ગુજરાતમાં ઉનાળાની શરુઆત વચ્ચે વાતાવરણમાં પલટો આવ્યો છે. ઘણાં ઠેકાણે તો ભારે ઝાપટાં પણ નોંધાયા છે. આજે વહેલી સવારે અમદાવાદમાં ધુમ્મસવાળુ વાતાવરણ સર્જાતા વિઝિબ્લિટીમાં પણ ઘટાડો થયો હતો.
ગુજરાતના હવામાનમાં પલટો, ઠેર-ઠેર વરસાદી માહોલ
બપોરે ગરમી, સાંજે વરસાદ અને સવારે ઠંડી
હજુ 21મી સુધી કમોસમી વરસાદની આગાહી
વેસ્ટર્ન ડિસ્ટર્બન્સના કારણે ગુજરાતના હવામાનમાં પલટો આવતા ફરી એકવાર ઠંડી, ગરમી અને વરસાદ એમ ત્રણ ઋતુઓનો સંગમ જોવા મળી રહ્યો છે. કમોસમી વરસાદથી ખેડૂતોની મુશ્કેલી વધી છે. હવામાન વિભાગે કમોસમી વરસદની આગાહી કરી હતી જેના પગલે ગઈકાલે રાજ્યના આઠ તાલુકામાં કમોસમી વરસાદ નોંધાયો હતો. તો આજે વહેલી સવારે રાજ્યના મોટાભાગના વિસ્તારોમાં ધુમ્મસવાળુ વાતાવરણ સર્જાતા વિઝિબ્લિટીમાં પણ ઘટાડો થયો હતો. સવારના વાતાવરણમાં ઠંડક પણ વધી હતી.
અમદાવાદમાં પણ છવાઈ ધુમ્મસ
અમદાવાદમાં ધુમ્મસ છવાતા વાતાવરણ જાણે કોઈ હિલ સ્ટેશન હોય તેવું બન્યું હતું. શહેરના એસજી હાઈવે સહિતના બ્રિજ પરથી દુર રહેલી બિલ્ડિંગો ધુમ્મસના કારણે ધુંધળી નજરે પડી રહી હતી. તો વહેલી સવારે ઠંડીનો અહેસાસ થતા વહેલી સવારે નોકરી-ધંધાર્થે જતા લોકોને પણ સ્વેટર, ટોપી જેવા ગરમ પોષાકોમાં સજ્જ્ જોવા મળ્યા હતા. બાળકો પણ સ્વેટર-ટોપીમાં સજ્જ થઇ સ્કૂલે ગયા હતા.
ગઢડામાં કરા સાથે વરસાદ વરસ્યો
ગતરોજ રાજ્યના વિવિધ જિલ્લાઓમાં વાતાવરણમાં પલટો જોવા મળ્યો હતો. અમદાવાદ, ગાંધીનગર સહિત સૌરાષ્ટ્ર અને દક્ષિણ તથા ઉત્તર ગુજરાતના વાતાવરણમાં પલટો આવતા હળવાથી ભારે વરસાદી ઝાપટાં નોંધાયા હતા. ધારી ગીરના ગામડા બાદ અમરેલીમાં કમોસમી વરસાદ થયો હતો. સાથે જ બોટાદ જિલ્લાના વાતાવરણમાં પલટો આવ્યો હતો. ગઢડા શહેર સહિત ગ્રામ્ય વિસ્તારમાં કરા સાથે વરસાદ વરસ્યો હતો. ભારે પવન અને ગાજવીજ સાથે કમોસમી વરસાદ વરસતા ખેડૂતોની ચિંતામાં વધારો થવા પામ્યો છે. ત્યારે પડવદર, સમઢીયાળા, સીતાપર સહિતના ગામોમાં કરા પણ પડ્યા હતા.
21 માર્ચ સુધી કમોસમી વરસાદની આગાહી
રાજસ્થાન અને કચ્છની ઉપર સર્જાયેલા સાઇક્લોનિક સરક્યુલેશનની અસર તળે ગુજરાતમાં હજુ 21મી સુધી કમોસમી વરસાદની આગાહી હવામાન ખાતા દ્વારા કરવામાં આવી છે. આજે એટલે કે 17મી માર્ચે પણ હળવાથી મધ્યમ વરસાદની આગાહી કરવામાં આવી છે.
આજે અહીં વરસી શકે છે કમોસમી વરસાદ
આજે સાંબરકાંઠા, ગાંધીનગર, અમદાવાદ, આણંદ, વડોદરા, ભરૂચ, નર્મદા, દાહોદ, મહીસાગર, સુરત, ડાંગ, તાપી, નવસારી, વલસાડ, દમણ, દાદરાનગર હવેલી, અમરેલી, સોમનાથ, ભાવનગર, સુરેન્દ્રનગર, રાજકોટ, કચ્છ અને બોટાદમાં વરસાદ વરસી શકે છે.
આવતીકાલે અહીં વરસાદની આગાહી
તો આવતીકાલે એટલે કે 18મી માર્ચે અરવલ્લી, અમદાવાદ, આણંદ, દાહોદ, નર્મદા, છોટા ઉદેપુર, સાબરકાંઠા, તાપી, ડાંગ, સુરત, ભાવનગર, અમરેલીમાં વરસાદ વરસી શકે છે. 19મી માર્ચે અમદાવાદ, આણંદ, વડોદરા, નર્મદા, ડાંગ, તાપી, વલસાડ, દમણ, દાદરા નગર હવેલી, ભાવનગર, અમરેલીમાં વરસાદ ખાબકી શકે છે.