કેન્દ્ર સરકારે ટેલિકમ્યુનિકેશન બિલ 2022નો ડ્રાફ્ટ તૈયાર કર્યો છે જેમાં વોટ્સએપ ઝૂમ અને ગૂગલ ડ્યુઓને લાઈસન્સ હેઠળ રાખવાનો પ્રસ્તાવ રજૂ કર્યો છે.
સરકારે ટેલિકમ્યુનિકેશન બિલ 2022નો ડ્રાફ્ટ તૈયાર કર્યો
વોટ્સએપને લાયસન્સના દાયરામાં લાવવાનો પ્રસ્તાવ
ઝૂમ અને ગૂગલ ડ્યુઓ કોલિંગ પર ચાર્જ લાગી શકે છે
આગામી સમયમાં વોટ્સએપ, સ્કાઇપ, ઝૂમ, ટેલિગ્રામ અને ગૂગલ ડ્યુઓ જેવી એપ્લિકેશનો પર કોલ કરવાના પૈસા આપવા પડી શકે છે. વીડિયો કમ્યુનિકેશન અને કોલિંગ એપ્લિકેશન્સ સામે પોતાનું વલણ કડક બનાવતા, કેન્દ્ર સરકારે ભારતીય ટેલિકમ્યુનિકેશન બિલ 2022 નો ડ્રાફ્ટ તૈયાર કર્યો છે. નવા ડ્રાફ્ટમાં વોટ્સએપ, ઝૂમ અને ગૂગલ ડ્યુઓને ટેલિકોમ લાયસન્સના દાયરામાં લાવવાનો પ્રસ્તાવ મૂકવામાં આવ્યો છે. સરકારે ડ્રાફ્ટ બિલ તૈયાર કરીને ટેલિકોમ વિભાગની વેબસાઈટ પર મૂક્યું છે. જો બિલ પાસ થશે તો આ તમામ એપ લાઈસન્સના દાયરામાં આવી જશે અને તેની પર વીડિયો કોલ કરવાના પૈસા લાગશે.
વોટ્સએપ, સ્કાઇપ, ઝૂમ, ટેલિગ્રામ અને ગૂગલ ડ્યુઓને લેવું પડશે લાઈસન્સ
ભારતીય દૂરસંચાર બિલ 2022ના ડ્રાફ્ટમાં ઘણી નવી બાબતોનો સમાવેશ કરવામાં આવ્યો છે. આ મુજબ હવે વોટ્સએપ, સ્કાઇપ, ઝૂમ, ટેલિગ્રામ અને ગૂગલ ડ્યુઓ જેવી કોલિંગ અને મેસેજિંગ એપ્સને લાયસન્સ લેવું પડશે. નવા ડ્રાફ્ટ બીલમાં ઓટીટી પ્લેટફોર્મનો પણ સમાવેશ કરવામાં આવ્યો છે.
સોશિયલ મીડિયા પર મૂકાયું ડ્રાફ્ટ બિલ
આઇટી પ્રધાન અશ્વિની વૈષ્ણવે ડ્રાફ્ટ બિલને સૌશિયલ મીડિયા પર મૂક્યું છે. ડ્રાફ્ટ બિલમાં કહેવામાં આવ્યું છે કે જો કોઈ ઈન્ટરનેટ કે ટેલિકોમ સર્વિસ પ્રોવાઈડર લાઈસન્સ સરેન્ડર કરવાની ઓફર કરે છે તો ડ્રાફ્ટમાં ફી રિફંડનો પણ પ્રસ્તાવ છે. આ ઉપરાંત, કેન્દ્ર ટેલિકોમ નિયમો હેઠળ કોઈપણ લાઇસન્સ ધારક અથવા રજિસ્ટર્ડ એન્ટિટી માટે પ્રવેશ ફી, લાઇસન્સ ફી, નોંધણી ફી અથવા અન્ય કોઈ ફી અથવા ચાર્જ, વ્યાજ, વધારાની ફી અથવા દંડ સહિતની કોઈપણ ફી આંશિક અથવા સંપૂર્ણપણે માફ કરી શકે છે.