વધતી ઠંડીને લઈ AMC સ્કૂલ બોર્ડ તેમજ રાજકોટ અને કચ્છની શાળાઓમાં સમય ફેરફાર કરાયો છે, રાજકોટની તમામ સ્કૂલનો સમય સવારે 8 વાગ્યાનો કરવા આદેશ
AMC સ્કૂલ બોર્ડ દ્વારા મહત્વનો નિર્ણય કરાયો
રાજકોટની તમામ સ્કૂલનો સમય સવારે 8 વાગ્યાનો કરવા આદેશ
કચ્છની શાળાઓના સમયમાં ફેરફાર કરાયો
હાડ થીજવતી ઠંડીને લઈ અમદાવાદ, રાજકોટ અને કચ્છની શાળાઓમાં સમય ફેરફાર કરાયો છે. તમને જણાવી દઈએ કે, વાલીઓએ ઠંડીના કારણે સ્કૂલના સમયમાં ફેરફાર કરવાની માંગ પણ કરી હતી. જે બાદ VTVએ અહેવાલ પણ પ્રસારિચ કર્યો હતો. રાજ્યના વિવિધ જિલ્લાઓમાં સ્કૂલોના સમયમાં ફેરફાર કરવાની સૂચના આપવામાં આવી છે.
AMC સ્કૂલ બોર્ડ દ્વારા મહત્વનો નિર્ણય કરાયો
વધતી ઠંડીને લઈને AMC સ્કૂલ બોર્ડ દ્વારા મહત્વનો નિર્ણય કરવામાં આવ્યો છે. સ્કૂલ બોર્ડ દ્વારા સમયમાં છૂટછાટ આપવામાં આવી છે. અત્યાર સુધી સ્કૂલનો સમય સવારે 7.30 કલાકનો હતો ત્યારે ઠંડીને કારણે વિદ્યાર્થીઓ સ્કૂલે 8 વાગ્યે જઈ શકશે. સવારે વિદ્યાર્થીઓ 7.30 કલાકને બદલે જો 8 વાગ્યે સ્કૂલ પહોંચે તો વિદ્યાર્થીઓને શિક્ષક ઠપકો ન આપે તેવી ખાસ સૂચના આપવામાં આવી છે.
રાજકોટની તમામ સ્કૂલનો સમય સવારે 8 વાગ્યાનો કરવા આદેશ
રાજકોટમાં VTVના અહેવાલની અસર પડી છે. VTVના રિયાલિટી ચેક બાદ રાજકોટની તમામ સ્કૂલોના સમયમાં ફેરફાર કરવા આદેશ અપાયો છે. તમામ સ્કૂલનો સમય સવારે 8 વાગ્યાનો કરવા આદેશ કરાયો છે. DEOની ટીમ આવતીકાલથી સ્કૂલના સમય ફેરફારના અમલીકરણનું ચેકિંગ કરશે. ગઈકાલે રાજકોટમાં ધોરણ 8ની વિદ્યાર્થિનીનું મૃત્યુ થયું હતું. ઠંડીમાં હાર્ટ એટેક આવવાથી વિદ્યાર્થિનીનું મૃત્યુ થયું હતું. વિદ્યાર્થિનીના મૃત્યુ બાદ VTVએ રાજ્યભરની સ્કૂલોનું રિયાલિટી ચેક કર્યું હતું. વાલીઓએ પણ સ્કૂલોનો સમય 8 વાગ્યાનો કરવા માગ કરી હતી.
સમયમાં ફેરફાર અંગે રાજકોટ જિલ્લા શિક્ષણ અધિકારીનું નિવેદન
રાજકોટની જસાણી સ્કૂલમાં વિદ્યાર્થિનીના મૃત્યુ બાદ શાળાઓના સમયમાં ફેરફારનો આદેશ કરાયો છે. શાળાના સમયમાં ફેરફાર અંગે જિલ્લા શિક્ષણ અધિકારી બી એસ કૈલાએ જણાવ્યું કે, ઠંડીના કારણે શાળાઓ સમયમાં ફેરફાર કરી શકે છે અને આચાર્ય સ્થાનિક કક્ષાએ નિર્ણય લઈ શકે છે. તેમણે જણાવ્યું કે, શાળામાં બાળકોની સલામતી અગત્યની છે અને વિદ્યાર્થીઓને વધુ કપડા પહેરવા શાળા ના ન પાડી શકે. તેમણે ઉમેર્યું કે, શાળાઓ સ્વેટર પહેરતા વિદ્યાર્થીઓને રોકી ન શકે. તેમણે કહ્યું કે, નિશ્ચિત જગ્યાએથી યુનિફોર્મ ખરીદવા સ્કૂલ ન કહી શકે.
કચ્છની શાળાઓના સમયમાં ફેરફાર કરાયો
કચ્છની શાળાઓના સમયમાં ફેરફાર કરાયો છે. કોલ્ડ વેવની આગાહીને ધ્યાને રાખીને શાળાઓના સમયમાં ફેરફાર કરાયો છે. કચ્છની તમામ પ્રાથમિક શાળાઓનો સમય 2 કલાક સુધી લંબાવાયો છે. કચ્છ જિલ્લા પ્રાથમિક શિક્ષણાધિકારીએ આદેશ કર્યો છે. આગામી એક સપ્તાહ સુધી સમયમાં ફેરફાર રહેશે.