ચાલુ વર્ષે જુલાઈ મહિના બાદ પ્રથમ વખત 15 રાજ્યો અને કેન્દ્ર શાસિત પ્રદેશોમાં ગુરૂવારથી પેટ્રોલનો ભાવ 100 રૂપિયાથી નીચે ઉતરી ગયો છે. લગભગ આખા દેશમાં જુલાઈના બીજા અઠવાડિયાની શરૂઆતમાં પેટ્રોલ 100 રૂપિયા સુધી પહોંચી ગયુ હતુ.
હવે ભાજપ અને વિપક્ષ સરકારવાળા 15 રાજ્યો અને કેન્દ્ર શાસિત પ્રદેશોમાં પેટ્રોલના ભાવ 100 રૂપિયાની નીચે જતા રહ્યાં છે. જેમાં કર્ણાટક, બિહાર, મધ્ય પ્રદેશ અને કેન્દ્ર શાસિત પ્રદેશ લદ્દાખનો સમાવેશ થતો નથી. અહીં કેન્દ્ર અને રાજ્ય દ્વારા ટેક્સમાં ઘટાડો થયા હોવા છતાં પેટ્રોલની કિંમત 100 રૂપિયાથી વધારે છે.
મોંઘવારીથી ઝઝૂમતા લોકોને રાહત
દિવાળીના તહેવાર પર પેટ્રોલની કિંમતમાં 5 અને ડીઝલની કિંમતમાં 10 રૂપિયાનો ઘટાડો કર્યા બાદ કેન્દ્રના નિર્ણયે મોંઘવારીથી ઝઝૂમી રહેલા લોકોને ઘણી રાહત આપી છે. પેટ્રોલ અને ડીઝલના ભાવમાં સમાન ઘટાડાની જાહેરાત સાથે રાજકીય વર્તુળોમાં ગરમાવો આવ્યો છે. દેશના 16 રાજ્યો અને 7 કેન્દ્ર શાસિત પ્રદેશોએ વેટમાં ઘટાડો કરવાનો નિર્ણય લીધો છે. તો 12 રાજ્યો અને 1 કેન્દ્ર શાસિત પ્રદેશ આ ઘટાડો કરવા માટે તૈયાર નથી. કારણકે તેનાથી રાજ્યોને આર્થિક નુકસાન થાય છે.
આ રાજ્યોએ પેટ્રોલ-ડીઝલના વેટમાં કોઈ ઘટાડો કર્યો નથી
જે 13 રાજ્યો અને કેન્દ્ર શાસિત પ્રદેશોએ પેટ્રોલ અને ડીઝલમાં વેટમાં કોઈ ઘટાડો કર્યો નથી એવા રાજ્યો છે, શિવસેના-એનસીપી-કોંગ્રેસ શાસિત મહારાષ્ટ્ર, આપ શાસિત દિલ્હી, ટીએમસી શાસિત પશ્ચિમ બંગાળ, ડીએમકે શાસિત તામિલનાડુ, ટીઆરએસ શાસિત તેલંગાણા, YSRCP શાસિત આંધ્ર પ્રદેશ, કેરળ, એનપીપી સતારૂઢ મેઘાલય, ઝામૂમો શાસિત ઝારખંડ, કોંગ્રેસના શાસનવાળી છત્તીસગઢ, પંજાબ, રાજસ્થાન અને અંદામાન નિકોબાર. ઓડિશા એકમાત્ર એવુ રાજ્ય છે, જ્યાં વિપક્ષની સરકાર છે અને જ્યાં પેટ્રોલ અને ડીઝલ બંને પર વેટમાં લીટરે 3 રૂપિયાના ઘટાડાની જાહેરાત કરાઈ છે. ઉત્તર પ્રદેશ, ઉત્તરાખંડ, ગુજરાત, હરિયાણા, આસામ, ચંડીગઢ, ગોવા, હિમાચલ પ્રદેશ, જમ્મુ-કાશ્મીર, સિક્કિમ, અરૂણાચલ પ્રદેશ, મિઝોરમ, નાગાલેન્ડ, ત્રિપુરા અને પુડ્ડુચેરીમાં પેટ્રોલ 100 રૂપિયાથી ઓછી કિંમતે વેચાઈ રહ્યું છે.
ભાજપ અને તેના સહયોગી પક્ષોને ફાયદો પહોંચાડવાની આશા
પેટ્રોલ અને ડીઝલની કિંમતમાં ઘટાડો કરવાથી ભાજપ અને તેના સહયોગી પક્ષોને રાજકીય ફાયદો પહોંચાડવાની આશા સેવાઈ રહી છે. ઉલ્લેખનીય છે કે, એપ્રિલ 2020માં પેટ્રોલ લિટરે રૂ. 69 રૂપિયાથી થોડું વધારે હતુ અને ચાલુ વર્ષે માર્ચના અંતમાં રૂ. 90ના સ્તરે અટકી ગયુ હતુ.