વાતાવરણ પલટાયું / ગુજરાતમાં આ શું થવા માંડ્યું છે.! વરસાદી ઝાપટાં વચ્ચે પવનની તોફાની બેટિંગ, ક્યાંક ધુળની ડમરીઓ ઉડી તો ક્યાંક ઘરના પતરા ઉડ્યા

• હવામાન વિભાગની આગાહી પ્રમાણે વાતાવરણમાં પલટો
• ધાનેરામાં પવનના કારણે મંડપ ઉડ્યો
• ભારે પવન ફૂંકાતા અનેક મકાનોનાં પતરાં ઊડ્યાં
• રસ્તાઓ પર ભારે પવનને લઇ ધૂળની ડમરી ઉડી
• અનેક વિસ્તારોમાં વૃક્ષો ધરાશાયી થયાના બનાવો બન્યા

વરસાદ અને ભારે પવનને લઈને કરવામાં આવેલી હવામાન વિભાગની આગાહી વચ્ચે ગુજરાતના મોટાભાગના વિસ્તારોના વાતાવરણમાં પલટો આવ્યો છે. ક્યાંક ધીમી ધારે વરસાદ વરસી રહ્યો છે, તો ક્યાંક ધૂળની ડમરી ઉડી રહી છે. ભારે પવનના કારણે અનેક વિસ્તારોમાં વાવાઝોડા જેવો માહોલ સર્જાયો છે. ઉત્તર પશ્ચિમ રાજસ્થાન અને તેને અડીને આવેલા વિસ્તારોમાં સાઈક્લોનિક સર્ક્યુલેશન સિસ્ટમ સર્જાઈ છે. તેની સાથે જ ઉત્તરી મધ્યપ્રદેશમાં ટ્રફ સર્જાયું છે. જ્યારે પાકિસ્તાન નજીક વેસ્ટર્ન ડિસ્ટર્બન્સ સર્જાયું છે. આ ત્રણ સિસ્ટમને કારણે ગુજરાતમાં છેલ્લા 2 દિવસ વરસાદ વરસી રહ્યો છે. 

મોટાભાગના જિલ્લાઓમાં છવાયો વરસાદી માહોલ
આજે સુરેન્દ્રનગર, બનાસકાંઠા, મહેસાણા, સાબરકાંઠા, અરવલ્લી, રાજકોટ અને ગાંધીનગર જિલ્લાના વાતાવરણમાં પલટો આવ્યો છે. રાજ્યના મોટાભાગના જિલ્લાઓમાં વરસાદી માહોલ છવાયો છે.  

સુરેન્દ્રનગરમાં પવનના સૂસવાટા વચ્ચે વરસાદ શરૂ
હવામાન વિભાગની અગાહીને પગલે સુરેન્દ્રનગર જિલ્લાના વાતાવરણમાં પલટો આવ્યો છે. પાટડી અને ધ્રાંગધ્રા રણ વિસ્તારમાં પવનના સૂસવાટા વચ્ચે જોરદાર વાવાઝોડા સાથે વરસાદ શરૂ થતાં વાતાવરણમાં ઠંડક પ્રસરી છે. ભારે પવન સાથે ધૂળની ડંમરીઓ ઉડી રહી છે. ભારે પવનના કારણે મોટું વૃક્ષ ધરાશાયી થયું છે. તો વીજપોલ પણ ધરાશાયી થવાની ઘટના સામે આવી છે. 

ધાનેરામાં ઉડ્યો મંડપ
બનાસકાંઠા જિલ્લામાં ભારે પવનના કારણે મંડપ ઉડ્યો. ધાનેરાના માલોતરા ગામે મામેરા પ્રસંગે બાંધેલો મંડપ ઉડ્યો હતો. ભારે પવન સાથે વરસાદ આવતાંની સાથે મહેમાનોમાં અફરાતફરી મચી ગઈ હતી. 

ચોટીલાના વાતાવરણમાં પલટો
સુરેન્દ્રનગર જિલ્લાના ચોટીલા ડુંગર પર અદભુત નજારો જોવા મળી રહ્યો છે. ભારે પવન સાથે ધૂળની ડમરીઓ ઉડી રહી છે. તળેટીમાંથી સ્પષ્ટ દેખાતો ડુંગર ધૂળથી અદ્રશ્ય થયો છે. ચોટીલામાં અચાનક વાતાવરણમાં પલટો આવ્યો છે. 

હિંમતનગર શહેરમાં હોલ્ડિંગ ધરાશાયી થયા
સાબરકાંઠા જિલ્લાના હિંમતનગર, ઈડર, વડાલી, ખેડબ્રહ્માના વાતાવરણમા પલટો આવ્યો છે. રોડ પર ભારે પવન સાથે ધૂળની ડંમરીઓ ઉડી રહી છે. આકાશમાં કાળા વાદળો વચ્ચે ભારે પવન ફૂંકાતા જનજીવન પ્રભાવિત થયું છે.  ઈડર-વડાલી ખેડબ્રહ્મા સહિતના પંથકમાં વીજળીના કડાકા સાથે વરસાદ શરુ થયો છે. વરસાદને પગલે રોડ રસ્તા પર વરસાદી પાણી ફરી વળ્યા છે. હિંમતનગર શહેરમાં હોલ્ડિંગ ધરાશાયી થયા છે. ભારે પવનના કારણે લોકોના ઘરના પતરા ઉડી ગયા.

મહેસાણામાં વૃક્ષો થયા ધરાશાયી
તો મહેસાણાના વાતાવરણમાં પણ પલટો આવ્યો છે. ભારે પવન ફૂંકાવાની સાથે આકાશમાં કાળા વાદળો છવાયા છે. ભારે પવનને કારણે ધૂળની ડમરીઓ ઉડી રહી છે. ભારે પવન ફૂંકાતા વૃક્ષો થયા ધરાશાયી છે. વિસનગર-મહેસાણા રોડ પર 3 વૃક્ષો ધરાશાયી થયા છે. બાસણા ગામે વૃક્ષો ધરાશાયી થતા એક તરફનો રોડ બ્લોક થયો છે. 

અરવલ્લીમાં ભારે પવન ફૂંકાતા વાહનચાલકો પરેશાન
અરવલ્લી જિલ્લાના ટિંટોઈ, શામળાજી, મોડાસા, ધનસુરા અને બાયડમાં ભારે પવન ફૂંકાઈ રહ્યો છે. ભારે પવન સાથે ધૂળની ડમરી ઉડતા લોકો પરેશાન થયા છે. મોડાસા-શામળાજી હાઈવે પર પવન ફૂંકાતા વાહન ચાલકો પરેશાન થયા છે. 

રાજકોટ અને ગાંધીનગરમાં વાદળછાયું વાતાવરણ 
રાજકોટમાં સતત બીજા દિવસે વાતાવરણમાં પલટો આવ્યો છે. શહેરમાં ભારે પવન સાથે ધૂળની ડમરીઓ ઉડી રહી છે. અસહ્ય બફારા વચ્ચે વાદળછાયું વાતાવરણ સર્જાયું છે. જેના કારણે વાતાવરણમાં થોડી ઠંડક છવાઈ છે. ગાંધીનગરના વાતાવરણમાં પણ પલટો આવ્યો છે. ભારે પવન સાથે વાદળછાયું વાતાવરણ જોવા મળી રહ્યો છે. વાતાવરણમાં પલટો આવતા લોકોને ગરમીથી રાહત મળી છે.