બનાસકાંઠાઃ રાજ્યના અગ્રગણ્ય માર્કેટયાર્ડોમાં ગણાતા ડીસા માર્કેટયાર્ડના ચેરમેન તરીકે સતત બીજીવાર બનાસડેરીના વાઈસ ચેરમેન માવજીભાઈ દેસાઈની બિનહરીફ નિયુક્તિ થઈ છે. જ્યારે વાઈસ ચેરમેન પદે કરશનભાઈ કણબીની ચોથી વખત બિનહરીફ વરણી થઈ હતી. નવા ચેરમેન અને વાઈસ ચેરમેનને ડિરેક્ટરો ખેડૂતો વેપારીઓ અને અગ્રણીઓએ શુભેચ્છા પાઠવી હતી.
ધી. ખેતીવાડી ઉત્પન્ન બજાર સમિતી ડીસાના સંચાલક મંડળની ચૂંટણી જિલ્લા રજીસ્ટાર સહકારી મંડળી પાટણના અધ્યક્ષ સ્થાને માર્કેટયાર્ડમાં યોજાઈ હતી. આ અંગે માવજીભાઈ દેસાઈએ જણાવ્યું હતું કે વેપારીઓના હિતને ધ્યાનમાં લઈ ઉત્તર ગુજરાતમાં પ્રથમ નંબરનું માર્કેટયાર્ડ બનાવવા પ્રયત્નશીલ રહીશું.
મહત્વનું છે કે ડીસા માર્કેટયાર્ડના સભાગૃહ ખાતે ચેરમેન અને વાઇસ ચેરમેનની ચૂંટણી યોજાઇ હતી. જેમાં માવજીભાઈ દેસાઈએ ચેરમેન તરીકે ઉમેદવારી કરી હતી. જ્યારે ઉમેદવારમાં બીજું કોઈ પણ નામ ન આવતા માવજીભાઈ દેસાઈને ચેરમેન તરીકે બિનહરીફ નિયુક્ત કરાયા હતા. જ્યારે વાઇસ ચેરમેન તરીકે કરશનભાઈ સતાભાઈ કણબીની ઉમેદવારી હતી.
જેમાં કોઈ ઉમેદવાર તરીકે ઉમેદવારીપત્ર ન આવતા કરશનભાઇ સતાભાઈને પણ બિનહરીફ વિજેતા જાહેર થયા હતા. ચેરમેન બીજી ટર્મ માટે જ્યારે વાઇસ ચેરમેન તરીકે સતત ચોથી ટર્મ માટે બિનહરીફ થતા બનાસકાંઠાના સહકારી ક્ષેત્રમાં આનંદની લાગણી વ્યાપી જવા પામી હતી.
આ પ્રસંગે બનાસડેરીના વાઇસ ચેરમેન અને નવનિયુક્ત ચેરમેન માવજીભાઈ દેસાઈએ જણાવ્યું હતું કે ખેડૂતો અને વેપારીઓના હિતમાં માર્કેટયાર્ડની ચૂંટણી 42 વર્ષ બાદ સમરસ કરી હતી. અને તેમને ચેરમેન તરીકે બિનહરીફ ચૂંટી અમારા પર જે વિશ્વાસ મુક્યો છે. તે અમે સાર્થક કરીશું તેમજ ખેડૂતો વેપારીઓ પ્રશ્ન અંગે સતત ચિંતા કરી ડીસા માર્કેટને ઉત્તર ગુજરાતમાં પ્રથમ નંબરનું માર્કેટયાર્ડ બનાવવા પ્રયત્નશીલ રહીશુ.
ડીસા માર્કેટયાર્ડના ચેરમેન તરીકે માવજીભાઈ દેસાઈને સતત બીજી ટર્મ માટે બિન હરીફ નિયુક્ત કરવામાં આવ્યા છે. આ વખતે સંચાલક મંડળની ૧૪ બેઠકો માટે ૭૪ જેટલા ફોર્મ ભરાયા હોવા છતાં ૬૦ જેટલા ઉમેદવારોને તેઓએ આગવી કુનેહ અને કોઠાસૂઝથી સમજાવટ કરી ફોર્મ પરત ખેંચાવી ચૂંટણી સમરસ કરવામાં સફળતા મેળવી હતી. અને ભાજપ પ્રેરિત પેનલ બિનહરીફ બન્યા બાદ આજે ચેરમેન અને વાઇસ ચેરમેનની વરણી થઈ હતી.