જાહેરાત / મેડિકલના વિદ્યાર્થી માટે ખુશીના સમાચાર, ગુજરાત સરકારે બોન્ડ નિયમોમાં કર્યા ફેરફાર

5 લાખના બોન્ડ સાથે 15 લાખની ગેરંટી

ડિગ્રી મેળવ્યા બાદ 5 લાખના બોન્ડ ભરવાનો જે નિયમ હતો તેમાં કોઇ ફેરફાર નથી કરાયો. જો કે વિદ્યાર્થીઓએ હવે વધારાના 15 લાખની ગેરંટી આપવી પડશે અને જો 1 વર્ષ ગ્રામ્ય વિસ્તારમાં સેવા ન કરી તો 20 લાખ જપ્ત થઇ જશે. Dy Cm નીતિન પટેલના જણાવ્યા અનુસાર, સરકારી લાભ મેળવીને એમબીબીએસ થયેલા વિદ્યાર્થીઓએ હવે 5 લાખના બોન્ડ અને 15 લાખની ગેરંટી આપવી પડશે. એમ કુલ રૂ.20 લાખની ગેરંટી રૂ.300ના સ્ટેમ્પ પર આપવી પડશે. જ્યારે ગ્રામ્ય વિસ્તારોમાં ત્રણ વર્ષને બદલે એક વર્ષની સેવા આપવાની રહેશે

આરોગ્ય કેન્દ્રોમાં 12 હજાર જગ્યાઓ ખાલી 

બોન્ડ માટે સંબંધિત વિદ્યાર્થીએ બેંક ગેરન્ટી તરીકે કોઈપણ રાષ્ટ્રીયકૃત બેંકની અથવા છેલ્લા સતત ત્રણ વર્ષથી રૂ.40 કરોડથી વધુ ડિપોઝિટ ધરાવતી રાજ્યની કોઈપણ શિડ્યુલ બેંકોની અથવા છેલ્લા સતત ત્રણ વર્ષથી રૂ.40 કરોડથી વધુની ડિપોઝિટ ધરાવતી રાજ્યની કોઈપણ નાગરિક સહકારી બેંકની ગેરંટી આપવાની રહેશે. રાજ્યના આરોગ્ય કેન્દ્રોમાં ખાલી રહેલી જગ્યાઓ અંગે ગત બજેટ સત્ર દરમિયાન નીતિન પટેલે એક પ્રશ્નના જવાબમાં કહ્યું હતું કે, રાજ્યની સરકારી-જનરલ હોસ્પિટલમાં 4,644 ખાલી જગ્યાઓમાં વર્ગ-2 અને 4ના કર્મચારીઓની ભરતી થઇ નથી, તો બીજી તરફ રાજ્ય સરકારની જનરલ હોસ્પિટલ સામુહિક આરોગ્ય કેન્દ્રો અને પ્રાથમિક આરોગ્ય કેન્દ્રોમાં મંજૂર થયેલી જગ્યાઓ પૈકી કેટલી જગ્યાઓ ભરવામાં આવી છે. 

નીતિન પટેલે જણાવ્યું હતું કે, રાજ્યની સરકારી-જનરલ હોસ્પિટલોમાં 4,644, સામુહિક આરોગ્ય કેન્દ્રમાં 3,916 અને પ્રાથમિક આરોગ્ય કેન્દ્રમાં 3,495 જગ્યાઓ ખાલી રહી છે. જ્યારે ભરવામાં આવેલી જગ્યાઓ પૈકી મોટાભાગની જગ્યાઓમાં વર્ગ 3-4ને કોન્ટ્રાક્ટ અને આઉટસોર્સિંગ પદ્ધતિથી ભરવામાં આવી છે. જ્યારે વર્ગ 1,2 અને 3માં 45 ટકા જેટલી જગ્યાઓ ખાલી રહી હોવાનો સ્વીકાર કર્યો છે.