડાવ્યા રૂપિયા

કેનેડા જવાની લાલચ આપીને યુવકો સાથે છેતરપિંડી થઇ છે. કેનેડા કંપનીમાં નોકરી આપવાની લાલચે તેઓએ રૂપિયા પડાવ્યાં છે. એક યુવક પાસેથી રૂપિયા 5 લાખ 15 હજાર એમ 9 યુવકો પાસેથી રૂપિયા 48 લાખ 45 હજાર ઉઘરાવ્યાં હતાં. કેનેડાની કંપની 1 લાખ પગાર આપશે તેવી લાલચ આપી હતી. 

આ મામલે રાજપીપળા પોલીસ સ્ટેશનમાં કુલ 5 આરોપીઓ સામે ફરિયાદ થઇ છે. આ આરોપીઓને શોધવા માટે પોલીસે તજવીજ શરૂ કરી છે. આ કૌભાંડનો મુખ્ય સૂત્રધાર વત્સલ ખમાર છે. જોકે પોલીસે બે એજન્ટોને ઝડપી પાડ્યા છે.

આ કૌભાંડના મુખ્ય સૂત્રધારે કરી છેતરપિંડી

વડોદરાના વત્સલ પરેશ ખમારે રાજપીપળાના હેમંત બારોટના મિત્રો સાથે છેતરપિંડી કરી છે. જેમાં બંકીમ પટેલ, ધરતી પટેલ, શિવમ પટેલ, પ્રીતેશ પટેલ, હરનિશ સોની, જીગર પટેલ, નિમિષા પટેલ, મોનિલ રાણા અને અર્પિતા રાણા પાસેથી કેનેડાની કંપનીમાં બે વર્ષ માટે વર્ક પરમીટ વિઝા અને કંપની તરફથી રહેવા-જમવાની સુવિધા આપવાનું જણાવીને વ્યક્તિ દીઠ 4.90 લાખ તથા બાયોમેટ્રિક ખર્ચના અલગથી 15,000 મળી કુલ 48 લાખ 45 હજાર રૂપિયા ઉઘરાવ્યા હતા અને 27 જુલાઇ 2019ના રોજ કેનેડા લઇ જવાની બાંહેધરી કરાર લખી આપ્યો હતો.