ભારતે ન્યૂઝીલેન્ડને પહેલી ટી20 મૅચમાં હરાવી દીધું હતું. જયપુરના સવાઇ માન સિંહ સ્ટેડિયમમાં રમાયેલ આ મૅચમાં ભારતને 165 રનનું લક્ષ્ય મળ્યું હતું. મેચ દરમિયાન એક વિચિત્ર ઘટના પણ બની હતી.
ભારત અને ન્યૂઝિલેન્ડની મૅચમાં વિવાદ
ગપ્ટિલ અને ચાહર વચ્ચે જોરદાર સાંકેતિક બબાલ
ભારત પહેલી મૅચ જીતી ગયું હતુ
ગપ્ટિલ અને ચાહર વચ્ચે વિવાદ
આ મૅચમાં રોહીત અને સુર્યકુમાર યાદવે શાનદાર પ્રદર્શન કર્યુ પરંતુ ગપ્ટિલ અને ચાહર વચ્ચે વિવાદ પણ જોવા મળ્યો હતો. ઇશારો ઇશારોમાં આ વિવાદ થઇ ગયો હતો.
શું હતી ઘટના
ન્યૂઝીલેન્ડની ઇનિંગની 18મી ઓવરમાં દીપક ચાહર બોલિંગ કરવા આવ્યો. ગપ્ટિલ 40 બોલમાં 64 રન બનાવીને બેટિંગ કરી રહ્યો હતો. 18મી ઓવરના પહેલા બોલ પર ગપ્ટિલે લોંગ ઓન પર 98 મીટરની લાંબી સિક્સર ફટકારી હતી. આ બોલ પર સિક્સર ફટકાર્યા પછી, ગુપ્ટિલે બોલ તરફ નહીં પણ ચાહર તરફ જોવાનું શરૂ કર્યું. ચાહરે જવાબમાં તેની તરફ જોયું નહીં.
પછી શું થયું...
આગલા બોલ પર દીપક ચાહરે બીજી ફુલ લેન્થ બોલ ફેંકી. સ્પીડ ઓછી હતી અને ગપ્ટિલે ફરી એકવાર લાંબો શોટ મારવાનો પ્રયાસ કર્યો હતો. ધીમા બોલને કારણે ગપ્ટિલ સારો શોટ ફટકારી શક્યો નહી અને ડીપ મિડ-વિકેટ પર કેચ થયો હતો. આ વખતે આંખો બતાવવાનો વારો ચાહરનો હતો. બદલો લેવા માટે તેણે ગુપ્ટિલ સામે એ જ રીતે જોયું જે રીતે ગપ્ટિલે પાછલા બોલ પર જોયું હતું પરંતુ ગપ્ટિલે નજર નીચી રાખીને પેવેલિયન તરફ ચાલ્યો ગયો હતો. આ બંને તસવીરો સોશ્યલ મીડિયા પર ઘણી વાયરલ થઇ રહી છે.
ગપ્ટિલની શાનદાર ઇનિંગ
ગપ્ટિલે આઉટ થતા પહેલા 31 બોલમાં તેની 19મી T20 ઈન્ટરનેશનલ ફિફ્ટી પૂરી કરી હતી. આઉટ થતા પહેલા ગપ્ટિલે 42 બોલમાં 70 રનની શાનદાર ઇનિંગ રમી હતી. તેણે પોતાની ઇનિંગમાં ચાર છગ્ગા અને ત્રણ ચોગ્ગા ફટકાર્યા હતા. તેની ઇનિંગના આધારે કિવી ટીમ 164 રન સુધી પહોંચવામાં સફળ રહી હતી. લક્ષ્યનો પીછો કરતા ભારતે સારી શરૂઆત કરી હતી. રોહિત શર્મા અને કેએલ રાહુલે પ્રથમ વિકેટ માટે 31 બોલમાં 50 રન કર્યા હતા.
રોહીતનું શાનદાર પફોર્મન્સ
બાદમાં રોહિતે સૂર્યકુમાર યાદવ સાથે મળીને ભારતીય ઇનિંગને આગળ ધપાવી હતી. બંનેએ 49 બોલમાં 59 રન કર્યા હતા. રોહીત 36 બોલમાં 48 રન બનાવીને આઉટ થયો હતો. જ્યારે સૂર્યકુમાર 40 બોલમાં 62 રન બનાવીને આઉટ થયો હતો. ભારતે 19.4 ઓવરમાં પાંચ વિકેટ ગુમાવીને જીત હાંસલ કરી હતી.