ટેકનોલોજી / ભવિષ્યના શહેર કેવા હશે? 2023માં એર ટેકસી હકીકત બનશે

જાપાનની વિખ્યાત ઓટોમોબાઇલ કંપની ટોયોટાએ જાપાનમાં 175 એકરમાં ભવિષ્યનું શહેર બનાવવાની યોજના રજૂ કરી હતી. હોલીવુડની સાયન્સ ફિકશન ફિલ્મોમાં જોવા મળે છે તેમ આ શહેરમાં ઓટોમેટિક વાહનો હશે. એડજસ્ટ થઇ શકે તેવા એટલે કે જરુર મુજબ આપમેળે નાના કે મોટા થતાં નવી ડિઝાઇનના રસ્તા અને રોબોટ્સ વગેરે હશે. અહીં બે હજાર લોકોના રહેવાની સુવિધા મળશે. તેનું નામ વુવન સિટી રાખવામાં આવ્યું છે.

ટેક્સી સેવાઓ પૂરી પાડતી ઉબેરે હ્યુન્ડાઇના સહયોગથી એર ટેક્સી પર એક પ્રોજેક્ટ શરૂ કર્યો છે, જે 2023 સુધીમાં એર ટેકસી લોન્ચ કરી દેશે. આ ટેક્સીમાં એક સાથે ચાર પેસેન્જર 100 કિલોમીટર સુધીની મુસાફરી કરી શકશે હ્યુન્ડાઇએ હવાઈ ટેક્સીઓના વિકાસ માટે લગભગ 1050 કરોડ રૂપિયા આપ્યા છે. પોર્ટલેન્ડની સ્ટાર્ટઅપ કંપની એઓએ અનોખો ફેસમાસ્ક રજૂ કર્યો છે. કંપનીનો દાવો છે કે તે હવાના પ્રદૂષણ સામે સંપુર્ણ બચાવ કરે છે. તેમાં હવાના તમામ પ્રદુષિત પાર્ટિકલ્સ રોકી શકે તેવા ફિલ્ટર્સ અને સેન્સર્સ પણ છે. તમારે આ 256 ગ્રામ વજનના ઉપકરણને તમારા ચહેરા પર પહેરવાનું રહે છે. માસ્કના સેન્સર શોધી કાઢશે કે હવા કેટલી પ્રદુષિત છે. આગામી જુલાઈ સુધીમાં આ માસ્ક લોન્ચ કરાશે. આ ફેસમાસ્કની કિંમત 350 ડોલર (આશરે 25 હજાર રૂપિયા) હશે.