ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI)એ ગુરુવારે એક ચેનલ સિલેક્ટર એપ લોન્ચ કરી છે. આ એપની મદદથી ગ્રાહક પોતાના ટીવી સબસ્ક્રિપ્શનને જોઇ શકશે અને પોતાની પસંદગીની ચેનલ સિલેક્ટ કરી શકશે. ચેનલ સિલેક્ટર એપથી ગ્રાહકો જે ચેનલો જોવા નથી માંગતા તેને હટાવી પણ શકશે.
ડીટીએચના ગ્રાહકો માટે સારાં સમાચાર
ટ્રાઈએ ગ્રાહકોને આપી આ નવી સુવિધા
હવે ગ્રાહકો પોતાની પસંદગીથી એપ દ્વારા ચેનલો પસંદ કરી શકશે
ટ્રાઈએ ગુરુવારે આ અંગે જાણકારી આપી હતી અને કહ્યું કે બ્રોડકાસ્ટિંગ સર્વિંસને લઇને નવા ટેરિફ નિર્દેશને જાહેર કર્યા બાદ જાણવા મળ્યું કે ગ્રાહકોને પોતાના ડિસ્ટ્રિબ્યૂટેડ પ્લેટફોર્મ ઓપરેટર્સ (DPO)ના વેબ પોર્ટલ તથા એપ દ્વારા ચેનલ પસંદ કરવામાં ખૂબ મુશ્કેલીઓ આવી રહી હતી.
અન્ય સર્વિસ પ્રોવાઈડર પણ જોડાશે
આ સમસ્યાને દૂર કરવા ટ્રાઈએ એક એપને ડેવલપ કરવાનો નિર્ણય કર્યો, જે ડીપીઓથી ડેટા પ્રાપ્ત કરશે. વર્તમાનમાં આ ચેનલ સિલેક્ટર એપ પ્રમુખ ડીટીએચ ઓપરેટર્સ અને મલ્ટી સિસ્ટમ ઓપરેટર્સની સાથે કામ કરી રહ્યું છે. જોકે ટ્રાઈએ એવું પણ કહ્યું કે આ સુવિધાને અન્ય સર્વિસ પ્રોવાઈડર્સની સાથે પણ જોડવામાં આવશે.
રેગ્યુલેટર કહ્યું છે કે તેમણે ટીવી ચેનલ સેલેક્ટર એપને ડેવલેપ કર્યું છે. જેથી ગ્રાહકોમાં પારદર્શીકતા અને વિશ્વાસનીયતા સાથે સિસ્ટમ દ્વારા ટીવી ચેનલ સિલેક્ટ કરવાની તક મળશે. આ પ્રક્રિયામાં સબ્સક્રાઇબર્સને રજિસ્ટર્ડ મોબાઇલ નંબર દ્વારા ઓથેન્ટિકેટ કરવામાં આવશે.
જો કોઈ સબસ્ક્રાઇબરે પોતાના DPOની સાથે મોબાઇલ નંબર રજિસ્ટર નથી કરાવ્યો તો તેની ટીવી સ્ક્રીન પર OTP મોકલવામાં આવશે.
ગ્રાહક આ એપ દ્વારા પોતાની મનગમતી ચેનલ હાલના દર કે ઓછા દરે પસંદ કરી શકશે. ગ્રાહક આ સુવિધા હેઠળ પોતાના વર્તમાન સબસ્ક્રિપ્શનમાં ફેરફાર કરી શકશે અને પોતાની સબસ્ક્રિપ્શન રિકવેસ્ટનો રિયલ ટાઈમ સ્ટેટ્સ ચેક કરી શકશે.
ટ્રાઈના ચેનલ સિલેક્ટર એપને તમે ગૂગલ પ્લે સ્ટોર અને એપલ સ્ટોર પરથી મેળવી શકો છો.
આ એપની વધુ એક ખાસિયત એ છે કે ડીટીએચ કે કેબલ ઓપરેટર્સને રિક્વેસ્ટ મોકલતા પહેલાં ગ્રાહક પોતાના સિલેક્શનને ઓપ્ટિમાઇઝ કરી શકશે જેથી તેમણે ખર્ચ કરેલાં પૈસાથી સૌથી સારી ચેનલની સુવિધા મળી શકે.
ઉલ્લેખનીય છે કે ટ્રાઈએ માર્ચ 2017માં જ બ્રોડકાસ્ટિંગ એન્ડ કેબલ સર્વિસને લઇને નવી રેગ્યુલેટરી ફ્રેમવર્કને અધિસૂચિત કર્યું હતું અને આ નવા ફ્રેમવર્કને 29 ડિસેમ્બર 2018એ લાગુ પણ કર્યું હતું. જે હેઠળ ગ્રાહકોને છૂટ મળે છે કે તેઓ પોતાની પસંદગી પ્રમાણે એ જ ચેનલોને સબસ્ક્રાઈબ કરી શકે છે જેને તેઓ જોવા માંગે છે.